Salmanov R.

Bahar nəfəsli nəğmələr

Ürəyəyatımlı şirin səsi, səhnə mədəniyyəti və digər ifaçılıq məziyyətləri ilə böyük tamaşaçı auditoriyasının dərin rəğbətini qazanmış “Şərq təranələri” beynəlxalq muğam festivalının “Qran pri” mükafatçısı, respublikanın əməkdar artisti Simarə İmanovanın professional səhnəyə gəlişinin 10 ili tamam olur.
Qəlbi yaradıcılıq eşqi ilə döyünən gənc xanəndə qız üçün on il, ola bilsin ki, çox da böyük zaman deyil. Lakin bu illər ərzində onun Azərbaycan incəsənətinin, klassik muğam nümunələrimizin təbliği sahəsində gördüyü işlərin, qazandığı uğurların dəyərini də inkar etmək olmaz. Keçdiyi ömür yolunda ən çox 1997-ci ilə önəm verən Simarə İmanova bütün yaradıcılıq uğurlarının bünövrəsinin məhz bu ildə qoyulduğunu və bu nailiyyətlərə görə ilk növbədə ulu öndər, ümummilli lider Heydər Əliyevə borclu olduğunu deyir. Məhz ulu öndərin Simarə İmanova yaradıcılığına verdiyi yüksək qiymət, göstərdiyi etimad gənc xanəndə qızın yaradıcılığında əsaslı dönüş yaradaraq, demək olar ki, sənət uğurlarının təməlini qoyub...
Simarə İmanova 1976-cı ilin qarlı, tufanlı bir qış gecəsi İmişli rayonunun Əliqullar kəndində dünyaya göz açıb. Son 30-40 ildə bu qədər qar yağdığını xatırlamayan kənd ağsaqqalları, qohum-əqrəba qızın özüylə el-obaya ruzi-bərəkət gətirdiyini söyləyərək ailəsinə gözaydınlığı verirlər. Erkən yaşlarından qızının musiqiyə həvəsini görən anası Minəbəyim qızına “baban Məhəmmədə çəkmisən” — deyir. Məhəmməd bəy Qarabağın tanınmış bəylərindən olub. Gözəl səsi və tar çalmağı olduğundan dövrün tanınmış xanəndə və sazəndələri tez-tez onun evinə yığışar, şeir, musiqi məclisləri keçirərlərmiş.
Aylar, illər ötdükcə qızcığaz məlahətli, şirin səsiylə hamının diqqətini özünə çəkir. Məktəbin əksər tədbirlərində çıxış edir. Oxuduğu hər bir mahnı müəllim və şagirdlər tərəfindən rəğbətlə qarşılanır. Alqışlar ona ruh verir. Təqdim olunan hər çiçək dəstəsi uşaq qəlbini riqqətə gətirib, əbədi olaraq incəsənətə bağlayır. Qızının oxuyub-çalmasını əvvəlcə ötəri hiss kimi qəbul edən atası Cəmaləddin kişi Simarənin get-gedə sənətə bağlılığını görüncə onu bu yoldan çəkindirməyə çalışır. Atanın ən böyük arzusu qızını həkim görmək idi. Lakin Minəbəyim ana hər vəchlə kişini razı salmağa nail olur.
Digər həmyaşıdlarından fərqli olaraq, repertuar seçimində Simarə İmanova uşaq mahnılarına deyil, daha çox xalq mahnısı və təsniflərə üstünlük verirdi. Heç bir musiqi savadı olmayan, yalnız fitri istedadı və qabiliyyəti sayəsində ad çıxaran Simarənin xoş sorağı az bir zamanda İmişli rayon mədəniyyət evinin xalq çalğı alətləri ansamblının rəhbəri, tanınmış xanəndə Vahid Əliyevə də çatır. Və o Simarəni öz ansamblına dəvət edir. Dövrün tanınmış pedaqoq-xanəndəsi Nəriman Əliyevdən dərs almış Vahid müəllim muğam sənətinin, səhnə mədəniyyətinin incəliklərini gənc xanəndə qıza öyrədir. Muğam ifaçılığına daha çox meyl salan Simarə İmanova 1993-cü ildə orta məktəbi bitirən kimi sənədlərini Asəf Zeynallı adına Orta İxtisas Musiqi Məktəbinə verir. Qəbul imtahanında ustad xanəndələr Nəriman Əliyev, Arif Babayev, Canəli Əkbərov, Ağaxan Abdullayev, Alim Qasımov qarşısında oxuduğu “Mirzə Hüseyn segahı” və “Simayi-şəms” ritmik muğamı müəllimlərin xoşuna gəlir və onu xalq artisti Ağaxan Abdullayevin sinfinə qəbul edirlər.
