Qəlbin dərinliklərindən süzülüb gələn ecazkar musiqi

Bakılılara əfsanəvi opera müğənnisi, dünya şöhrətli tenor Xose Karrerasın möhtəşəm sənəti ilə görüşmək səadəti nəsib olmuşdur. Bu görüş oktyabrın 20-də Azərbaycan Dövlət Akademik Opera və Balet Teatrının səhnəsində baş tutmuşdur.
AzərTAc xəbər verir ki, İspaniyanın məşhur tenoru səhnədə görünəndə salon əsl sənət xiridarları sayılan bakılıların gurultulu alqışlarından lərzəyə gəldi. İki hissədən ibarət konsertin proqramına İtaliya və İspaniya bəstəkarlarının klassik əsərləri daxil edilmişdi. Birinci bölmədə Skarlatti, Kosta, Tosti və Terendellinin, ikinci bölmədə isə Hardel, Albeniz, Qranados, Morera, Ribas və başqalarının əsərləri səsləndi.
Avropanın ən mahir pianoçularından biri sayılan Lorenso Bavacın müşayiəti ilə ifa olunan hər bir opera ariyasında, yaxud romansda Xose Karrerasın səsinə məxsus təbii lirizm çağlayırdı. Müğənni məhz belə ifa tərzi ilə salondakıları son dərəcə təsirləndirdi. Yəqin, buna görə müğənninin qəlbinin dərinliklərindən süzülüb gələn hər bir ecazkar musiqi əsəri gurultulu alqışlarla, salonun coşğun reaksiyası ilə müşayiət olunurdu.
Bakılılar, həqiqətən, yaxşı musiqini qəlbən duyan əsl sərraflardır və peşəkar ifanı qiymətləndirməyi bacarırlar. Təsadüfi deyildir ki, Xose Karreras bir gün əvvəl keçirdiyi mətbuat konfransında bildirmişdi ki, bu, onun Bakıya birinci səfəridir. Lakin Azərbaycanın zəngin musiqi ənənələrindən xəbərdar olduğu, burada musiqiyə necə həssas yanaşıldığını hiss etdiyi üçün paytaxtımıza təkrar-təkrar gəlməyə hazırdır. Ölkəmiz də dünyanın artıq bütün aparıcı səhnələrini fəth etmiş böyük maestronu təkrar-təkrar qəbul etməyə hazırdır.
Bu əlamətdar konsert gecəsində teatrın foyesində İsveçrənin məşhur "Chopard" firmasının zinət əşyalarından ibarət kolleksiya nümayiş etdirilirdi. Hazırda bu firmanın Bakıda mağazası açılmışdır. Onun açılış mərasimində Xose Karreras da iştirak etmişdir.
Bu bənzərsiz zinət əşyalarının göz qamaşdıran gözəlliyi məşhur ispanın böyük sənəti ilə vəhdət təşkil edirdi.

Azərbaycan.-2007.- 21 oktyabr.- S.3.