Mükərrəmoğlu M.
Muzey
Mərkəzində əməkdar incəsənət xadimi,
milli kinomuzun inkişafında əvəzsiz xidmətləri
olan mərhum kinooperator Arif Nərimanbəyovun 90 yaşı
qeyd olundu. Dövlət Film Fondunun təşkil etdiyi bu tədbirə
Arif müəllimin yaxınları, görkəmli
kino xadimləri, mədəniyyətimizin müxtəlif
sahələrində çalışan
sənətkarlar toplaşmışdılar. Bu yazıda məqsəd tədbir barədə söhbət açmaq deyil, ömür-gününü
milli kinomuzun inkişafına həsr etmiş professional kinooperatorun
yaradıcı həyatına
nəzər salmaqdır.
Arif Nərimanbəyov 1917-ci ilin
sentyabr ayında Bakıda dünyaya göz açmışdı.
Uşaqlıqdan arıq və
çəlimsiz görkəmi
o qədər də diqqəti çəkmirdi.
Ancaq texnikaya çox həvəskar idi. Fotoqraflıq
onu çox cəlb edirdi.
Arif müəllimin çəkdiyi
fotolar oxuduğu orta məktəbin divarlarını bəzəyirdi
və onu elə fotoqraf deyə çağırardılar.
Gözəl rəssamlığı da var idi.
Çox
həssas uşaq idi.
Günlərin birində hansısa
bir filmə baxmışdı və yanında oturan tamaşaçı “nə
gözəl operator işi
var” — deyə filmə tərif vuranda, operator sözü onu çəkmişdi və sonradan bu sənət bütün həyatının
mənasına çevrilmişdi.
Arif Nərimanbəyov Ümumittifaq
Dövlət Kinematoqrafiya
İnstitutuna qəbul
olanda, artıq bu sənətin az-çox sirlərinə
bələd idi.
Belə ki, dəfələrlə
kinostudiyaya səfər
etmiş, çəkilişlərə
baxmışdı və
ona görə də ağı-qaradan seçmək, işıq,
kölgə münasibətlərini
müəyyənləşdirmək onun üçün bir o qədər də çətin deyildi. Amma institutda təhsil alanda hiss etdi ki, bu o qədər
də asan peşə deyil. Operatorun gərək güclü müşahidə qabiliyyəti
olsun, seçə bilsin rəngləri, rakursları müəyyənləşdirməyi
bacarsın.
Təhsil illərində böyük
rus kinooperatorlarının
təcrübəsini mənimsədi.
Sonra doğma Azərbaycana qayıdıb kinostudiyada işə düzəldi.
Yefim Dziqanın Zeynəb Kazımova ilə birgə çəkdiyi “Fətəli xan” filmində ikinci operator kimi fəaliyyətə başladı. Məşhur Əlisəttar Atakişiyevin
quruluşçu operator işlədiyi
bu film onun sənət taleyində çox güclü rol oynadı. Bir tərəfdən təcrübəli kinooperator
Əlisəttar Atakişiyevin,
digər tərəfdən
böyük aktyorların
— Ələsgər Ələkbərovun,
İsmayıl Əfəndiyevin,
Leyla Bədirbəylinin,
Mustafa Mərdanovun, Nəcibə
Məlikovanın, Möhsün
Sənaninin və digər sənətkarların
işlədikləri filmdə
operator kimi çalışmaq
əslində elə məktəb idi. O çox şeylərin fərqinə varmağa başladı. İlk növbədə müxtəlif rakurslardan çəkiliş apardı,
hadisələrin mahiyyətinə
uyğun vəziyyətlər
seçdi, bir sözlə, kameranın dilini öyrəndi, çəkiliş prosesinə
alışdı. Beləcə, “Fətəli xan” filmi ilə sənətdə ilk uğurlu
addımını atdı
və bundan sonra ona sərbəst
operator işləmək imkanı
yaradıldı.
1955-ci ildə kinorejissor Lətif Səfərov ona “Bəxtiyar” filmində quruluşçu operator kimi
işləməyi təklif
edəndə, həm ürəyincə olmuşdu,
həm də buna hazır idi. Bu filmdəki
romantik səhnələri
yəqin ki, görmüsünüz. Burada dənizlə
bağlı elə romantik səhnələr var ki, elə
bil onu kamera
yox, elə rəssam işləmişdir.
Çünki Arif müəllim
əslində elə rəssam idi. Gözəlliyi hansı rakursdan
ekrana gətirməyin
yollarını artıq
öyrənmişdi və
özü də təbiətən romantik bir sənətkar idi. O bəzən təbiətin sərt və şıltaq motivlərindən sakit epizodlara keçid edir, tamaşaçı bu motivlər arasında gərgin vəziyyətdə qalır.
Rəşid Behbudovun mahnıları
elə bil operatorun lentə köçürdüyü epizodları,
hadisələri tamamlayır.
Ümumiyyətlə, ağ-qara
plyonkada lentə alınmış bu film onun ilk uğurlu, yaradıcılıq müvəffəqiyyəti
idi.
“Qızmar günəş
altında”, “Bir qalanın sirri”, “Leyli və Məcnun”,
“Qaraca qız” və digər filmlərdə özünəməxsus
dəst-xətti ilə
seçilən gənc
kinooperatorun yaradıcılığı
getdikcə təkmilləşdi
və artıq aparıcı sənətkarlardan
birinə çevrildi.
1969-cu ildə Həsən Seyidbəyli “Bizim Cəbiş müəllim” filmində
operator işini Arif müəllimə həvalə
etdi. İndi üstündən 40 ilə yaxın bir vaxt keçməsinə
baxmayaraq bu film sevilə-sevilə baxılır.
Və filmin belə müvəffəqiyyətli alınmasında
söz yox ki, Arif müəllimin
də xüsusi payı vardır. O, Bakının, İçərişəhərin
küçələrini ekrana
ustalıqla gətirib.
Elə bilirsən ki, İçərişəhərdəsən
və sənə
Sonra “O qızı tapın” filmində quruluşçu
operator işlədi. Burada da
yüksək sənətkarlıqla
hadisələrin mahiyyətinə
uyğun çəkilişlər
aparılıb. “Həyat
bizi sınayır”, “Var olun qızlar”,
“Ömrün səhifələri”,
“Onun bəlalı sevgisi” kimi filmlərimizdə
onun istedadla lentə köçürdüyü
kadrlar bu gün də yaşayır. Və bu gün tamaşaçılar “ekranda
görünməyən” bu
böyük sənətkarın
filmlərini hörmət
və məhəbbətlə
xatırlayırlar. “Nizami” filmində isə o daha maraqlı tarixi hadisələri lentə köçürüb.
Arif müəllim 1986-cı ildə
“17 yaşlı oğlan”
adlı filmdə son dəfə quruluşçu
rejissor kimi işlədi. 1992-ci ildə isə uzun sürən xəstəlikdən sonra dünyasını dəyişdi.
Onun yaradıcılığı
dövlətimiz tərəfindən
yüksək qiymətləndirilmiş,
“Əməkdar incəsənət
xadimi” fəxri adına layiq
görülmüşdür. Dəfələrlə Arif Nərimanbəyovun
filmləri Ümummittifaq
festivallarda mükafatlar
almışdır.
Heç
şübhəsiz ki,
bu böyük sənətkarın xatirəsi
xalqımızın yaddaşında
əbədi qalacaqdır.
Xalq qəzeti.- 2007.- 16 oktyabr.- S. 6.