Əliyev Ə.

Terri Devis: Azərbaycanın zəngin mədəniyyətindən həmişə məmnunluq duyuram

Bu fikri Avropa Şurasının baş katibi Terri Devis rəhbərlik etdiyi qurumun nəzdində fəaliyyət göstərən “Avropa Şurası qadınlarının dostluğu” cəmiyyətinin təşəbbüsü ilə “Həmrəylik günü” devizi altında keçirilmiş ənənəvi yarmarkada demişdir.
Avropa Şurasının iqamətgahında keçirilmiş yarmarkada Türkiyə, Bolqarıstan, Rumıniya, Ukrayna, Almaniya və digər ölkələrlə yanaşı, Azərbaycanın da zəngin mətbəxinə, mədəniyyətinə, tarixinə həsr olunmuş guşə var idi. Burada təqdim olunan paxlava, şəkərbura və digər şirniyyat növləri, nəfis şəkildə toxunmuş kiçik xalçalar, musiqilərimizin yazıldığı disklər, müxtəlif içkilər, suvenirlər və digər əşyalar tamaşaçılarda böyük maraq doğurmuşdu.
Avropa Şurasının baş katibi Terri Devis belə tədbirlərin xeyriyyəçilik baxımından mühüm hadisə olduğunu vurğulamış, yarmarkada satış zamanı əldə edilən vəsaitin üzv ölkələrdə ehtiyacı olan şəxslərlə bağlı layihələrin həyata keçirilməsinə yönəldildiyini bildirmişdir.
Baş katib Azərbaycan guşəsindən heyranlığını gizlətməmiş, ölkəmizin zəngin mədəniyyətindən həmişə böyük məmnunluq duyduğunu söyləmiş, nümayəndəliyimizin rəhbərinə minnətdarlığını bildirmişdir. O, Azərbaycan qadınlarının milli geyim nümunələrini də yüksək qiymətləndirmişdir.
Avropa Şurası Nazirlər Komitəsinin AQO qrupunun rəhbəri Per Syirgen Azərbaycan guşəsi ilə tanışlıqdan xüsusi zövq aldığını, zərif naxışlarla toxunmuş xalçalarımızla artıq tanış olduğunu, milli mətbəx nümunələrinin və qədim qadın geyiminin onda xüsusi təəssürat oyatdığını, bütün bunların Azərbaycan mədəniyyətinin qədim tarixini və zənginliyini göstərdiyini bildirmişdir.
Cəmiyyətin sədri xanım Bernadett Villiger ölkəmizə məxsus guşənin zövqlə və gözəl hazırlandığını, Azərbaycanın bu ənənəvi tədbirdə həmişə yüksək səviyyədə iştirak etdiyini, dadlı milli şirniyyatların, xalça nümunələrinin heyranlıq doğurduğunu bildirmişdir. O, Azərbaycan nümayəndəliyinin ölkəmizin təbliği sahəsində səylərini yüksək qiymətləndirmiş, belə tədbirlərdə əldə edilən vəsaitin həm də Azərbaycanda ehtiyacı olan şəxslərlə bağlı layihələrin maliyyələşdirilməsinə yönəldildiyini söyləmişdir.
Azərbaycanın Avropa Şurası yanındakı daimi nümayəndəliyinin rəhbəri, səfir Arif Məmmədov guşədə nümayiş etdirilmiş milli mətbəx nümunələrimizin, hədiyyələrin və digər eksponatların avropalılarda xüsusi maraq doğurduğunu, 3-4 il öncə xalqımızın tarixini, mədəniyyətini, incəsənətini əks etdirən hədiyyələri tapmağın bir problem olduğunu, amma hazırda bu istiqamətdə böyük işlər görüldüyünü bildirmişdir. O demişdir ki, ölkəmizin təbliği sahəsində belə tədbirlərdə iştirakın böyük rolu var və bu iş gələcəkdə də davam etdiriləcəkdir. Azərbaycan Xalq Cümhuriyyətinin 90 illiyi ilə bağlı silsilə tədbirlər də nəzərdə tutulmuşdur.
Yarmarkada əldə olunmuş vəsait əlil və valideyn himayəsindən məhrum olmuş uşaqlara, qaçqın və məcburi köçkünlərə yardım məqsədi ilə yaradılmış fondlara köçürülmüşdür.

Xalq qəzeti.- 2007.- 28 noyabr.- S. 3.