Avroviziyada Azərbaycanı kim təmsil edəcək?

 

Əbülfəs Qarayev: "Nəticələr barədə bir söz deyə bilmərəm"

 

İki gündür ki,  Rəşid  Behbudov adına Mahnı Teatrında "Avroviziya" mahnı müsabiqəsində Azərbaycanı təmsil etməyə namizəd olan sənət adamlarının kastinqi prosesi başa çatıb. "Yol gənclərindir!" devizi altında keçirilən seçim turunda 37 müğənninin ifası dinlənilib. Onların arasında İradə İbrahimova, Röya, Elnarə, Natəvan Həbibi, Zamiq, Nurlan Növrəsli, Ayaz Qasımov, "Rast", "Unformal" qrupu, "Akademiya" realiti-şousunun finalçıları Aytac Cəfərovc və Xəyyam Mustafazadə də var.

Mədəniyyət və Turizm, Gənclər və İdman nazirliklərinin və Heydər Əliyev Fondunun təşkil etdiyi seçim turunda sənətçilərin çıxışını Əbülfəs Qarayev, Azad Rəhimov, Fərhad Bədəlbəyli, Səyavuş Kərimi və Ukraynadan dəvət olunmuş mütəxəssislər qiymətləndiriblər. Onların "süzqəc"indən uğurla keçən müğənniyə və ya qrupa gələn ilin mayında Serbiyada keçiriləcək "Avroviziya" yarışmasında ölkəmizi təmsil etmək nəsib oiacaq. Həmin ifaçı üzərində bir il ərzində xarici mütəxəssislər çalışacaq, onun repertuarı, rəqsindən tutmuş xarici görünüşünə qədər bir çox elementləri dəyişdiriləcək.

Maraqlısı odur ki, qurum nümayəndələri media təmsilçilərinə kastinq barədə hər hansı məlumat vermir. Biz sadəcə həmin kastinq prosesinə qatılan müğənnilərin adlarını öyrənə bildik. Natəvan Həbibi kastinqə dəvət aldığını söyləsə də, iştirak edəcəyi vaxtın bəlli olmadığını bildirdi. Müğənni xanım söylədi ki, məşhurluğundan asılı olmayaraq hər kəsin ifası dinlənilməlidir.

Beynəlxalq müsabiqənin seçim mərhələsinə dəvət alanlardan biri də İradə İbrahimovadır. Amma o, kastinqdə iştirak edə bilməyəcək. Səbəbini açıqlayan müğənninin mətbuat katibi təklifi ötən gün aldıqlarını bildirdi təəssüflə İradə İbrahimovanın ölkədən kənarda olduğunu, bu həftə qayıdıb-qayıtmayacağının da məlum olmadığını bildirdi.

Mədəniyyət Turizm naziri Əbülfəs Qarayev isə öz növbəsində APA-ya açıqlama verib: "Biz sözümüzün üstündə durduq Azərbaycanın "Eurovision" müsabiqəsində iştirakı üçün hazırlıqlara başladıq", - deyə o, bildirib. Heydər Əliyev Fondunun, Mədəniyyət Turizm Nazirliyinin, Gənclər İdman Nazirliyinin keçirdiyi ilk seçim turunun arxada qaldığını vurğulayan nazir deyib: "Amma bunun nəticələri barədə bir söz deyə bilmərəm. Yəqin ki, 2008-ci ildə Azərbaycanı "Eurovision" müsabiqəsində görəcəyik".

 

Müsavat.- 2007.- 6 oktyabr.- S. 13.