Oktyabrın
9-da Milli Məclisin Mədəniyyət
məsələləri daimi komissiyasının iclası
keçirildi. İclası açan komissiya sədrinin
müavini Rafael Hüseynov bildirdi ki, gündəliyə
çıxarılan məsələ "Tarix və
mədəniyyət abidələrinin qorunması
haqqında" qanunda dəyişiklik edilməsi barədə
layihənin müzakirəsidir. Dəyişikliyə
əsasən qanunun 22-ci maddəsi aşağıdakı
redaksiyada təklif olunur: "Xüsusi əhəmiyyət
kəsb edən arxeoloji, etnoqrafik, memarlıq,
şəhərsalma və digər komplekslər müvafiq icra
hakimiyyəti orqanı tərəfindən qoruq elan edilir".
Tarix və mədəniyyət abidələrinin hər bir
xalqın milli sərvəti olduğunu vurğulayan komissiya
sədrinin müavini Azərbaycanın belə
abidələrinin qorunmasının vacibliyindən söz
açdı. Bu günlərdə Avropa Şurası Parlament
Assambleyasının payız sessiyasından
qayıtdığını bildirən Rafael Hüseynov
işğal olunmuş Azərbaycan torpaqlarında bütün
tarix və mədəniyyət abidəlrinin erməni
qəsbkarları tərəfindən məhv edilməsi
barədə faktları parlamentarilərin diqqətinə
çatdırdığını dedi.
Komissiya üzvlərinin yekdil rəyi ilə qanun layihəsinin
Milli Məclisin plenar iclasının müzakirəsinə
çıxarılması tövsiyə olundu.
Azərbaycan.- 2007.- 10 oktyabr.- S. 2.