— Həmin gün sevincimin həddi-hüdudu yox idi. Test imtahanından yüksək bal toplamışdım. Bu balla istədiyim ali məktəbə daxil ola bilərdim. Lakin mən seçimimi etdiyimdən ərizəmdə yalnız Asəf Zeynallı adına musiqi məktəbini göstərmişdim, — deyə o günləri xatırlayan Simarə İmanovanın üzünə xoş bir təbəssüm qondu.
İllər bir-birini əvəz etdikcə muğam sənətinin sirlərinə daha çox yiyələnmək arzusu gənc xanəndə qıza bir an rahatlıq vermir. Ağaxan müəllimdən muğam dəsgahlarını, çətin zərb muğamlarını səylə öyrənməyə çalışır. Görkəmli tarzən, respublikanın xalq artisti Zamiq Əliyev Simarə İmanovanın ifaçılıq məharətini görüb bəyənir. Ağaxan müəllimdən öyrəndiklərini tarla müşayiət edərək, onu daha səlis və rəvan oxumağa sövq edir. Məktəbdə oxuya-oxuya Zamiq Əliyevlə doğma respublikamızda, cəbhə bölgələrində olur. Lakin Simarə İmanovanı ən çox tanıdan, populyar edən onun 1997-ci ildə Azərbaycan Dövlət Televiziyasının “Səhər” proqramında oxuduğu Zamiq Əliyevin “Ah bu gecə, bu gecə” mahnısı olur. Böyük şövq və ustalıqla ifa etdiyi bu mahnı milyonlarla seyrcinin qəlbinə yol tapır. Zamiq müəllimin gənc xanəndənin repertuar seçimində, ifaçı kimi püxtələşməsində çox böyük zəhməti olur.
Simarə İmanovanın daha bir uğuru həmin il Rəşid Behbudov adına Mahnı Teatrında 8 Mart beynəlxalq qadınlar bayramına həsr olunmuş böyük bayram konsertindəki çıxışı olur. Ulu öndər Heydər Əliyevin iştirak etdiyi konserti Simarə İmanova belə xatırlayır:
— İlk dəfə idi ki, böyük səhnədə prezident önündə, özü də canlı olaraq televiziya ilə yayımlanan konsertdə çıxış edirdim. Həyəcandan əsirdim, başım hərlənirdi. “Şahnaz” təsnifinin muğam yerində elə bir qəzəl seçib oxumuşdum ki, həm əziz qadınlarımızı, həm də ulu öndərin xalqımıza, millətimizə göstərdiyi atalıq qayğısını ucalara qaldırmışdım. Çıxışımı qurtaran kimi evə getməyə tələsdim. Dedilər ki, hamı qalsın, konsertin axırında prezident səhnəyə çıxıb hamı ilə görüşəcək. Elə də oldu. Hamı ilə bir-bir əl verib görüşdü. Mənə çatanda — “Sən bilirsənmi ki, məni ağlatdın? Sən indiyə kimi haradaydın?” — deyə məni bağrına basıb alnımdan öpdü. Sonra üzünü o dövrdə mədəniyyət naziri işləyən Polad Bülbüloğluna tutub — “Sabah Simarə qızım bu üçlüklə təyyarədə olsunlar. Mənimlə Tiflisə gedəcəklər” — deyə tapşırıq verdi. Həyatımın ən yaddaqalan və heç bir zaman unudulmayan bir gününün xoş anlarını yaşadım o gün. Bu mənim böyük səhnəyə ilk uğurlu gəlişim oldu. Sanki, bu konsert həyatımı dəyişdi. Bütün bağlı qapıları açdı üzümə. Prezidentin iştirak etdiyi əksər tədbirlərdə, xarici səfərlərdə bizim üçlük iştirak edirdi.
