Turanə

Opera və Balet Teatrının fəaliyyəti rusiyalı

rejissorlarının gözü ilə

"Kultura" teatrımız haqqında film çəkmək istəyir

Bu günlərdə Dövlət Akademik Opera və Balet Teatrına Rusiyanın "Kultura" kanalının rəhbərliyindən bir təklif gəlib. Belə ki, kanal keçmiş MDB məkanındakı aparıcı Opera və Balet teatrlarından biri olan Azərbaycan Milli Opera və Balet Teatrı haqqında 60 dəqiqəlik sənədli film çəkmək niyyətindədir. Qeyd edək ki, Azərbaycan Opera və Balet Teatrı ilə yanaşı, yalnız Ukrayna Akademik Opera və Balet Teatrı, Estoniya və Litva Milli Operaları haqqında belə filmlərin çəkilişi nəzərdə tutulub.

"Biz özünəməxsus ənənələri olan Azərbaycan Dövlət Akademik Opera və Balet Teatrının fəaliyyəti ilə yaxından tanışıq. Onun MDB məkanında ən qabaqcıl teatrlarından biri olduğu bizə məlumdur. Son illərdə Azərbaycan Opera və Balet Teatrı kollektivinin Rusiya Akademik Böyük Teatrı və Marinski adına Teatrın səhnələrindəki professional çıxışlarının şahidi olmuşuq. Bu teatrın uğurlu qastrol siyasəti, onun səhnəsində çıxış edən Rusiyanın dünyaşöhrətli Opera və Balet ulduzlarının Bakı Teatrının səhnəsində Azərbaycanın vokal və balet sənətinin nümayəndələri ilə birgə çıxışları haqqında müsbət təəssüratları bizə bunu deməyə haqq verir. Bu sözlər teatra "Kultura" kanalının rəhbərliyi tərəfindən ünvalanan məktubda yazılıb.

İkitərəfli razlığa əsasən, "Kultura" telekanalının nümayəndələri noyabrın 30-da Bakıda səfərdə olacaq. Qonaqlar filmin çəkilişini 5 gündə həyata keçirəcəklər. Dekabrın 1-dən 4-nə kimi Teatrın repertuarında olan bir neçə tamaşa C.Verdinin "Riqoletto", Ü.Hacıbəyovun "Leyli və Məcnun" operaları, həmçinin, Q.Qarayevin “Don Kixot”, "Leyli və Məcnun" və F.Əmirovun "Min bir gecə" baletlərinin tamaşalarından çəkilişlər aparacaq. Teatrın bugünkü fəaliyyəti, onun yeni quruluşları, aparıcı sənətçiləri haqqında süjetlər hazırlayacaq. Teatrın direktoru Akif Məlikov və yaradıcı kollektivlərin rəhbərləri ilə intervyülər lentə alacaqlar. Teatrın rəhbərliyi isə öz növbəsində Azərbaycanın akademik sənətini təmsil edən aparıcı sənət ocağının fəaliyyətinə yüksək dəyərin verilməsini bütünlükdə milli mədəniyyətimizin daha bir uğuru kimi qiymətləndirib.

Yeni Azərbaycan.- 2007.- 17 noyabr.- S. 12.