Akifqızı Ş.

 

Mədəni irs gecəsində Azərbaycan təmsil olunmuşdur:

 

Merilənd ştatının Brədli Hill ibtidai məktəbində "Mədəni irs" gecəsi keçirilmişdir. Ənənə şəklini alan bu tədbiri hər il şagirdlər səbirsizliklə gözləyirlər. Çünki hamı ailəsinin məxsus olduğu etnik köklər haqda danışa, tarixi vətənləri ilə öyünə bilər.
Elə bu il də həmçinin - məktəbin idman zalında 22 müxtəlif xalqların mədəniyyətini əks etdirən guşələr qurulmuşdur. Burada oxuyan Fuad və Musa Seyidzadə qardaşları da vətənlərinin zəngin mədəni irsindən bir parça nümayiş etdirdilər. Üçrəngli bayrağımızı, xəritəmizi asıb dostlarına milli geyimlərimiz, mətbəximiz haqda danışdılar. Anaları Cəmilə xanımın hazırladığı ləzzətli dolma axşamın ən populyar əyani vəsaitinə çevrildi. Musa sinif yoldaşlarının hazırladığı digər ölkələrə aid guşələri gəzəndən sonra belə hamıya deyirdi: "Azərbaycan böyükdür və çox qəşəngdir".
Brədli Hill məktəbinin direktoru Sanda Ris "Mədəni İrs" gecələrinin vacibliyini belə görür: "Biz, qlobal cəmiyyətdə yaşayırıq və daim dünyanın müxtəlif hissələrində yaşayan insanlarla ünsiyyət, əməkdaşlıq qururuq. Əgər uşaqlarımızı həmin qlobal cəmiyyətin iştirakçısı görmək istəyiriksə, onları dünyanın müxtəlifliyini anlamağa öyrətməliyik".
ABŞ rəsmi statistikasına görə, ölkənin ibtidai siniflərində oxuyan şagirdlərin hər beş nəfərindən birinin ana dili ingilis dili deyil. Təhsil Nazirliyi belə mədəni müxtəliflikdən bəhrələnmək üçün məktəblərdə etnik köklər ilə tanışlığa həsr olunan tədbirlərin artırılmasına çağırmışdır. Mütəxəssislərin fikrincə bu, uşaqlarda fərqli rəyi, nəzər nöqtəsini qəbul etmək qabiliyyətini artırır.
Brədli Hill məktəbinin şagirdləri də bir axşamlıq fərqli mədəniyyətə qonaq oldular. Hər gün parta arxasında oturan sinif yoldaşlarını milli geyimlərdə, tanış olmayan musiqi alətlərində çalan, rəqs edən görmək təəccüblü olsa da, alqışların ardı-arası kəsilmirdi.
Musa Seyidzadənin ifa etdiyi Maestro Niyazinin "Arzu" romansı isə konsert proqramının ən yaxşı çıxışı hesab edilmişdir. Hətta məktəbin direktoru heyrətini gizlətməyərək deyirdi: "Gənc yaşı üçün çox gözəl səsi var. Biz Musadan gələcəkdə böyük işlər gözləyirik".

Azərbaycan.- 2007.- 9 noyabr.- S. 6.