Fəxriyyə Xələfova Ethical Fashion Show - 2007 moda tədbirində iştirak edib

Fransanın paytaxtı Paris şəhərində mövsümün ən parlaq hadisəsi olan “Ethical Fashion Show - 2007” moda tədbiri keçirilib. Tədbirdə Azərbaycanı tanınmış modelyer, əməkdar incəsənət xadimi Fəxriyyə Xələfova təmsil edib. F.Xələfovanın APA-ya verdiyi məlumata görə, layihə kimi həyata keçirilən bu tədbirdə moda sənayesinin müxtəlif istiqamətləri və peşəkar mütəxəssislərin yaradıcılığı təqdim olunub. 4 günlük moda tədbirində “Qırmızı xalça” sərgi salonunda dünyanın 100-dən artıq ölkəsinin 400-ə qədər firma, geyim, ayaqqabı və aksessuarların istehsalçılarının, modelyerlərin kolleksiyalarının nümayişi və sərgi stendləri təşkil olunub. F.Xələfovanın sözlərinə görə, bu tədbirə təqdim etdiyi geyim kolleksiyası öz rəngarəngliyi, fantaziya zənginliyi, şərq və qərb ideallarının orijinal şəkildə vəhdətini ifadə etməsi ilə fərqlənərək qonaqları heyrətləndirib.

İki sahil.- 2007.- 26 oktyabr.- S. 6.