Bakı Türk dövlət və cəmiyyətlərinin XI dostluq, qardaşlıq və əməkdaşlıq qurultayına hazırdır

AzərTAc xəbər verir ki, Azərbaycan Prezidenti İlham Əliyevin təşəbbüsü ilə noyabrın 17-19-da Bakıda Türk dövlət və cəmiyyətlərinin XI dostluq, qardaşlıq və əməkdaşlıq qurultayı keçiriləcəkdir.
Qurultayın məqsədi türkdilli dövlətlər və cəmiyyətlərin dostluq, qardaşlıq və əməkdaşlıq əlaqələrini inkişaf etdirmək, onlar arasında informasiya mübadiləsini və onların bir-birini daha yaxından tanımalarını təmin etmək, türkdilli xalqların zəngin mədəniyyətlərini təbliğ etmək, iqtisadi inkişaf sahəsində qarşılıqlı əməkdaşlığı genişləndirən tədbirlər görmək və ümumi problemlərin həlli yollarını birlikdə araşdırmaqdır.
Artıq qurultaya hazırlıq işləri tam başa çatmışdır. Ümumilikdə, qurultayda 1150 nəfərin iştirakı gözlənilir. XI qurultaya Türkiyə, Azərbaycan, Qazaxıstan, Qırğızıstan, Özbəkistan, Türkmənistan, Tacikistan və Monqolustan respublikaları ilə yanaşı, Rusiya Federasiyasının Altay, Başqırdıstan, Çuvaşıstan, Dağıstan, Kabarda-Balkar, Tatarıstan, Qaraçay-Çərkəz respublikalarından, Krım, Rumıniya, Bolqarıstan, Kosovo və Yunanıstanda yaşayan türkdilli xalqların nümayəndələri, Kumık, Noqay, Şimali Kipr, Qaqauz, Axıska türkləri qatılacaqlar. Amerika, İdil-Ural, Sibir, Yaxın Şərq, Əfqanıstandakı türk cəmiyyətlərinin nümayəndələri, deputatlar, ictimai birliklərin və qeyri-hökumət təşkilatlarının, xarici ölkələrdə fəaliyyət göstərən nüfuzlu Azərbaycan və türk icmalarının rəhbərləri, tanınmış elm və incəsənət xadimləri, Türkiyə və Rusiyanın Azərbaycandakı səfirliklərinin nümayəndələri və KİV təmsilçiləri də qurultaya dəvət olunmuşlar.
Dünyanın 30 ölkəsinin təmsilçilərinin iştirak edəcəyi qurultayın açılışında Azərbaycan Prezidenti İlham Əliyev, Türkiyənin Baş naziri Rəcəb Tayyib Ərdoğan, Türkmənistan Baş nazirinin müavini, Şimali Kipr türklərinin lideri, habelə digər türkdilli dövlətlərin yüksək vəzifəli dövlət və hökumət nümayəndələri iştirak edəcəklər. Türkiyənin 9-cu prezidenti Süleyman Dəmirəl qurultayın yekun iclasına qatılacaqdır.
Qurultay çərçivəsində noyabrın 18-də beynəlxalq əlaqələr, media və informasiya texnologiyaları, iqtisadi, ticarət, maliyyə əlaqələri və turizm, elm, təhsil və texnologiya, cəmiyyətin idarə olunması və hüquq, dil və mədəniyyət, gənclik komissiyalarının iclasları keçiriləcəkdir.
İclaslarda türkdilli xalqlar arasında elm, texnika, mədəniyyət, təhsil, iqtisadiyyat, ticarət, turizm və maliyyə sahələrində əməkdaşlıq, türk dünyasının mədəni irsinin təbliği, gənclərin qarşısında duran vəzifələr, onların milli ruhda tərbiyə olunması problemləri, müasir qloballaşma proseslərinin xalqlarımızın həyatına təsiri ilə bağlı məsələlər müzakirə ediləcəkdir. Eyni zamanda, qurultayda türk dünyasını narahat edən problemlər, o cümlədən Ermənistan-Azərbaycan, Dağlıq Qarabağ münaqişəsi, İraq və Əfqanıstanda yaşayan türkdilli xalqların vəziyyəti, Axıska türklərinin öz tarixi torpaqlarına qayıdışı sahəsində mövcud olan çətinliklərlə bağlı fikir mübadiləsi aparılacaqdır.
Tədbirin sonunda qurultayın yekun hesabatının, habelə 1915-ci il hadisələri ilə əlaqədar qondarma erməni soyqırımı iddiaları ilə bağlı bəyanatın qəbul edilməsi gözlənilir.
Türk Dövlət və Cəmiyyətləri Dostluq, Qardaşlıq və Əməkdaşlıq Vəqfi (TüDEV) Türk dövlət və cəmiyyətlərinin dostluq, qardaşlıq və əməkdaşlıq qurultaylarını 1992-ci ildən keçirir. Əvvəlki 10 qurultayın hamısı Türkiyədə təşkil olunmuşdur. Ötən ilin sentyabrında Antalyada keçirilmiş X qurultayda Azərbaycan Prezidenti İlham Əliyevin təklifi ilə növbəti qurultayın Bakıda keçirilməsi qərara alınmışdır. Beləliklə, ilk dəfədir ki, qurultay Türkiyədən kənarda keçiriləcəkdir.

Azərbaycan.- 2007.-17 noyabr.- S. 3.