Gənclər sivilizasiyaların alyansı naminə təşəbbüsü çərçivəsində beynəlxalq konfrans başa çatmışdır

Bakıda, “Gülüstan” sarayında Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın himayəsi ilə keçirilən “Gənclər sivilizasiyaların alyansı naminə” beynəlxalq konfransı noyabrın 2-də öz işini davam etdirmişdir.
Konfrans iştirakçıları Azərbaycanın birinci xanımı Mehriban Əliyevanı və Qətər Dövlətinin birinci xanımı Şeyxa Moza bint Nasir əl-Misnədi səmimiyyətlə qarşıladılar.
Əvvəlcə Gənclər Səyyar Cavabvermə komandasının təqdimatı oldu. İslam Konfransı Təşkilatının Dialoq və Əməkdaşlıq Naminə Gənclər Forumunun üzvü olan ölkələrin hər birindən nümayəndənin təmsil olunduğu komanda gənclərin sivilizasiya ittifaqı uğrunda beynəlxalq səviyyəli iş aparacaqdır.
Portuqaliyanın sabiq prezidenti, BMT Baş katibinin Sivilizasiyaların İttifaqında yüksək nümayəndəsi Jorj de Sampayo konfransın gözəl təşkilinə, göstərilən qonaqpərvərliyə və gənclər hərəkatına verdiyi dəstəyə görə Azərbaycan Prezidenti İlham Əliyevə və onun xanımı Mehriban Əliyevaya minnətdarlığını bildirdi. O, Bakıda müzakirə olunan məsələlərin, o cümlədən mədəniyyətlərarası dialoqun, əldə edilmiş razılaşmaların dünya üçün faydalı olduğunu söylədi. BMT təmsilçisi qlobal dünyada gənclərin rastlaşdığı problemlərdən, sivilizasiyaların dialoqu üçün mövcud təhdidlərdən danışdı.
Konfrans iştirakçıları Heydər Əliyev Fondunun prezidenti Mehriban xanım Əliyeva və Qətər Dövlətinin birinci xanımı Şeyxa Moza bint Nasir əl-Misnəd ilə xatirə şəkli çəkdirdilər.
Sonra “Gənclər sivilizasiyaların alyansı naminə” beynəlxalq konfransın yekun sənədi - “Nəsillərarası Alyans” adlı Bakı Bəyannaməsi qəbul edildi. Bu rəsmi sənəd 2008-ci ilin yanvarında İspaniyanın Madrid şəhərində BMT tərəfindən keçiriləcək İllik Qlobal Alyans Forumuna təqdim olunacaqdır.
Məlumat verildi ki, Qərb və Şərqi Asiya ölkələrindən, habelə İslam Konfransı Təşkilatından 45 gənc liderin iştirak etdiyi beynəlxalq konfrans günlərində elm, mədəniyyət və sosial sahələrdə müxtəlif sivilizasiyaların tarixi, qarşılıqlı münasibətləri, onların siyasi və sosial-mədəni aspektləri haqqında məruzələr edilmişdir.
Konfransda belə bir ümumi fikir də vurğulandı ki, bu cür tədbirlər həm Azərbaycan haqqında müsbət imicin formalaşması, dolğun informasiyanın yayılması baxımından əhəmiyyətlidir, həm də müxtəlif ölkələrin nümayəndələri bilavasitə özləri Azərbaycandakı vəziyyətlə yaxından tanış olurlar.

Xalq qəzeti.- 2007.- 3 noyabr.- S. 3.