Əliyev Ə.

Fəxriyyə Xələfovanın modaları fransızları heyrətə salmışdır

"Ethical Fachion show" firmasının təşəbbüsü ilə oktyabrın 10-dan 14-dək Parisin 10-cu rayonunun "Qırmızı xalça" sərgi salonunda dünyanın 100-dən artıq ölkəsinin 400 modelyerinin kolleksiyalarının sərgisi və nümayişi keçirilmişdir. Belə böyük tədbirdə Azərbaycanı tanınmış modelyer, əməkdar incəsənət xadimi Fəxriyyə Xələfova təmsil etmişdir.
Oktyabrın 12-də Norveç, Azərbaycan və Braziliya modelyerlərinin kolleksiyalarının nümayişi olmuşdur. F.Xələfovanın hazırladığı geyimlər ölkəmizin təbiətini və görməli yerlərini əks etdirən qısametrajlı filmin müşayiəti ilə nümayiş etdirilmişdir. Azərbaycanın tarixi abidələrinin rənginə uyğun hazırlanmış yeni modalar fransız tamaşaçıların hədsiz marağına səbəb olmuşdur. Onlar milli koloritli modaların ilk dəfə Parisdə nümayiş etdirilməsini böyük razılıq hissi ilə qarşılamışlar.
Fransalı tamaşaçı Sesil Bone Azərbaycan modalarından aldığı təəssüratı belə ifadə etmişdir: "İlk dəfədir ki, azərbaycanlı modelyerin kolleksiyası ilə tanış oldum. Norveç və Braziliya dizaynerlərindən fərqli olaraq, milli koloritdən istifadə, rənglərin seçimi, moda duyumu azərbaycanlı modelyerin zəngin təcrübəsindən, müasir moda ilə ayaqlaşmasından xəbər verir. Açığını deyim ki, modaya hədsiz tələbkar olan fransız tamaşaçılar belə yüksək zövqlə və zərif formada hazırlanmış kolleksiyanın nümayiş etdiriləcəyini gözləmirdilər. Arzu edərdim ki, azərbaycanlı modelyerin hazırladığı belə geyimlərin Fransada satışı təşkil edilsin".
Modaların nümayişi başa çatdıqdan sonra onlarca tamaşaçı F.Xələfovaya yaxınlaşaraq, belə gözəl modalar hazırladığı üçün ona təşəkkür etmişlər.
Tanınmış modelyer sərgi ilə bağlı AzərTAc-ın xüsusi müxbirinə məxsusi müsahibəsində demişdir: Etiraf edim ki, kolleksiyamın sərgisi və nümayişi ilə bağlı Fransadan dəvət alarkən bir qədər həyəcan keçirdim. Çünki dünyanın mədəniyyət və modalar mərkəzi hesab edilən Parisdə çıxış etmək hər bir modelyerə qismət olmur. Digər tərəfdən, modalara hədsiz maraq göstərən fransız tamaşaçılarını razı salmaq, onların rəğbətini qazanmaq çox çətindir.
Amma bunlara baxmayaraq, dəvəti böyük sevinc hissi ilə qarşıladım və mənim üçün bir növ sınaq olan bu mühüm tədbirə ciddi hazırlaşdım.
Tədbirin ideya mahiyyəti çox maraqlı, peşəkar ünsiyyət yaratmaq baxımından dəyərli olmaqla yanaşı, müxtəlif ölkələrə məxsus nadir əl işləri ilə yaxından tanışlığa görə mühüm əhəmiyyət daşıyırdı.
Sevinirəm ki, çoxdankı arzum reallaşdı və mənim hazırladığım 13 yeni modadan ibarət kolleksiyam fransız tamaşaçılar tərəfindən yüksək qiymətləndirildi.
Modanın nümayişi ölkə barədə də tamaşaçılara dolğun məlumat verir. Ona görə də mən özümlə bərabər ölkəmizin tarixini, zəngin mədəniyyətini, abidələrini, təbiətini əks etdirən broşür və şəkillər gətirmişdim. Onları sərgi zamanı tamaşaçılara təqdim etdim. Açığını deyim ki, fransızlar moda ilə bərabər, ölkəmizə xüsusi maraq göstərir və müxtəlif suallarla müraciət edirdilər. Əlbəttə, biz onların hər bir sualına ətraflı cavab verirdik.
Ümumiyyətlə, sərgi və kolleksiyamın nümayişinin uğur qazanması məni hədsiz sevindirir və yeni yaradıcılığa ruhlandırır.

Azərbaycan.- 2007.- 17 oktyabr.- S.7.