İlk
operamız Rusiya efirində
və ya "Kultura"nın
mədəniyyətimizə birbaşa marağı
Rusiyanın ən nüfuzlu
və mükəmməl telekanallarından olan
"Kultura"nın Azərbaycana marağı
yüksələn xətt üzrə inkişaf
etməkdədir.
Bir neçə il öncə telekanalın
çəkiliş qrupu Bakının milli-mədəni,
tarixi-memarlıq ənənələrini əks etdirən
filmi ərsəyə gətirməkdən ötrü
Bakıya gəlmişdi, bir müddət sonra isə
böyük rus şairi Sergey Yeseninin həyatının
Bakı mərhələsi haqqında filmin istehsalı rejissor
Mirbala Səlimliyə həvalə edilmişdi. Hər iki
hadisənin birbaşa iştirakçılarının
fikirlərini "Həftə içi" qəzetinin
oxucularına çatdırmışdıq.
Opera və Balet Teatrının mətbuat
xidmətindən daxil olan məlumata görə, teatrın
rəhbərliyi "Kultura" telekanalının
rəhbərliyindən təklif məktubu alıb. Məktubda
deyilir: "Biz özünəməxsus
ənənələri olan Azərbaycan Dövlət Akademik
Opera və Balet Teatrının fəaliyyəti ilə
yaxından tanışıq. Onun MDB məkanında ən
qabaqcıl teatrlardan biri olduğu bizə məlumdur. Son
illərdə Azərbaycan Opera və Balet Teatrının
kollektivinin Rusiya Akademik Böyük Teatrı və Mariinsk
Teatrının səhnələrindəki peşəkar
çıxışlarının şahidi olmuşuq. Bu teatrın
uğurlu qastrol siyasəti, teatrınızın
səhnəsində azərbaycanlı həmkarları ilə
çıxış edən Rusiyanın
dünyaşöhrətli opera və balet ustalarının
sənətkarlarınız və
tamaşaçılarınız barəsindəki
yüksək təəssüratları isə
deyilənləri bir daha təsdiq edir. Məhz bu
səbəblərdən sizinlə belə bir layihəni
həyata keçirməkdən şərəf duyuruq".
Layihə isə Azərbaycan, Ukrayna, Estoniya və
Litvanın Opera və Balet teatrları haqqında hər biri 60
dəqiqəlik olmaqla sənədli filmlərin
çəkilməsindən ibarətdir. Əldə edilmiş
razılığa əsasən, "Kultura"nın
nümayəndələri noyabrın 30-da
şəhərimizdə olacaq və 5 gün ərzində
teatrımızın bugününü əks etdirən filmin
çəkilişlərini
gerçəkləşdirəcəklər. Konkret olaraq
C.Verdinin "Riqoletto", Ü.Hacıbəylinin "Leyli
və Məcnun" operalarının, Q.Qarayevin "Don
Kixot", "Leyli və Məcnun" biraktlı
baletlərinin, F.Əmirovun "Min bir gecə" baletinin
tamaşalarından bəzi səhnələri lentə alacaq,
teatrın fəaliyyətini, yeni quruluşları,
solistlərin yaradıcılığından ən qabarıq
məqamları əks etdirən süjetlər hazırlayacaq,
teatrın direktoru Akif Məlikov və yaradıcı
kollektivlərin rəhbərləri ilə müsahibələr
aparacaqlar.
Məlumat üçün nəzərinizə
çatdıraq ki, "Kultura" telekanalı 10 il
öncə Mstislav Rostropoviç və Dmitri Lixaçovun
təşəbbüsü, Rusiya Federasiyasının
ozamankı prezidenti Boris Yeltsinin sərəncamı
sayəsində meydana gəlib. Kanalın rəhbərlərindən
biri müsahibəsində bildirir ki, son dərəcə
qeyri-komfort iş şəraitində, reklama efir vaxtı
ayırmamaq kimi başlıca şərtlə
fəaliyyətə başlayan "Kultura" telekanalı 2
il ərzində məzmunlu layihələr təqdim
etməklə, dünya səhnələrinin
yüksəksəviyyəli tamaşa və konsertlərini
birbaşa yayımlamaqla 90 milyonluq tamaşaçı
auditoriyasına sahib olub. Müsahibədən öyrənirik
ki, telekanalın onurğa sütununu sovet dönəmində
"Mərkəzi Televiziya" adlandırılan
tele-kanalın ədəbi-dram və kino redaksiyalarının
püxtələşmiş televizionçularının
peşəkarlığı təşkil edir...
Həftə içi.- 2007.-
20 noyabr.- S. 8.