Elmi Bərpa Mərkəzində 9000-dən artıq əşya bərpa olunub

Əbülfəs Qarayev: "Torpaqlar azad edildikdən sonra əsas işimiz muzey və mədəniyyət mərkəzlərini bərpa etmək olacaq"

"Cəbrayıl muzeyində saxlanılan eksponatların çıxarılmasma müvəffəq olmuşuq. Bu gün həmin eksponatlar İstiqlal Muzeyində saxlanılır". Mədəniyyət və Turizm naziri Əbülfəs Qarayevin məlumatına görə, müəyyən qədər korlanmış muzey eksponatları artıq bərpa edilir:

"Torpaqlarımız azad olunduqdan sonra bizim əsas işimiz orada muzeylərin, mədəniyyət mərkəzlərinin bərpasından ibarət olacaq. Çünki işğaldan çıxacaq əşyaların normal vəziyyətdə olması qeyri-mümkündür. Bu gün biz haray salmaq, bu problemi dünya ictimaiyyətinə çatdırırıq, ancaq onlara əlimiz çatmır. Binadan tutmuş orada saxlanılan ən xırda sərvətə qədər hər bir şey bərpa olunacaq".

Yeri gəlmişkən qeyd edək ki, bu günə qədər Elmi Bərpa Mərkəzində Azərbaycan mədəniyyətinə məxsus 9000-dən artıq əşya bərpa olunub. Bərpa olunan sərvətlər sırasında xalçalar, əlyazmalar, tanınmış insanların şəxsi məktubları, rəsm əsərləri, saxsı və metaldan hazırlanmış əşyalar, silahlar, rəngkarlıq və qrafika əsərləri, poliqrafiya nümunələri var.

Ayna.- 2007.- 26 oktyabr.- S. 8.