Həmidə Ömərova son illər çəkilən filmləri izləmir

"Elə filmlər olub ki, çəkilmək istəmişəm, amma məni dəvət etməyiblər"

Uzun illərdir ki, Azərbaycan kinosuna həm aktrisa, həm də kino tənqidçisi kimi xidmət etmiş, "Anla məni" (Oqtay Mirqasımov), "Qızıl uçurum" (Fikrət Əliyev), "Qorxma, mən səninləyəm" (Yuli Qusman) kimi bir çox filmlərdə çəkilmiş və tamaşaçıların sevimlisinə çevrilən, eyni zamanda "Retro" verilişinin aparıcısı kimi tanınan kinoşünas, xalq artisti Həmidə Ömərova son illər aktrisalıq fəaliyyətinə ara versə də, kinoşünas kimi fəaliyyətini davam etdirməkdədir. Belə ki, aktrisa ANS TV-nin efirində yayımlanan "Orta gün" layihəsi ilə tamaşaçılara Azərbaycan kinosu barədə zəngin araşdırmalardan və təhlillərdən ibarət yeni bir veriliş təqdim etməkdədir. - Həmidə xanım, ANS-də yeni layihəyə başlamısınız. Xahiş edirik, layihə ilə bağlı bir qədər məlumat verərdiniz.
   - Bu, həftədə bir dəfə, hər şənbə günü ANS tamaşaçılarına təqdim etdiyimiz "Orta gün" layihəsidir. Burada əsas məqsəd unudulmuş, eyni zamanda yeni çəkilən, vaxtilə böyük tamaşaçı marağına səbəb olmuş filmləri, teletamaşalar, teatr tamaşaları barədə məlumat vermək, ümumiyyətlə, incəsənət aləmində və dünya kinosunda baş verən yenilikləri tamaşaçılara çatdırmaq, incəsənət xadimləri ilə görüşlər təşkil etməkdən ibarətdir. Layihənin önəmli tərəflərindən biri də odur ki, hər dəfə bir film və ya tamaşa barədə söhbət açmaqla həm filmdə, həm də çəkilişlərdə iştirak etmiş aktyorları, aktrisaları və rejissorları verilişə dəvət edirik.
   - Necə oldu ki, ANS-in bu layihə ilə bağlı təklifini dəyərləndirdiniz?
   - Bu təklifi alınca mən həmin telekanalda "Seans" verilişini aparırdım. Təklifi çox bəyəndim, ideya xoşuma gəldi və verilişin həm müəllifi, həm də aparıcısı olmağa razılıq verdim. Mən hər bir işi səviyyəli şəkildə görməyə çalışıram. Hazırda da bu layihənin tamaşaçılar üçün maraqlı olması və onların zövqünü oxşaması üçün əlimdən gələni edirəm. Düşünürəm ki, bu, kinomuzu yaşatmaq, eyni zamanda tamaşaçılarımızı belə bir filmlərin çəkiliş prosesi ilə yaxından tanış etmək üçün çox uğurlu bir layhədir.
   - Həmidə xanım, son illər filmlərə çəkilmirsiniz. Bu nə ilə bağlıdır?
   - Bu, təkcə məni yox, bütün Azərbaycan kinosunu əhatə edən bir məsələdir. Çünki son illər bizdə çox az sayda film istehsal olunub, təbii ki, bu filmlərdə məşhur aktyor və aktrisalar çəkilməlidir. Bəzən elə filmlər olub ki, çəkilmək istəmişəm, amma məni dəvət etməyiblər. Amma film hazır olduqdan və ona baxdıqdan sonra orada çəkilmədiyim üçün sevinmişəm. Hər bir aktyor filmə çəkilməyi arzulayır, amma əsas odur ki, sonradan peşman olmayasan.
   - Bəlkə həmin obrazları siz yaratsaydınız, dediyiniz filmlər daha uğurlu alınardı.
   - Yox, məncə bir filmin uğursuz alınması üçün yalnız bir aktyoru, yaxud rejissoru günahlandırmaq düzgün deyil. Çünki bu, kollektiv şəkildə hər kəsin əməyinin məhsuludur və filmin uğurlu, yaxud uğursuz alınmasında da hər kəsin öz rolu var.
   - Azərbaycanda son illər çəkilmiş filmlər barədə nə deyə bilərsiniz?
   - Əslində son illər çəkilən filmlərin demək olar ki, çoxuna baxmamışam. Yalnız festivallar çərçivəsində nümayiş olunan filmləri izləmişəm. Arzu edirəm ki, milli kinomuz həm keyfiyyət, həm də kəmiyyət baxımından daha da inkişaf etsin. Mənə elə gəlir ki, son 2-3 ildə Azərbaycanda maraqlı filmlər çəkilməkdədir. Artıq bu sahənin inkişafı üçün bir çox işlər görülür. Ümid edirəm ki, tezliklə tamaşaçılar da bizimlə birgə aparılan bu işlərin nəticəsini görəcəklər.
   - Yeni fəaliyyətə başlayan "BakıFilm" studiyasında da son günlər yeni serialların çəkilişinə başlanılıb. Ümumiyyətlə, seriallara münasibətiniz necədir?
   - Bu, məni çox sevindirir. Mən dəfələrlə mətbuatda da demişəm ki, seriallar mütləq lazımdır. Düzdür, bu sahə bizdə hələ tam inkişaf etmədiyi və hələ yeni yarandığı üçün bəzi qüsurlar var. Bir çoxları isə bunu qəbul edə bilmir. Məsələn, biz filmləri yeni dublyaj etməyə başlayanda tamaşaçılar buna alışa bilmirdi. Amma indi dublyaj olunmuş filmləri artıq hamı izləyir. Serial istehsalında da inkişaf əldə etmək üçün mütləq serialların çəkilməsi lazımdır. Dünya kinosunda da belə nümunələr çox olub: dramatik və faciəvi obrazlar yaradan bir aktyor birdən-birə bir serialda komik bir rola çəkilir və tamaşaçılar onun tam fərqli tərəflərini kəşf edirlər. Yəni aktyorun istedadını hərtərəfli açması üçün seriallar çox kömək olur. İnanıram ki, tezliklə Azərbaycanda da yüksək keyfiyyətli, baxımlı seriallar istehsal olunacaq.
   Bu da milli kinomuzun dirçəlməsində önəmlit rol oynaya bilər.

Üç nöqtə.- 2007.- 9 oktyabr.- S.13.