Mahsun Kırmızıgül tamaşaçıları məyus etdi

Zilanı gələn dəfə gətirib intizarınıza son qoyacağam

Sentyabrın 30-da Yaşıl Teatr Bakı Konsert Kompleksində Türkiyənin ünlü sənətçisi Mahsun Kırmızıgülün solo-konserti oldu. "N.E.Orqanization" şirkətininin təşkilatçılığı ilə "Aşka sürgün" adı altında düzənlənən konsert proqramı müğənninin canlı ifası ilə başladı.Konsertə təxminən bir saat gecikən Mahsun Kırmızıgül "Aşka sürgün" filmində səslənən mahnıların sədaları altında səhnəyə daxil olaraq tamaşaçılarını salamladı. Sonra repertuarından canlı olaraq sevilən mahnılarını ifa etdi.
   Konsert salonunda iynə atsan yerə düşməzdi. Sanki Mahsunun pərəstişkarları bu konserti çoxdan gözləyirdi. Ona görə də tamaşaçıları onu pilləkənlər üzərində əyləşməklə seyr edirdilər. Səhnədə ifaları ilə tamaşaçılarını feyziyab edən müğənni arabir sevənlərindən sevgi məktubları da alırdı. O, isə bunun cavabında pərəstişkarlarına "öncə sizi anam bəyənməlidir, əgər onun xoşuna gəlsəniz, o zaman mən hazıram" deməklə cavab verirdi.
   "Aşka sürgün" serialının qəhrəmanı Zilanın səhnəyə çıxmasını isə tamaşaçılar səbirsizliklə gözləyirdi. Mahsun isə Zilanın gələ bilmədiyini söylədi. Doğrusu bu xəbər tamaşaçılar arasında narahatçılıq yaradaraq onları məyus etdi.
   Çünki Hazarla Zilanı eyni səhnədə canlı görmək istəyən azəri tamaşaçıları çox idi. Bunun səbəbini isə müğənni Türkiyədə dizi mövsümünün başlaması ilə izah etdi: "Yeni filmlərə çəkildiyi üçün Zilan və digər sənətçilər Bakıya gələ bilmədilər. Bununla mənim səfərim yekunlaşmır. İnşallah yenidən gəlməyi düşünürəm.
   Gələn dəfə çalışacam ki, sizlərin intizarına son qoyaraq Zilanı da özümlə gətirim. Mən bilirəm ki, bu dizi Azərbaycanda da çox sevildi və filmin qəhrəmanları kimi Hazarla Zilanı qarşınızda canlı görmək arzusundasınız".

Üç nöqtə.- 2007.- 2 oktyabr.- S.13.