Mehmanxanaların sayı 18%, turistlərin sayı isə 4,4% artıb

Bu ilin birinci yarısında Azərbaycanda fəaliyyət göstərən mehmanxana və mehmanxana tipli müəssisələrin sayı 47 vahid və ya 18% artaraq 308-ə çatıb. Dövlət Statistika Komitəsindən "APA-Economics"ə verilən məlumata görə, hesabat dövründə mehmanxana və mehmanxana tipli müəssisələrin 64-ü Bakı şəhərində, 10-u Abşeron iqtisadi rayonunda, 28-i Gəncə-Qazax, 34-ü Şəki-Zaqatala, 48-i Lənkəran, 47-si Quba-Xaçmaz, 32-si Aran, 1-i Yuxarı-Qarabağ, 22-si Dağlıq-Şirvan, 22-si isə Naxçıvan iqtisadi rayonunda fəaliyyət göstərib. Təhlil olunan dövrdə mehmanxana və mehmanxana tipli müəssisələrdə əvvəlki ilin eyni dövrü ilə müqayisədə 4,4% çox, yəni 120 min şəxs yerləşdirilib. Həmin şəxslərin 58,8%-i xüsusi, 18,8%-i dövlət, 15,9% xarici, 6,5%-i isə birgə mülkiyyətə məxsus müəssisələrdə yerləşdirilib.

Yerləşdirilən şəxslərin 55,1 %-ni ölkə vətəndaşları, 44,9%-ni əcnəbilər təşkil edib. Onların 44,6%-i işgüzar səfərə, 40,8%-i istirahət və əyləncə, 2,7%-i müalicə, 11,9% digər məqsədlərlə gəliblər. Yerləşdirilən şəxslərin ümumi sayından 12,5% yollayışla gələn vətəndaşlar təşkil edib.

Mehmanxana və mehmanxana tipli müəssisələrdə yaşayış müddətinə görə yerləşdirilən turistlərin 80,6%-i 1-3 gün, 12,8%-i 4-7 gün, 5,9%-i 8-28 gün, 0,7%-i isə bir aydan çox yaşayıblar. Qeyd edək ki, 1-3 gün yaşayış müddətinə görə yerləşdirilən turistlərin 40%-ni xarici ölkələrdən olan vətəndaşlar təşkil edib.

Komitədən bildirilib ki, mehmanxana və mehmanxana tipli müəssisələrdə 53 858 nəfər xarici ölkə vətəndaşı yaşayıb. Onların 13,8%-i Türkiyə, 13,6%-i Rusiya, 11,4%-i Birləşmiş Krallıq, 10,1%-i İran, 7%-i Çin, 5,9%-i Gürcüstan, 5,4%-i Ukrayna, 4,5%-i ABŞ, 2,4%-i İtaliya, 2,2%-i Almaniya, 2%-i Fillipin, 1,7%-i Fransa, 1,1%-i Lüksemburq, 18,9%-i isə digər ölkələrdən gələn vətəndaşlar olub.

Qeyd edək ki, ötən ilin eyni dövrü ilə müqayisədə 2007-ci ilin 6 ayında mehmanxana və mehmanxana tipli müəssisələrin fəaliyyətindən əldə edilən gəlir 18,8% artaraq 41,7 mln. manat təşkil edib. Həmçinin, mehmanxana və mehmanxana tipli müəssisələrin istismar xərcləri əvvəlki ilin eyni dövrü ilə müqayisədə 10,1% artaraq 26,6 mln. manata çatıb.

Kaspi.- 2007.- 26 oktyabr.- S.12.