Arif Nərimanbəyovun 90 illiyinə həsr olunmuş xatirə gecəsi

Sentyabrın 28-də Muzey Mərkəzində kinematoqrafiyamızın ilk quruluşçu operatoru, əməkdar incəsənət xadimi Arif Nərimanbəyovun 90 illik yubileyi münasibətilə xatirə gecəsi keçirildi. Tədbiri Azərbaycan Dövlət Film Fondu təşkil etmişdi. Fondun direktoru Cəmil Quliyev gecəni açaraq söylədi ki, Moskva Kinematoqrafiya İnstitutunun tələbəsi olarkən aparıcı rejissorlardan Arif Nərimanbəyov haqqında çoxlu xoş söz eşidib. Onun çəkdiyi hər yeni film həm tamaşaçılar, həm də operatorun özü üçün nailiyyət idi.

Xatırladaq ki, A.Nərimanbəyovun ilk filmi "Fətəli xan" olmuşdur. Onun ardınca "Leyli və Məcnun", "Bizim Cəbiş müəllim" filmlərini çəkib. Arif Nərimanbəyovun Neft daşlarında keçirdiyi üç aydan Azərbaycan kinematoqrafına tarixi kadrlar yadigar qalıb. "Belə bir ada var" filmində operator qəhrəman neftçilərin həyatını dolğunluğu ilə əks etdirə bilib. Xatirə gecəsində A.Nərimanbəyovun dostları və yaxınları çıxış etdi, onun çəkdiyi filmlərdən parçalar, həyatının müxtəlif məqamlarını əks etdirən fotoşəkillər nümayiş etdirildi.

Kino+.- 2007.- 3 oktyabr.- S. 3.