Turanə

İncəsənət Muzeyi yeni saziş imzalayıb

Gələn il Belarusda Qara Qarayevin yubileyi ilə bağlı tədbir keçiriləcək

Dünən İncəsənət Muzeyi ilə Belarus Təsviri İncəsənət Muzeyi arasında ikitərəfli əməkdaşlığa dair saziş imzalanıb. İncəsənət Muzeyində baş tutan görüşdə mədəniyyət və turizm naziri Əbülfəs Qarayevlə yanaşı, Belarusun ölkəmizdəki fövqəladə və səlahiyyətli səfiri Nikolay Potskeviç də iştirak edib.

Əbülfəs Qarayev mədəniyyət sahəsinin dövlətin idarəçilik siyasətinin mühüm bir hissəsi olduğunu deyib: Bu il Belarusda Azərbaycan mədəniyyət günləri keçirilən zaman orada yerləşən bir neçə muzey və kitabxanalarla da tanış olmuşduq. Bizdə mədəniyyət binalarında aparılan təmir-bərpa işləri mərhələsi onlarda artıq yekunlaşdırılmışdı. Belarusların bu işdə olan təcrübəsini nəzərə alaraq, Azərbaycanda bərpa işləri ilə məşğul olan bir sıra mütəxəssisi Minsk şəhərinə göndərdik. Bizim nümayəndə heyəti təmir olunan muzeyin fəaliyyəti və yeni quraşdırılan avdanlıqla artıq tanış olublar. İndi həmin mütəxəssislər qazandıqları təcrübənin Azərbaycanda da tətbiq olunması üçün öz təkliflərini hazırlayırlar.

Belarus səfiri Nikolay Potskeviç isə mədəniyyətin sərhədlərinin hüdudlarının olmadığını deyib. O, iki ölkə arasında körpü rolunu oynayan, möhkəmləşməkdə olan mədəni əlaqələrin gələcəkdə daha da sıx olacağına inandığını söyləyib. Bu il Belarusiyada uğurla keçirilən Azərbaycan mədəniyyət günlərinin xoş təəssüratlarından söhbət açan səfir ölkəmizdə də belə tədbirlərin keçirilməsi istəyini gizlətməyib: Bu yaxınlarda Azərbaycanda da Belarus mədəniyyət günlərinin keçirilməsi nəzərdə tutulub. Bu günlər çərçivəsində biz də öz mədəniyyətimizi, ənənələrimizi Azərbaycan xalqına daha yaxından tanıtmaq üçün bir-birindən maraqlı tədbirlər, kitab sərgiləri təşkil edəcəyik. Tədbirləri təkcə paytaxt Bakıda deyil, bölgələrdə də təşkil etməyi nəzərdə tutmuşuq. İnanıram ki, iki ölkənin müxtəlif sahələrdə çalışan kollektivləri bundan sonra daha da sıx əməkdaşlıqda olacaq.

İncəsənət Muzeyinin direktoru İsrafil İsrafilov iki ölkə arasında qarşılıqlı muzey işi sahəsində atılan ilk addımı yeni uğurların sağlam təməli adlandırıb. Belaruslu qonaq Vladimir İ.Prokoptsov imzalanan sazişin hər iki muzeyin gələcək inkişafında müstəsna rol oynayacağını deyib. O gələn il Belarusda Xalq rəssamı Tahir Salahovun yubileyinin keçirilməsinin planlaşdırıldığını diqqətə çatdırıb. Onun sözlərinə görə, gələn il Belarusda dahi Azərbaycan bəstəkarı Qara Qarayevin 90 illik yubileyi ilə bağlı tədbir keçiriləcək. Qarşılıqlı əməkdaşlıq nəticəsində hər iki ölkənin rəssamlarının əsərlərindən ibarət sərgilər təşkil olunacaq. Gələn il Bakıda müasir Belarus rəssamlarının əsərlərindən ibarət sərginin təşkil olunacağını deyən Vladimir İ.Prokoptsov imzalanan sazişi tək iki muzeyin əməkdaşlığı deyil, iki xalqı və dövləti bir-birinə daha möhkəm bağlayan bir bağ adlandırıb: Muzey işi ilə bağlı həll edəcəyimiz ortaq problemlərimiz, yeni işlərimiz çoxdur. Muzeylər incəsənət məbədidir.

Yeni Azərbaycan.- 2007.- 24 oktyabr.- S.8.