1997-ci ildə daha bir əlamətdar hadisə isə Simarə İmanovanın həyatında, eləcə də Azərbaycan incəsənəti tarixində yadda qalır. Həmin il Özbəkistanın Səmərqənd şəhərində keçirilən “Şərq təranələri” beynəlxalq muğam festivalında respublikamızı təmsil etmək etimadı məhz Simarə İmanovaya göstərilir. Dünyanın 46 ölkəsinin qatıldığı bu möhtəşəm musiqi festivalının ən yüksək “Qran pri” mükafatını ilk dəfə olaraq Simarə İmanova alır.
“Azərbaycan himninin sədaları altında üçrəngli bayrağımız yuxarı qalxdıqca fərəhdən onun qəlbi qürur hissilə döyünürdü”. Dünyanın bir çox mötəbər qəzetləri azəri qızının, “Şərq bülbülünün” ecazkar səsindən, qazandığı uğurdan yazır. Bir ay davam edən festivalın sonunda Özbəkistan prezidentinin xahişi ilə Simarə İmanova daha 10 gün Daşkəndin 2500 yerlik ən böyük konsert salonunda üçlüklə çıxış edir. Dünyanın bir çox aparıcı dövlətləri Azərbaycan üçlüyünü öz ölkələrinə dəvət edirlər.
Vətənə qayıdan kimi Azərbaycan incəsənəti tarixində ilk dəfə olaraq 19 yaşlı gənc xanəndə Simarə İmanova ulu öndər, ümummilli liderimiz Heydər Əliyevin sərəncamı ilə respublikanın əməkdar artisti fəxri adına layiq görülür. Elə həmin ildə Milli Opera və Balet Teatrı Simarə İmanovanı Leyli roluna dəvət edir.
Qazandığı uğurlar, xarici ölkələrə olan dəvətlər çox olsa da, sənətdə arxayınçılığa yol vermir. Ali təhsil almaq məqsədilə 1998-ci ildə Mədəniyyət və İncəsənət Universitetinə daxil olur. 4 il bakalavr, iki il də magistratura şöbələrində təhsil alır. Universitetin solo oxu kafedrasında muğam sənətindən dərs demək təklifi alır. Bu gün Simarə İmanovanın çoxsaylı istedadlı tələbələri var. ABŞ, Kanada, Yaponiya, Fransa, Almaniya, Rusiya və onlarca digər ölkələrdə Azərbaycan xalq musiqisi nümunələrimizi layiqli təbliğ edən Simarə İmanovanın ifasında bu gün radio və televiziyanın qızıl səs xəzinəsində “Cahargah”, “Bayatı-Şiraz”, “Mahur Hindi” muğam dəsgahları, eləcə də “Simayi -şəms”, “Arazbarı” zərb muğamları qorunub saxlanır. Bu günlərdə isə xalq artisti bəstəkar Ramiz Mirişlinin mahnılarından ibarət “Dünya gözəl dünyadır” albomu işıq üzü görüb. Bu alboma hamımızın sevərək dinlədiyimiz “Gəlsən də, gəlməsən də, ”Dalğalar" , “Yandım elə yandım”, “Küsüb məndən”, Simarə İmanovaya ithaf olunmuş “Ay sənə qurban”, eləcə də digər mahnılar daxil edilmişdir.
Respublikanın əməkdar artisti Simarə İmanova son zamanlar ekran və efirdə az görünür. Bu da səbəbsiz deyil. Gənc xanəndə qız bütün mehrini ailəsinə, yeganə övladı 5 yaşlı Məhəmmədə bağlayıb. Bu gün-sabah yeni bir övlad dünyaya gətirəcək Simarə İmanova, inanırıq ki, sənətdə bundan sonra da öz sözünü deməyə imkan tapacaq.
Bir qarlı qış gecəsi dünyaya göz açan Simarənin həyat və yaradıcılıq yolu böyük səhnəyə, efirə də qışın oğlan çağından başladı. Lakin hər sərt keçən qışın gülli-çiçəkli baharı, isti yayı, bar-bəhərli payızı var. Simarə İmanovanın da sənətdə birdən-birə parlaması, sanki, “bir güllə bahar olmaz” deyənlərə öz istedadı və bahar nəfəsli ifası ilə ”bir güllə də baharın gəlişin duymaq olarmış" — dedi.

Xalq qəzeti.- 2007.- 27 oktyabr.- S. 8.