İçərişəhərin idarə edilməsi üzrə inteqrasiya olunmuş faaliyyət proqramının təqdimatı

Sentyabrın 27-də Muzey Mərkəzində İçərişəhərin idarə edilməsi üzrə inteqrasiya olunmuş fəaliyyət proqramının təqdimat mərasimi keçirildi. Tədbiri açan Mədəniyyət və Turizm naziri Əbülfəs Qarayev iştirakçıları Beynəlxalq turizm günü münasibətilə təbrik etdi.

O bildirdi ki, öikə başçısı İlham Əliyevin Fərmanı ilə İçərişəhərin idarə edilməsi üçün yeni struktur təsdiq olunmuşdur. Vaxtında qəbul edilmiş bu qərar qədim şəhərin taleyində müsbət dəyişikliklərə təkan vermişdir. 2000-ci ildə İçərişəhər ümumdünya mədəni irs abidələri siyahısına daxil edildikdən və 2002-ci ildə "Təhlükə altındadır" qrifli siyahıya düşəndən sonra bu işlərin görülməsinin həyati zərurət olması təsdiqləndi. 2003-cü ildə əsas müsabiqələr keçiriləndən sonra Azərbaycan hökuməti bu məsələnin həlli üçün Dünya Bankının rəhbərliyinə müraciət etdi. Əvvəlcə İçərişəhərin baş planı ilə bağlı işlərin görülməsi planlaşdırılırdı. Lakin elə həmin vaxt məlum oldu ki, baş planda bütün Bakı şəhərinin kommunikasiya, nəqliyyat əlaqələri və infrastrukturu nəzərə alınmayıb. Buna görə də baş planın bir hissəsini, İçərişəhərin menecment planının həyata keçirilməsi ideyası irəli sürüldü. Bu məqsədlə müsabiqə sənədlərinin hazırlanması üzrə məsləhətçi-mütəxəssis dəvət edildi. Müsabiqə keçiriləndən sonra Kembric Universitetinin komandası müəyyənləşdirildi. Komandaya Litvadan, Norveçdən, Polşadan, Birləşmiş Ştatlardan olan mütəxəssislər daxildir.

İlkin plana görə, işlər keçən ilin sonunda başa çatdırılmalı idi. Lakin vaxt ehtiyatı (yarım il) hazırlıq işlərinin müddətini bir qədər uzatmağa imkan verirdi. İçərişəhərin idarə edilməsi üçün rəhbərlik təyin olundu. Eyni zamanda, bütün əlaqədar qurumlar bu işə cəlb edildi, əks halda, menecment planının işlənib hazırlanması mümkün olmazdı.

Tədqimat mərasimində Nazirlər Kabineti yanında "İçərişəhər" Tarix-Memarlıq Qoruğu İdarəsinin rəisi Kamran İmanov, layihənin əlaqələndiricisi Rüstəm Muxtarov, Dünya Bankının nümayəndəsi və layihənin müəllifləri çıxış etdilər.

Kino+.- 2007.- 3 oktyabr.- S. 3.