Salmanov R.

İkinci muğam müsabiqəsi başlandı

Muğam-2005” televiziya müsabiqəsinin yaratdığı xoş ovqatın təsiri getməmiş Azərbaycan Mədəniyyətinin Dostları Fondunun layihəsi əsasında Heydər Əliyev Fondunun dəstəyi, respublika Mədəniyyət və Turizm Nazirliyinin yaxından köməyi ilə Azərbaycan Televiziyası tərəfindən həyata keçirilən ikinci muğam televiziya müsabiqəsinin başlanması musiqi ictimaiyyətimiz, eləcə də muğamsevər tamaşaçılar tərəfindən rəğbətlə qarşılandı. Bəlkə elə bu səbəbdən də oktyabrın 2-si və 4-də müsabiqənin keçirildiyi R.Behbudov adına Mahnı Teatrında iynə atsaydın, yerə düşməzdi.
Ulu muğam sənətimizə bu qədər rəğbət bəsləyənlərin, onu canlı olaraq seyr etmək arzusunda olanların sayı həddindən çox olsa da, bəxti gətirən tamaşaçılar, təəssüf ki, yalnız zal tutan qədər oldu. Müsabiqənin ilk günündən dəvətli qonaqlar sırasında respublikanın tanınmış muğam ifaçıları, mədəniyyət və incəsənət xadimləri, elm və digər peşə sahibləri olsa da, onları bir araya gətirən məhz milli musiqimizə bağlılıq idi.
Respublikamızda keçirilən daha çox şou xarakterli müxtəlif müsabiqələrdən fərqli olaraq, bu müsabiqədə qaliblər SMS-lərlə müəyyənləşdirilmir. Dəyərli münsiflər heyətinin qərarı gənc ifaçıların hansının turdan-tura keçdiyini, hansınınsa müsabiqəni tərk edəcəyini müəyyənləşdirir. Odur ki, həmin gün müsabiqə iştirakçıları həyəcanlı anlar keçirmələrinə, ifa zamanı müəyyən qüsurlara yol vermələrinə baxmayaraq, münsiflər heçəti son dərəcə humanistlik göstərib çoxunu ən yüksək — on balla dəyərləndirdi. Münsiflər heyətində müəyyən mənada fikir, rəy müxtəlifliyi olsa da, ümumən klassik musiqi irsimizin, muğam sənətimizin inkişafına yönəlmiş bu müsabiqənin dəyərini hamı başa düşür və ən yaxşıların seçilməsi üçün məsuliyyətlərini dərk edirlər. Münsiflər heyətinə respublikanın xalq artistləri Əlibaba Məmmədov, Arif Babayev, Ağaxan Abdullayev, Mənsum İbrahimov, Azərbaycan Bəstəkarlar İttifaqının katibi, sənətşünaslıq doktoru professor Ramiz Zöhrabov, Azərbaycan Mədəniyyətinin Dostları Fondunun icraçı direktoru İbrahim Quliyev, “Muğam televiziya müsabiqəsi” layihəsinin icraçısı əməkdar incəsənət xadimi Nadir Axundov kimi muğam biliciləri daxildir. Gənc xanəndələri tarda Sahib Paşazadə, kamançada Toğrul Əsədullayev, nağarada isə Ramin Abdullayev müşayiət edirlər. Müşayiətçilərin hər üçü gənc olsa da, bir musiqiçi kimi peşəkar səviyyələri tamaşaçılar tərəfindən tez-tez sürəkli alqışlarla qarşılanmalarından bəlli oldu.
Respublikamızın müxtəlif bölgələrindən müsabiqəyə qatılmaq istəyənlərin sayı beş yüzdən çox olsa da, münsiflər heyəti yalnız 20 iştirakçıya müsabiqədə iştirak etmək şansı verdi. İştirakçılar arasında Milli Konservatoriyanın, Bülbül adına Musiqi Məktəbinin, Asəf Zeynallı adına Orta İxtisas Musiqi Məktəbinin tələbələri ilə yanaşı, heç bir musiqi təhsili olmayan 8 yaşlı Elməddin İbrahimov da var. Müsabiqənin ilk günü on iştirakçının, demək olar ki, tən yarısı münsiflər heyəti tərəfindən ən yüksək balla dəyərləndirildi.
Abgül Mirzəliyev, Ətapur Nasir, Güllü Muradova və Elməddin İbrahimov münsiflər heyəti tərəfindən ən yüksək — 70 balla qiymətləndirildilər.
Xalq mahnıları və muğam üstə köklənmiş ilk həftənin digər yaddaqalan cəhətlərindən biri də ifaçılarımızın səhnəyə milli geyimdə çıxmaları idi. Estetik gözəlliklə yanaşı, soy-kökümüzə bağlılığın, abır-ismət, həya kimi hisslərin, ən yüksək mədəni dəyərlərin nişanələrini gördük o gecə. Utanıb sıxılanlar, həyəcan, təlaş keçirənlər bu səbəbdən oxuyarkən müəyyən qüsurlara, xaric oxuma, ritmdən çıxma, sözlərin tələffüzündə müəyyən qüsurlara yol versələr də, onların istedadı münsiflər heyətinin nəzərindən yayınmırdı. Müsabiqənin isə öz qanunları var — hər həftə iştirakçılardan biri mütləq müsabiqəni tərk etməlidir.
İki gün davam edən gərgin yarışmada xalqımız istedadlı gənclərin tükənmədiyini, muğam sənətimizin daha da inkişaf edərək tərəqqi tapdığının bir daha şahidi olur. Ötən muğam müsabiqəsindən yaxşı tanışıdığımız Təyyar Bayramov, Babək Niftəliyev, İlkin Əhmədov, Pərvaz İbrahimli, Vəfa Orucova və digər sənətçilər bu gün muğam sənətimizi təkcə respublikamızda deyil, onun hüdudlarından uzaqlarda da layiqincə təmsil edirlər. Bu həyəcanı, bu sıxıntını vaxtilə onlar da keçiblər. Elə bilirəm, bu səbəbdən də müsabiqənin ilk günündə dəyərli münsüflər heyətinin bu humanist addımını gənc xanəndələri ruhdan salmamaq kimi dəyərləndirmək olar.
Yeri gəlmişkən, müsabiqə boyu aparıcıların hər bir ifaçının kimin tələbəsi olduğunu tez-tez nəzərə çarpdırması tamaşaçılar tərəfindən heç də birmənalı qarşılanmır. Obyektiv qiymət üçün bu əsas amil sayıla bilməz. Bir də müsabiqənin gedişində tamaşaçı üçün iddiaçının kimin tələbəsi olmasının heç bir əhəmiyyəti yoxdur. Tamaşaçı gözəl səsin, ürəyi riqqətə gətirə biləcək ifanın sorağındadır. Bu amilin qabardılması isə ifaçıların qiymətləndirilməsinə təsir göstərə bilər.
İkinci onluqda da istedadlı gənclər çoxdur. Hələlik isə həftənin qalibləri – Abgül Mirzəliyev birinci, Nasir Ətapur ikinci, Güllü Muradova üçüncü və Elməddin İbrahimov dördüncü yeri tutdular. Ən az bal toplamış Cabir Həsənov isə musabiqəni tərk etməli oldu.
Müsabiqə davam edir.

Xalq qəzeti.- 2007.- 7 oktyabr.- S.5.