“Göy Göl” Avropada liderlik edir

"Fikrət Əmirovun "Göy-göl" mahnısını ifamda eşidən bəzi sənət adamları müxtəlif fikirlər səsləndirdilər. Bəyənənlər də oldu, bəyənməyənlər də. Dedilər ki, melodiya yadlaşdırılıb, F.Əmirov dəsti-xəttinə müdaxilələr olub. Amma indi sözügedən kompozisiya Avropa hitlərində liderlik edir. İlk olaraq "A flower in bloom" albomundakı eyniadlı mahnı "World musiq chat musiq"yə daxil edilmişdi. Daha sonra çatdakı mənə məxsus olan proqram genişləndirilərək sonuncu albomumdan seçmələri ora daxil etdilər".
   Qeyd edək ki, Əməkdar artist Sevda Ələkbərzadənin Almaniyanın "Network Medien" şirkəti ilə imzaladığı müqavilədən sonra müğənninin Qərb ölkələrində təbliğat kampaniyası başlayıb. Sözügedən şirkətin təqdimatında S.Ələkbərzadənin "Gül açır" adı altında işıq üzü görən kompakt diski Avropada satış üzrə 17-ci yeri fəth edib. Artıq avropalılar və bir sıra musiqiçilərin azərbaycanlı müğənninin ifasına maraq göstərdiyi və onunla əlaqə yaratdığını öyrəndik. İfa etdiyi digər məşhur mahnıları arasında seçim aparan müğənni onların geniş təbliğatını aparmaq məqsədi ilə "Network Medien" şirkətinə təqdim etməyi düşünür. Müğənni müqavilənin şərtlərinin sonrakı mərhələsində daha geniş layihələrin durduğunu qeyd etdi.
   Əməkdar artist əlavə etdi ki, "Gül açır" adlı diski eyni zamanda dünyanın bir çox tanınmış müğənnilərinin albomları ilə eyni satılır və Avropada çıxan ən yaxşı disklərin "20-liy"inə düşüb: "Həmin "iyirmilik"də dünyanın bir sıra ölkələrindən disklər var, Azərbaycandan isə yeganə mənim diskimdir. Düşünürəm ki, bu hadisə "Eurovision" mahnı müsabiqəsində iştirakdan üstündür. Diskim bir aydır çıxıb və bu qısa müddətdə bu dərəcədə reytinq qazanması böyük fəxrdir. Artıq Vaşinqton, Hollandiya, Fransa, İtaliyanın radiostansiyaları həmin diskdə yer alan mahnıları səsləndirmək üçün mənə müraciət ediblər".

Mövqe.- 2007.- 15-16 noyabr.- S. 13.