Cavad xanın cəkilisləri basa catıb

Film yanvarın sonunda təhvil veriləcək

Azərbaycan kinosunda daha bir önəmli hadisə reallaşdı. lctimaiyyətin uzun müddətdən bəri gözlədiyi "Cavad xan" filmi nəhayət ki, təqdim olundu. Filmin yaradıcı heyəti filmin çəkilişlərinin çox uğurla başa çatdığı haqqında açıqlama verdi.

Bu əlamətdar hadisə ilə əlaqədar geniş mərasim düzənləndi.

Mərasimdə "Cavad xan" filminin ssenari müəllifi, Xalq şairi Sabir Rüstəmxanlı, quruluşçu rejissor Rövşən Almuradlı, quruluşçu operator Məhəmməd Məcidi, baş rolun ifaçısı, Xalq artisti Nurəddin Mehdixanlı (Cavad xan), Xalq artisti Ramiz Novruz (Sisyanov), quruluşçu rəssam Rafiq Nəsirov, rejissorlar Ənvər Həsənov və Əliqulu Səmədov, baş redaktor Aydın İbrahimov (Qurbanoğlu), "Bizim kino" prodüser mərkəzinin baş prodüseri Heydər Dadaşov, icraçı prodüser Tofiq Musayev çıxış edərək döyüş səhnələriylə zəngin olan, çətin quruluşa malik bir filmin qısa müddətdə çox uğurla başa çatması münasibəti ilə yaradıcı heyəti və Azərbaycan xalqını təbrik etdilər.

Azərbaycanın kino tarixində mövcud olan azsaylı tarixi filmlər içərisində "Cavad xan"ın xüsusilə seçiləcəyinə inandığını bildirən Sabir Rüstəmxanlı xalqımızın mübarizə və qürur simvollarından sayılan Cavad xana ucaldılan bu abidəni "müstəqilliyimizin mədəniyyətimizə bəxş etdiyi ən dəyərli hadisə" adlandırdı.

Quruluşçu rejissor Rövşən Almuradlı çəkilişlərdə göstərdikləri səmimiyyətə, fədakarlığa görə heyətə təşəkkür etdi və filmin növbəti mərhələsinin də çox uğurla başa çatacağı barədə kollektivi əmin etdi.

Yaradıcı heyətin ssenari müəllifindən işıqçısına, quruluşçu rejissorundan inzibatçısına qədər milli düşüncəli şəxslər olduğunu vurğulayan Cavad xan - Nurəddin Mehdixanlı isə filmin çəkilişlərindəki uğuru "bütün kollektivin Cavad xana sevgisi", "Vətənə məhəbbəti" ilə əlaqələndirdi: "Bizim kino" filmin uğurlu alınması üçün nə mümkündürsə, onu da elədi, bütün tələblərimizi vaxtında və yüksək səviyyədə yerinə yetirdi; quruluşçu rəssamlar sutkayla iş otağında çalışdılar ki, səhnə tərtibatı qüsursuz olsun; qrimyorlar bütün çəkiliş boyu aktyorlardan bir addım da ayrılmadılar, ayaqüstə saatlarla şəxsən müşahidə apardılar və bəlkə də Azərbaycan kinosunda yeganə hal idi ki, onlar özləri aktyorlara yaxınlaşır, qrimin azacıq pozulmasına razı olmurdular; aktyorlar aldığı zədələrə baxmayaraq bütün trukları yerinə yetirmək üçün gecə yatmadan məşq edirdilər... Nəticədə sevgidən yoğrulan Cavad xan obrazını əbədiləşdirməyə müvəffəq olduq".

Xatırladaq ki, Azərbaycan kinosu tarixində ilk dəfə olaraq kompüter qrafikasından istifadə edilən "Cavad xan" filminin 2008-ci il yanvarın sonunda təhvil verilməsi nəzərdə tutulur. Hazırda filmin istehsalında yekun mərhələyə - montaj və səsləndirilmə mərhələsinə hazırlıq görülür.

Şərq.- 2007.- 3 oktyabr.- S. 14.