Qazaxıstan mədəniyyət və informasiya nazirinin müavini Askar Burivayevin çıxışı

- Azərbaycan Respublikasının hörmətli Prezidenti cənab İlham Əliyev!
Türkiyənin hörmətli Baş naziri cənab Rəcəb Tayyib Ərdoğan!
Xanımlar və cənablar!
Bügünkü Türk dövlət və cəmiyyətlərinin XI dostluq, qardaşlıq və əməkdaşlıq qurultayı xüsusi bir əhəmiyyət kəsb edən hadisədir. Bu tədbirin keçirilməsinə görə biz təşkilatçılara təşəkkürümüzü bildiririk.
Xanımlar və cənablar!
Son illər ərzində bütün türkdilli dövlətlər arasında mədəni, mənəvi, humanitar və digər sahələrdə əlaqələr getdikcə genişlənməkdədir. Bu dövlətlər ümumi mədəniyyətə, ümumi tarixi köklərə, ümumi dilə malikdirlər. Türk dünyası dünya sivilizsiyasında çox əhəmiyyətli rol oynamışdır. Bizim əcdadlarımız tərəfindən yaradılmış mədəniyyət abidələri hazırda bütün bəşəriyyətə məxsusdur. Bu nailiyyətləri, bu dəyərləri yeni nəsillərə çatdırmaq bizim qarşımızda duran məqsədlərdən biridir.
Türk dövlət və cəmiyyətlərinin XI dostluq, qardaşlıq və əməkdaşlıq qurultayının Bakıda keçirilməsi türkdilli xalqların əməkdaşlığının bariz nümunəsidir. Onlar öz mentalitetinə, dilləri, tarixi ənənələrinə görə bir-birinə çox yaxındırlar.
Qazaxıstan qardaş Azərbaycanın və digər türkdilli dövlətlərin təşəbbüslərini hərtərəfli şəkildə dəstəkləyir. Növbəti qurultayın keçirilməsi ideyalar mübadiləsi üçün çox gözəl bir imkandır ki, bunun da nəticəsində türk dünyası daha da inkişaf edə bilsin.
Hörmətli dostlar!
Qurulyatın işinə uğurlar arzulayıram. Diqqətinizə görə təşəkkür edirəm.
Çox sağ olun.

Azərbaycan.- 2007.- 18 noyabr.- S. 5