Naxçıvan Dövlət Universiteti Konservatoriyasının binasının açılış mərasimi

AzərTAc-ın müxbiri xəbər verir ki, oktyabrın 17-də Naxçıvan Dövlət Universiteti Konservatoriyasının binasının açılış mərasimi olmuşdur. Azərbaycan Prezidenti İlham Əliyev mərasimdə iştirak etmişdir.
Mərasimə toplaşanlar dövlətimizin başçısını hərarətlə qarşıladılar.
Prezident İlham Əliyev rəmzi açılışı bildirən lenti kəsdi və bina ilə tanış oldu. Məlumat verildi ki, bina "Gəmiqaya" Məhdud Məsuliyyətli Cəmiyyət tərəfindən inşa olunmuşdur. Prezident İlham Əliyevin Naxçıvan Dövlət Universitetinin 40 illik yubileyinin qeyd olunması haqqında 2007-ci il 31 mart tarixli sərəncamına əsasən tikilmiş binada 400 nəfər tələbənin təhsil alması üçün imkan vardır. Hazırda isə burada 221 tələbə təhsil alır. Burada 240 yerlik tamaşa salonu, ayrı-ayrı ixtisaslar üzrə sinif otaqları vardır. Tələbələr 5 fakültədə 9 ixtisas üzrə təhsil alırlar. Naxçıvan Dövlət Universitetində incəsənət fakültəsi 1998-ci ildən fəaliyyət göstərir.
Prezident İlham Əliyev ayrı-ayrı sinif otaqları ilə, burada yaradılan şəraitlə tanış oldu.
Sonra tamaşa salonunda rəsmi açılış mərasimi keçirildi.
Mərasimi muxtar respublika Ali Məclisinin sədri Vasif Talıbov açdı.

Azərbaycan.- 2007.- 18 oktyabr.-S.2-3.