Mükərrəmoğlu M.

Qızıl şir əfsanəsi

 

Bakı sirkində

 

Bakı Dövlət Sirki tamaşaçıların çoxsaylı müraciətlərini, geniş tamaşaçı kütləsinin marağını nəzərə alaraq Çin Xalq Respublikasının böyük heyətli məşhur sirk proqramını Bakıya dəvət etmişdir.
Dünən sirkin direktoru Vaqif Bağırzadə yeni proqramla bağlı mətbuat konfransı keçirdi. O bildirdi ki, proqramın hazırlandığı Kayfın Çinin qədim şəhəri, yeddi şah nəslinin paytaxtıdır. Məhz bu şəhər minillik Çin sirki ənənələrinin mərkəzi sayılır və hazırda bu sahədə ölkənin ən yaxşı dördlüyünə daxildir. Yeni proqramın direktoru Van Sinmindir.
Proqramda orta yaşı 18 olan dünyanın 30 ölkəsində uğurla çıxış etmiş 35-dən artıq sirk artisti iştirak edir.
Çinin məşhur Qızıl şir əfsanəsi attraksionu bu ölkə sirkinin ən effektli nömrəsi hesab olunur və onsuz bir dənə də olsun Çin proqramı təşkil olunmur. Nömrədə bir neçə artist iştirak edir, onlardan bəziləri adətən iki nəfər olmaqla şiri, digərləri isə şirin təlimçisini oynayırlar. Şirlər rəqs eləyir, əsl akrobatlar kimi atılıb-düşürlər, böyük şarlar üzərində dayanaraq çətin balans trükləri edirlər.
Proqrama bundan başqa, boşqabların fırlanması, sehirli halqa, şən aşbazlar, uçan şlyapalar, velosipeddə çətin kompozisiyalar və digər nömrələr, o cümlədən əhilləşdirilmiş heyvanların və şən klounların nömrələri də daxildir.
Proqramı melodik musiqi, artistlərin yüksək ustalığı fərqləndirir. Artistlər bir nəfəsə işləyir, ən çətin trükləri cəld və dayanmadan yerinə yetirirlər.
Qızıl şir əfsanəsi müxtəlif yaş kateqoriyalarının marağı nəzərə alınmaqla, hər şeydən əvvəl, ailəvi tamaşaçılar üçün nəzərdə tutulub.
Tamaşalar sabit olmayan qrafiklə əsasən saat 15.00 və 19.00-da, məktəblilərin tətil günlərində isə əlavə olaraq saat 12.00-da nümayiş etdiriləcək.

Xalq qəzeti.- 2007.- 21 oktyabr.- S.5.