Abşeronun 40 qrafik kompozisiyası

“Abşeron” Rəsm Qalereyasında tanınmış qrafika ustası mərhum Sara Manafovanın xatirəsinə həsr olunmuş sərgi təşkil olunub

“Abşeron” Rəsm Qalereyasının kolleksiyasından 40 qrafik kompozisiya” adlı sərgidə 37 nəfər qrafika ustasının əsərləri sənətsevərlərə təqdim edilir. Onların arasında dünyalarını dəyişmiş sənət adamlarının, qocaman xalq rəssamlarının, eləcə də orta nəslə mənsub sənətkarlarımızın sənət nümunələri yer alıb. Bu mənada ekspozisiyada maraqlı əsərlər çoxdur. Altay Hacıyevin “Leyli və Məcnun”u, Siruz Mirzəzadənin “Füzulinin portreti”, Qəyyur Yunusun “Məcnun”u, Sara Manafovanın güllər əks olunmuş, pastellə işlənmiş qrafik kompozisiyaları tamaşaçını valeh edir. Qeyd edək ki, Sara xanım dünyasını bu yaxınlarda dəyişib. Baba Əliyevi hamı rəngkarlıq ustası kimi tanıyır. Onun quaşla işlənmiş “Məhsul bayramı” qrafika nümunəsi olsa da, əsasən rəngkarlıq elementləri çoxdur. Əlisəttar Səlimov Azərbaycanın sulu boya ilə işləyən ən mükəmməl rəssamıdır. Onun “Kənd həyatı” və “Müqəddəs işıq” kompozisiyaları sulu boya texnikasının parlaq nümunələridir.
”Abşeron” Rəsm Qalereyasının direktoru Eldəniz İbrahimovun sözlərinə görə, bu sərginin məqsədi heç də qrafika sənətimizin bugünkü vəziyyətini əks etdirmək deyil. Tanınmış qrafika ustası mərhum Sara Manafovanın xatirəsinə həsr olunmuş bu sərginin əsas məqsədi - bədii qrafikanın, Azərbaycan təsviri sənətinin geniş imkanlarını nümayiş etdirməkdir. Ekspozisiya tərtib olunarkən motiv, məzmun, texnika, həcm, rəngarənglik əsas götürülüb. Bu əsərlərin hamısı heç də şah əsərlər deyil. Lakin kompozisiyalar bir-birini gözəl tamamlayır və qrafika ustalarımızın geniş imkanları haqqında mükəmməl təsəvvür yaradır”. O, sərginin tanınmış qrafika ustası Sara Manafovaya həsr olunmasını isə belə əsaslandırdı: “Sara xanım ölkəmizdə ilk özəl qalereyanın təşkilini arzulayan rəssamlarımızdan biri olub. Elə “Abşeron”un ərsəyə gəlməsində də onun xidmətləri çoxdur”. Həmsöhbətimiz yeni yaradıçılıq planları haqqında da söz açdı: “Bir neçə il öncə “Abşeron” Rəsm Qalereyası kolleksiyasından 40 tablo” adlı sərgi keçirmiş və eyniadlı kataloq dərc etdirmişik. Bu dəfə sıra qrafika əsərlərinə düşdü. Növbədə isə hələ heykəltəraşlıq və tətbiqi sənət nümunələri durur. Axı “Abşeron” Rəsm Qalereyasının kolleksiyası Azərbaycanda ən böyük kolleksiyalardan biridir”.

Zaman.- 2007.- 18-19 oktyabr.- S.8.