Xalq rəssamı Kamil Əliyev - naxışlarda əbədiləşən ömür

“Həqiqətən Kamil Əliyev Azərbaycanda rəssamlıq məktəbinin çox görkəmli bir nümayəndəsidir. Xüsusən, rəssamlıq sənətinin çox çətin bir sahəsi olan xalçaçılıq-rəssamlıq sənətinin böyük bir rəssamıdır... Onun əsərləri də Azərbaycan xalçaçılıq sənətində, rəssamlıq məktəbində daim yaşayacaqlar və çox görkəmli əsərlər kimi Azərbaycan mədəniyyəti xəzinəsində öz yerlərini tutacaqlar”. Bu sözləri Azərbaycan xalqının ümummilli lideri, mədəniyyətimizin hamisi Heydər Əliyev demişdir.
Oktyabrın 26-da Azərbaycan xalçaçılıq sənətinin klassiki, rənglər və ilmələr sehrkarı Kamil Əliyevin vaxtilə yaşadığı evin qarşısında xatirə lövhəsi və ev muzeyi açılmışdır. Xatirə lövhəsində bu sözlər yazılmışdır: “Azərbaycanın xalq rəssamı, professor Kamil Əliyev bu evdə yaşamışdır 1921–2005".
Tədbirdə dövlət və mədəniyyət xadimləri, ictimaiyyət və KİV nümayəndələri iştirak etmişlər. Mədəniyyət və turizm naziri Əbülfəs Qarayev lövhənin ağ örtüyünü götürdükdən sonra, lövhənin qarşısına tər qərənfillər düzülmüşdür.
Bu münasibətlə keçirilən tədbiri giriş sözü ilə Əbülfəs Qarayev açaraq Kamil Əliyev sənətindən, onun yaratdığı nadir incilərdən danışmışdır. O bildirmişdir ki, Azərbaycanın misilsiz maddi-mənəvi dəyərlərini yaradan, səsi-sorağı dünyanın bir şox ölkələrinin muzey, qalereya, sərgi salonlarından, şəxsi kolleksiyalardan gələn bu istedadlı sənətkarın irsi bu günlərdə olduğu kimi, gələcək nəsillər üçün də əvəzsiz örnəkdir.
Mərasimdə çıxış edən Rəssamlar İttifaqının sədri, xalq rəssamı Fərhad Xəlilov, Rəssamlıq Akademiyasının rektoru, xalq rəssamı Ömər Eldarov, sənətşünas alim Kübra Əliyeva Azərbaycan xalçaçılıq sənətində öz üslubunu yaratmış sənətkarın hələ sağlığında dünya şöhrəti qazandığını söyləmişlər. Onun yaratdığı “Nizami”, “Füzuli”, “Nəsimi”, “Atatürk”, “Heydər Əliyev”, “İlham Əliyev”, “Mir Möhsün ağa”, “A.S.Puşkin”, “İndira Qandi”, “Rabindranat Taqor”, “Mənim anam” və digər onlarla görkəmli şəxsiyyətlərin portretləri və milli ornamentlər nəqş olunmuş xalçalar bütün dünyanı heyrətə gətirmişdir.
Mərasim iştirakçıları xalçaçı-rəssamın ev muzeyini gəzmiş, sənətkarın öz əlləri ilə yaratdığı rənglərin poeziyasını, ilmələrin dastanını vərəq-vərəq oxumuş, işığın, zövqün əbədi harmoniyasına tamaşa etmiş, füsunkar əlvanlığa heyran qalmışlar.
Mərasimdə “Kamil Əliyev sənət kəhkəşanının parlaq ulduzudur” deyən sənətşünas alim Esmira Fuadın “Azərbaycan xalça sənətinin Kamili” kitabının təqdimatı olmuşdur.
Xatirə lövhəsinin və ev muzeyinin açılış mərasiminə toplaşanlar Kamil Əliyev dünyasından xoş təəssüratla ayrılmışlar.

Xalq qəzeti.- 2007.- 27 oktyabr.- S.5.