Sevda

Almaniya və Azərbaycan musiqiçiləri bir səhnədə

Onlar Firəngiz Əlizadənin məşhur əsərlərini səsləndiriblər

Azərbaycanın Almaniyadakı səfirliyinin təşkilatçılığı ilə Berlində Azərbaycan Bəstəkarlar İttifaqının sədri, Xalq artisti Firəngiz Əlizadənin əsərlərinə həsr edilmiş Alman və Azərbaycan musiqiçilərinin iştirakı ilə konsert keçirilib. Tədbiri Azərbaycanın Almaniyadakı səfiri Pərviz Şahbazlı açaraq Firəngiz Əlizadənin yaradıcılığı barədə tamaşaçılara məlumat verib: "Firəngiz xanım müsəlman şərqindən olan ilk qadın bəstəkardır ki, Qərb və Şərq musiqisinin sintezi formasında yaratdığı əsərləri ilə Qərb aləmində özünü təsdiq edə bilib".

Bəstəkarlar İttifaqının mətbuat əlaqələndiricisinin məlumatına görə, Berlinin mərkəzi Yandermarkt meydanında yerləşən məşhur "Konserthaus"da keçirilən musiqili gecədə professor Yulius Berqerin rəhbərliyi ilə "Auqusburq" violençelistlər qrupu, Berlindən "Modern Art" ansamblı və bir çox musiqiçi bəstəkarın "Oazis", "Atəş", "Muğamsayağı" və "Metamorfozlar" əsərlərini ifa ediblər. Eyni zamanda, Azərbaycan Dövlət Simfonik Orkestri və Dövlət Xalq Çalğı Alətləri Orkestrinin solistləri Firəngiz Əlizadənin diriyorluğu və fortepianoda müşayiəti ilə bəstəkarın "Crossings" əsərini səsləndiriblər.

Xatırladaq ki, konsertin keçirilməsinə Mədəniyyət və Turizm Nazirliyi, Almaniya-Azərbaycan Forumu və "RWE Gas" şirkəti dəstək olublar. Xəbərdə bildirilir ki, konserti diplomatik nümayəndəliklər, ziyalılar, musiqiçilər və yerli əhali dinləyib.

Kaspi.- 2007.- 3-5 noyabr.- S. 17.