Peşəkarlıq, istedad, populyarlıq və təcrübə

Fərhad Bədəlbəyli: Biz “Eurovision” müsabiqəsinə qatılırıqsa, gərək, futbolçularımız kimi çıxış etməyək

Bakı Musiqi Akademiyasının rektoru, xalq artisti Fərhad Bədəlbəyli APA-ya mühasibə verib

- 2008-ci ildə “Eurovision” müsabiqəsində iştirakı artıq rəsmən təsdiqlənən Azərbaycanın təmsilçisi hansı ölçülərə cavab verməlidir?

- “Eurovision”da iştirak etmək üçün peşəkarlıq, istedad, populyarlıq və təcrübə tələb olunur. Təcrübə vacib bir məsələdir, çünki həmin müsabiqədə təcrübəli ifaçılar çıxış edirlər. 2006-cı ilə Rusiyanı təmsil edən Dima Bilan çox təcrübəli idi. Çox gənc ifaçının bu müsabiqədə iştirak etməsi bir tərəfdən yaxşıdır, ancaq digər tərəfdən qorxuram ki, təcrübəsiz adam belə böyük səhnədə özünü itirə bilər.

- Necə bilirisniz, Azərbaycanı layiqincə məhz kim təmsil edə bilər?

- Mənim üçün ən yaxşı variant bu müsabiqədə Brilliant Dadaşovanın “Vağzalı” kompozisiyası ilə iştirakıdır. Özü də bu kompozisiyanı mən nağara çalanlarla bir yerdə görürəm. Brilliant xanımın bu ifası yüksək səviyyədədir. İkinci variantım isə Sevda Ələkbərzadədir. Biz “Eurovision” müsabiqəsinə qatılırıqsa, onda gərək futbolçularımız kimi çıxış etməyək. Bu, biabırçılıqdır! Mədəniyyətdə, səhnədə bu biabırçılığı təkrarlamaq olmaz.

- Siz Azərbaycanın ilk təmsilçisindən nə gözləyirsiniz?

- İlk növbədə, normal çıxış etmək lazımdır. Musiqidə bizim imkanlarımız çoxdur. Bu müsabiqədə iştirak və çıxış etmək çox məsuliyyətli işdir. Ona görə hesab edirəm ki, Azərbaycan bu müsabiqədə ən istedadlı ifaçı ilə təmsil olunmalıdır.

- Niyə Fərhad Bədəlbəyli təmsilçinin seçilməsi üçün keçirilən seçim turlarında münsiflər heyətində təmsil olunmur?

- Münsiflər heyətinin üzvü olmalı idim. Məni dəvət etdilər, ancaq Çexiyaya səfər etdiyim üçün iştirak edə bilmədim.

- Bu gün Azərbaycan estradasının ən məşhur simaları bu seçim turlarına qatılmayıb...

- Seçim turlarında iştirak edən ifaçıları o qədər də yaxşı tanımıram. Mən Röyanı, Brilliantı, Sevdanı tanıyıram, çünki onlar məharətlərini və peşəkarlıqlarını göstəriblər. İndi təmsilçilik uğrunda mübarizə aparan bu cavanlara qulaq asmamışam, onların ifası ilə tanış deyiləm. Bəlkə də onlar istedadlı uşaqlardır?! Mənim fikrimcə, bu müsabiqədə təcrübəli adamın çıxış etməyi daha yaxşı olardı. Məsələn, Brilliant, Sevda və ya Röya kimi. Onların səhnə təcrübəsi var. Yenə təkrar edirəm ki, təcrübəsiz adamı səhnəyə çıxarmaq olmaz. Mən bir sənət adamı kimi bildirirəm ki, birdən-birə o cür səhnəyə çıxmaq olduqca çətindir. Hətta peşəkar insan da özünü itirə bilər.

- Sizin saydığınız bu təcrübəli ifaçılar isə seçim turlarında iştirak etməkdən imtina ediblər...

- Əlbəttə, peşəkar və təcrübəli ifaçının cavan uşaqlarla birgə təmsilçilik uğrunda yarışması etikaya sığmır. Adlarını sadaladığım ifaçıların disklərinə qulaq asmaq olardı.

- Bir çoxlarının fikrincə, “Eurovision”da aşağı səviyyəli ifaçılar çıxış edir...

- Mən bilirəm ki, bu müsabiqə ətrafında hay-küy olduqca çoxdur. Həmin müsabiqənin keyfiyyəti, səviyyəsi məni də qane etmir. 2006-cı ildə birinciliyi Finlandiyanı təmsil edən, səhnəyə bədheybət şəklində çıxan rok qrupa verdilər. Onların birinciliyi biabırçılıq idi. Mən o qrupa heç səhnə də verməzdim. Belə məsələlər müsabiqənin səviyyəsini aşağı salır. Görünür ki, müəyyən siyasi problemlər də var. Orada məhz hansı kriteriyaların üstünlük təşkil etdiyini bilmirəm, hər halda o finlərə qulaq asanda adam dəhşətə gəlirdi. Amma onlar qalib oldular.

- Türkiyə son iki ildə ən yüksək səsi Ermənistana verir. 2008-ci ildə Azərbaycan təmsilçisinin ən azı Türkiyədən dəstək alacağına inanırsınız?

- Əlbəttə. ABŞ Konqresinin qərarından sonra Türkiyədə başa düşürlər ki, dost ilə düşməni ayırmaq lazımdır. Onlar başa düşürlər ki, hər sahədə, o cümlədən futbolda, musiqidə daim sonsuz bir mübarizə gedir. Türkiyənin iki il səsini Ermənistana verməsi məni çox təəccübləndirdi. Məncə, indi vəziyyət çox dəyişib. Ona görə də, Azərbaycan iştirakçısının Türkiyədən dəstək alacağına inanıram.

- Azərbaycan nümayəndəsi daha hansı ölkənin dəstəyinə ümid edə bilər?

- Ukraynadan da səs ala bilərəik. Məsələnin o biri tərəfinə qalsa, əslində biz öz gücümüzlə ölkəmizi tanıtmalıyıq, heç kimin dəstəyi bizə lazım deyil. Mən 1968-ci ildə Portuqilayada olanda Azərbaycanı heç kim tanımırdı. Mən o səhnədə Azərbaycan musiqisini, sənətini nümayiş etdirdim. İndi ilk növbədə istedadlı olduğunu sübut etmək lazımdır. İfaçının gözəl səsi olmaqla yanaşı, özünü təqdim etmək bacarığı da vacib amildir.

Yeni Azərbaycan.- 2007.- 19 oktyabr.- S.8.