Orucov E.

Azərbaycanda rəssamlığın inkişafına dövlət qayğısı artmaqdadır

Azərbaycan mədəniyyəti yeni yüksəliş dövrünü yaşayır. Milli mənəvi dəyərlərimizin qorunmasına və bərpasına dövlət qayğısının artması, möhtərəm Prezidentimiz İlham Əliyevin bir-birinin ardınca kino, teatr, muzey işi, kitabxana işi və s. ilə bağlı imzaladığı sərəncamlar onu göstərir ki, ölkəmizdə mədəniyyət sahəsində islahatlar sürətlə davam etməkdədir. Milli mədəniyyətimizin hamisi, ümummilli lider Heydər Əliyevin bu sahədə başladığı islahat bu gün möhtərəm Prezidentimiz İlham Əliyev tərəfindən layiqincə davam etdirilir.
Cənab İlham Əliyevin Prezident seçildiyi 4 il ərzində Azərbaycanın mədəni mühitində əsaslı yeniləşmə aydın nəzərə çarpmaqdadır. Dünya mədəniyyətinə inteqrasiya şəraitində zənginləşən Azərbaycan mədəniyyəti milli ənənələrindən bəhrələnərək, cəmiyyətin mənəvi həyatında daha mühüm amilə çevrilməkdədir. 2003-cü ildən sonra mədəniyyətin bütün sahələrində, teatrda, musiqidə, kinoda və s. inkişaf meylləri güclənməyə başladı. Xalqın mənəvi dəyərlərinin gələcək nəsillərə çatdırılması yolunda mühüm nailiyyətlər qazanıldı. Bu günlər bərpa edilərək yenidən istifadəyə verilən tarixi mədəniyyət abidələrimiz bir daha təsdiq edir ki, Azərbaycan dövlətinin rəhbəri tariximizin mədəniyyət nümunələrinin gələcək nəsillərə çatdırılmasında çox maraqlıdır və bunun üçün cənab Prezident heç nəyi əsirgəmir. Təsəvvür edin, cənab Prezident tariximizin yaddaşı olan İçərişəhərin qorunması üçün nə qədər sərəncamlar imzalamışdır. Eyni zamanda əyalətlərimizdəki abidələr necə gözəl bərpa olunur.
Mən rəssamam. Səttar Bəhlulzadə adına Sərgi salonuna rəhbərlik edirəm. Bu salonda demək olar ki, ölkəmizdə keçirilən bütün tədbirlərə uyğun sərgilər keçirilir. Bu salon ulu öndərin bizə yadigar qoyub getdiyi əsl sənət ocağıdır.
Azərbaycanda rəssamlıq sənətinin çox qədim ənənələri var. Mən tarixi varaqlamaq fikrində deyiləm. Təkcə son illər milli rəssamlığımızın inkişafından bəzi məqamları diqqətə çatdırmaq istəyirəm. Bu yaxınlarda Azərbaycan Rəssamlar İttifaqının 65 illik yubileyi keçirildi. Ölkəmizin başçısı Azərbaycan Dövlət İncəsənət Muzeyində bu münasibətlə tanınmış Azərbaycan rəssamları ilə görüşdü. Doğrudan da bu görüş bir daha təsdiq etdi ki, ölkəmizdə rəssamlara, sənət adamlarına nə qədər diqqət və qayğı var. Məni sevindirən budur ki, möhtərəm Prezidentimiz hansı sahənin nümayəndələri ilə görüşürsə, o sahədə çox ciddi bir irəliləyiş başlayır, hansısa bir yenilik yaranır. Bu dəfə isə cənab Prezident rəssamlarla görüşdə Müasir İncəsənət Muzeyinin tikildiyini və onun rəssamlıq sənətinin təbliğində çox əhəmiyyətli rol oynayacağını da söylədi. Biz rəssamlara dövlət rəhbərimizin Azərbaycan rəssamlığını yüksək qiymətləndirməsi, onun inkişafına dəstək verməsi mənəvi güc verir. Cənab Prezident rəssamlarla görüşündə demişdir: “Azərbaycan incəsənəti, rəssamlıq məktəbi çox zəngindir, çox dərin köklərə əsaslanır və eyni zamanda indi artıq gənc nəsil də öz yerini tutmaqdadır. Bu da çox vacibdir. Yəni bu əlaqələr qırılmır, bu gözəl ənənələr davam edir”.
Doğrudan da, Azərbaycanda yeni nəsil rəssamlar yetişməkdədir və onlar klassik Azərbaycan rəssamlığının ənənələrini çox uğurla davam etdirirlər.
