Ustad sənətkarın yubileyi qeyd edilmişdir

Barmaqlar tellərə toxunduqca dünyanın lal sükutuna həzin, kövrək bir səs hakim kəsilir. Habil Əliyev çalır, kamançanın "köksündən" qopan həzin, kövrək musiqi onu dinləyənləri məftun edir. Altmış ildən çoxdur ki, Habil Əliyev bu yanğılı çalğıları ilə hər bir dinləyicini ovsunlamaqla yanaşı, Azərbaycan musiqisini də dünyada tanıdaraq əcnəbilərə sevdirməyi də bacarmışdır. Nadir istedadı, bənzərsiz yaradıcılıq yolu, milli musiqimiz qarşısındakı misilsiz xidmətləri ilə adını Azərbaycan musiqi ifaçılığı sənətinin tarixinə qızıl hərflərlə yazmış ustadın - xalq artisti Habil Əliyevin 80 yaşı tamam oldu...
Prezident İlham Əliyevin sərəncamı ilə "İstiqlal" ordeni ilə təltif edilmiş, xalq artisti Habil Əliyevin 80 illik yubileyi oktyabrın 23-də M.Maqomayev adına Azərbaycan Dövlət Filarmoniyasında qeyd edilmişdir.
Tədbirdə Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın yubilyara ünvanladığı məktub oxunmuşdur.
Gecədə mədəniyyət və turizm naziri Əbülfəs Qarayev, xalq şairi Zəlimxan Yaqub, xalq artisti Arif Babayev, akademik Bəkir Nəbiyev, Milli Məclisin deputatı professor Rafael Hüseynov və başqaları çıxış edərək böyük sənətkarın mənalı ömür yolundan, zəngin yaradıcılığından söz açmışlar.
Bildirilmişdir ki, Habil Əliyev səksən il bundan öncə mayın 28-də dünyaya göz açmış, Ağdaş Musiqi Məktəbində kamança ifaçılığından dərs almış, 1952-ci ildə Bakıya gəlib Asəf Zeynallı adına Orta İxtisas Musiqi Məktəbinin kamança şöbəsinə daxil olaraq görkəmli tarzən Qurban Pirimovdan və məşhur müğənni Xan Şuşinskidən muğam sənətinin sirlərini öyrənməyə başlamışdır. Habilin ifaçılığı bəstəkar Soltan Hacıbəyovun da diqqətindən yayınmamışdır. Bəstəkar, Habilin potensial imkanlarını nəzərə alıb ona filarmoniyada işləməyi məsləhət görmüşdür. Beləliklə, Habil Əliyev 1953-cü ildə Müslüm Maqomayev adına Azərbaycan Dövlət Filarmoniyasında fəaliyyətə başlamışdır.
Tədbirdə vurğulanmışdır ki, Habil Əliyevin 1961-ci ildə televiziyada ilk konserti onun yaradıcılığında yeni bir dövrün başlanğıcını qoymuşdur. Habilin "Segah", "Bayatı-Qacar", "Bəstənigar", "Bayatı-Şiraz", "Rahab", "Bayatı-Kürd", "Çahargah", "Rast", "Zabul" muğamlarına yeni kamança həyatı verdiyi xüsusi qeyd edilmişdir.
Diqqətə çatdırılmışdır ki, ustad sənətkar virtuoz ifaçılığı ilə yanaşı, gözəl mahnıların da müəllifidir. Onun bəstələdiyi 15-dən artıq mahnı bu gün də tanınmış musiqiçilər tərəfindən sevilə-sevilə ifa olunur. Habil Əliyevin dünyanın böyük dövlətləri olan ABŞ, Fransa, Yaponiya, İtaliya və Yunanıstanda Azərbaycan muğamlarından və xalq mahnılarından ibarət kompakt diskləri də buraxılmışdır.
Habil Əliyev sənətdə göstərdiyi xidmətlərinə görə 1964-cü ildə əməkdar artist, 1978-ci ildə isə xalq artisti fəxri adlarına layiq görülmüşdür, Azərbaycan Prezidentinin fərdi təqaüdçüsüdür. Yubiley ərəfəsində Prezident İlham Əliyev ustad sənətkarı "İstiqlal" ordeni ilə təltif etmişdir.
Gecədə bildirilmişdir ki, sənət meydanına çıxdığı gündən musiqi mədəniyyətimizin ənənəsini inkişaf etdirən Habil Əliyev Azərbaycan ifaçılıq sənətinə "Habil segahı"nı bəxş etmişdir. Sənətə ilk gəlişində dinləyicilərə Habil Əliyev kimi təqdim edilən böyük sənətkar artıq xalqımız tərəfindən Habil Kaman kimi tanınır.
Yubiley gecəsində gənc ifaçılar geniş konsert proqramı ilə çıxış etmişlər

Azərbaycan.- 2007.- 24 oktyabr.- S.8.