Səxavətli muğamlar


Diskin təqdimat mərasimi keçirilib


Dünən mərhum xanəndə Səxavət Məmmədovun səs xəzinəsindən "Səxavətli muğamlar" adlı ikinci diskin təqdimatı keçirilib. APA-nın xəbərinə görə, tədbiri giriş sözü ilə diskin redaktoru Qulu Ağsəs açıb. O bildirib ki, yüksək keyfiyyət və tərtibatı ilə seçilən "Səxavətli muğamlar" diski Ukraynanın paytaxtı Kiyevdə yerləşən nüfuzlu studiyaların birində hazırlanıb: "Oktyabrın 23-də Səxavət Məmmədovun doğum günüdür. Bu disk həmin günə hədiyyə olaraq Azərbaycana gətirilib. Gələn il xanəndənin 55 illiyi münasibəti ilə "Səxavətli xalq mahnıları və təsniflər", "Səxavətli segahlar", "Səxavətli görüntülər", "Səxavətli yazılar"ın da nəşr olunması nəzərdə tutulub". Diskin prodüseri Burzu Əliyev Səxavət Məmmədovun mahnılarının Azərbaycandan kənarda da sevilərək dinlənildiyini bildirib.
Xalq artistləri Qədir Rüstəmov, Mənsum İbrahimov, yazıçı-publisist Rəşad Məcid, Sabir Abdullayev, "Qarabağ" ansamblının üzvləri, eləcə də Səxavət Məmmədovun digər sənət yoldaşları onunla bağlı xatirələrini danışıblar. Səxavət Məmmədovun oğlu Bəxtiyar Səxavətoğlu, qardaşı Fehruz Səxavət xanəndənin xatirəsini əziz tutanlara təşəkkür edərək, onun adının əbədiləşdirilməsi, adına küçə və musiqi məktəbinin verilməsi xahişi ilə müvafiq təşkilatlara müraciət etdiklərini bildiriblər.
Qeyd edək ki, "Görkəmli Azərbaycan xanəndəsi Səxavət Məmmədovun səs xəzinəsi"nin I nəşri olan "Azad bir quşdum" diski də 2003-cü ildə Kiyevdə nəşr edilərək, muğamsevərlərə pulsuz paylanılıb.

 

Xalq cəbhəsi.- 2007.-24 oktyabr.- S.14.