Söz yox ki, cənab Prezidentin mədəniyyətimizin inkişafı ilə bağlı sərəncamlarının yerinə yetirilməsində mədəniyyət və turizm naziri Əbülfəs Qarayevin xidmətlərini də qeyd etmək lazımdır. Bu gün mədəniyyətimizlə bağlı elə bir tədbir yoxdur ki, Əbülfəs müəllim orada iştirak etməsin. Mədəniyyət və Turizm Nazirliyi bütövlükdə ölkədə mədəni sərvətlərin qorunması və yeni nəsillərə çatdırılmasında, ölkənin mədəni həyatının daha da zənginləşməsində çox əhəmiyyətli rol oynayır. O cümlədən rəssamların əsərlərinin sərgilərinin keçirilməsində də Rəssamlar İttifaqı ilə birgə məhsuldar iş aparır. Azərbaycan rəssamlarının əsərləri bu gün nəinki bizim eləcə də dünyanın bir sıra ölkələrinin nüfuzlu sərgi salonunda sərgilənir. Azərbaycan rəssamlarının əsərləri dünyanın məşhur muzeylərinin eksponatlarına çevrilmişdir. Cənab Prezidentimiz məhz bunları nəzərə alaraq demişdir: “Azərbaycan rəssamları bu gün, doğrudan da, çox böyük beynəlxalq şöhrət qazanmışdır. Bu çox sevindirici haldır və onu göstərir ki, Azərbaycan hərtərəfli inkişaf edir”.
Son vaxtlar mən dəfələrlə Azərbaycan rəssamlarının dünyanın müxtəlif ölkələrində keçirilən sərgilərinin iştirakçısı olmuşam. Və hiss etmişəm ki, bizim ölkəyə, onun rəssamlığına böyük həvəs və maraq var. Bu da təsadüfi deyil. Ölkəmizin beynəlxalq aləmdə nüfuzu ildən-ilə artmaqdadır. Möhtərəm Prezidentimizin yeritdiyi çox düzgün xarici siyasət nəticəsində Azərbaycan sülhsevər, mütərəqqi, inkişaf etməkdə olan ölkə kimi tanınır.
Dövlət rəhbərimizin Azərbaycan rəssamlarının sosial vəziyyətinin inkişafına göstərdiyi diqqət və qayğı barədə də öz fikirlərimi bildirmək istəyirəm. Açığını deyim ki, bir vaxtlar Azərbaycan rəssamları ölkədən baş götürüb gedirdilər. Çünki, burada onların həyat şəraiti, doğrudan da, dözülməz idi. Adi emalatxanalarını təmir etməyə, rənglər almağa belə imkanları çatmırdı. Ulu öndər Heydər Əliyev xüsusi sərəncamla rəssamlara öz emalatxanalarını özəlləşdirmək imkanı yaratdı. Bu çox mühüm əhəmiyyətə malik bir qərar idi. Sonra rəssamlarımıza ardıcıl olaraq Prezident təqaüdləri verildi. Bu gün də həmin təqaüdlərin verilməsi ənənəsi davam etdirilir. Cənab İlham Əliyev rəssamlarla görüşündə bildirib ki, “rəssamları, heykəltəraşları narahat edən, maraqlandıran məsələlərdən biri də emalatxana ilə təminatdır. Əlbəttə ki, emalatxanalar olmalıdır və olacaqdır”. Ancaq möhtərəm Prezidentimiz burada da rəssamların rəyini vacib sayır. “İlk növbədə, istər onun yeri, istərsə də dizaynı baxımından sizin də rəyiniz nəzərə alınmalıdır”. Cənab Prezident bu emalatxanaların yaradıcılıq mərkəzi olmasını, orada görüşlər, konfranslar keçirilməsini, istirahət üçün şəraiti olmasını da vacib şərt sayır. Belə emalatxanaların tikiləcəyi artıq reallaşmaq üzrədir. Bu, Azərbaycan rəssamlarının, yaradıcılıq imkanlarının daha da genişlənməsinə şərait yaradacaqdır.
Mən, rəssamlarımızın əsərlərinin təbliğ olunduğu muzeylərimizdə aparılan təmir-bərpa işlərini də Prezidentimizin qayğısının nəticəsi kimi qiymətləndirirəm. Və inanıram ki, yaxın gələcəkdə bütün muzeylərimiz müasirləşəcək, onların eksponatlarının təbliği üçün daha geniş imkan yaradılacaq.
Möhtərəm Prezidentimizin ötən dörd ildə həyata keçirdiyi möhtəşəm inkişaf proqramları mədəniyyətin, incəsənətin də sürətli tərəqqisinə köməklik göstərib. Bu inkişaf, bu tərəqqi biz rəssamların əsərlərində də görünür və yəqin ki, bundan sonra da Azərbaycanda baş verən yeniliklər yeni rəsm əsərlərinin baş mövzusu olacaqdır.

Xalq qəzeti.- 2007.- 20 oktyabr.- S.7.