ABŞ səfirliyi "Regional Kitabxanaların inkişafı" Proqramı çərçivəsində kitabxanalara 55 min kitab hədiyyə etmişdir

Noyabrın 14-də Amerika Mərkəzində ABŞ səfirliyinin "Regional kitabxanaların inkişafı" proqramının yekunlaşması ilə bağlı tədbir keçirilmişdir.

ABŞ səfirinin müavini Donald Lu demişdir ki, proqramda məqsəd region kitabxanalarının fəaliyyətini genişləndirmək və onları ictimai mərkəzlərə çevirməkdir.

Bildirilmişdir ki, proqram çərçivəsində regional kitabxanaların inkişafı və kitabxanalarda informasiya mərkəzlərinin yaradılması layihələri həyata keçirilmişdir. Proqram Naxçıvan, Gəncə, Mingəçevir və Əli Bayramlı şəhərlərini, Gədəbəy, Qobustan, İsmayıllı, Kürdəmir, Neftçala, Qax, Salyan, Xaçmaz, Dəvəçi, Zaqatala, Quba, Bərdə, Lənkəran, Beyləqan, Astara və Şəki rayonlarını əhatə etmişdir. Proqram çərçivəsində bu regionlar arasında yaradılmış elektron şəbəkə vasitəsilə bölgələrdə kitabxanalarının inkişafı üçün kitabxanaçılar, habelə əhali arasında fikir və informasiya mübadiləsi aparılmışdır. Eyni zamanda, ABŞ səfirliyinin və başqa təşkilatların nümayəndələri ilə birbaşa internet forumlar keçirilmişdir.

Kitabxanalar müxtəlif kitablarla, jurnallarla, video və audio avadanlıqla, kompüterlərlə təchiz edilmişdir. Layihə çərçivəsində kitabxanalara, ümumilikdə, 55 min kitab hədiyyə olunmuş, müntəzəm təlimlər keçirilmişdir.

Respublika.- 2007.- 15 noyabr.- S. 7.