Səudiyyə Ərəbistanında Azərbaycan mədəniyyəti günləri

Noyabrın 10-dan etibarən Səudiyyə Ərəbistanında Azərbaycan mədəniyyəti günləri başlanır. Bir həftə davam edəcək mədəniyyət günlərində dost ölkənin əhalisi qədim dövlətçilik ənənələrinə malik olan Azərbaycanın uzaq əsrlərdən çağdaş dövrümüzədək müxtəlif milli geyim formaları, məşhur fırça və mahir xalça ustalarımızın zəngin yaradıcılığının bəhrəsi olan və bu gün də öz heyrətamiz gözəlliyi ilə dünya muzeylərini ziynətləndirən qiymətli sənət əsərlərilə tanış olacaq, müğənnilərimizin çıxışlarını dinləyəcəklər. Qardaş ölkədə Azərbaycan mədəniyyətini görkəmli opera, estrada və muğam ustalarımız - respublikanın xalq artisti Azər Zeynalov, Mənsum İbrahimov, Nəzakət Teymurova, müğənni Lalə Məmmədova, Vəsilə İbrahimova, Təyyar Bayramov, "Muğam" teatrının instrumental ansamblı, müxtəlif rəqs kollektivləri və Pantomima teatrı təmsil edəcək. Nümayəndə heyətinə Azərbaycan Respublikasının mədəniyyət və turizm naziri Əbülfəs Qarayev rəhbərlik edir.

Azərbaycan.- 2007.- 11 noyabr.- S. 3.