Mirzəbəyli İ.

London Azərbaycan Cəmiyyəti Britaniya paytaxtında milli musiqimizi səsləndirmişdir

Azərbaycan-Böyük Britaniya Gənclər Cəmiyyətindən redaksiyamıza daxil olan məlumatda bildirilir ki, bu təşkilat Böyük Britaniya və Şimali İrlandiya Birləşmiş Krallığının paytaxtında fəaliyyət göstərən London Azərbaycan Cəmiyyəti ilə əhatəli əməkdaşlıq edir. Dost ölkədəki gənclər təşkilatımızın növbəti tədbiri Azərbaycan milli musiqisi ilə bağlı olmuşdur. Qeyd edək ki, bədnam qonşularımızın maddi və qeyri-maddi mədəniyyət nümunələrimizə sahib çıxmaq istədiyi, daha doğrusu, oğurladığı bir vaxtda belə tədbirlərin çox böyük əhəmiyyəti vardır.
Məlumatda bildirilir ki, Londondakı Puşkin Evində London Azərbaycan Cəmiyyətinin təşkilatçılığı ilə Azərbaycan xalq musiqisi aləti olan kamançanın mahir qərbli ifaçısı Cefri Verbokun konserti keçirilmişdir. Konsertdə Cefri Verbok milli musiqi alətlərimiz — kamança, ud və tarda Azərbaycan muğamlarını yüksək ustalıqla ifa etmişdir. Tədbirdə Azərbaycanın Birləşmiş Krallıqdakı fövqəladə və səlahiyyətli səfiri Fəxrəddin Qurbanov, Britaniya ictimaiyyətinin və bu ölkədəki Azərbaycan icmasının nümayəndələri iştirak etmişlər.
Amerikalı Cefri Verbok kamançada olduqca mürəkkəb Azərbaycan musiqilərini ustalıqla səsləndirən azsaylı əcnəbi ifaçılardan biridir. Altı yaşından musiqi təhsili almağa başlamış Verbok 14 yaşında ilk musiqisini bəstələmişdir. O, 12 ildən çox bir müddətdə Azərbaycan musiqisinin dahi bilicisi kimi tanınan Zevulon Avşalomovdan dərs almışdır. Dünya Musiqi İnstitutundan verilən məlumata görə, cənab Avşalomov Cefri Verboku ona mükafat kimi göndərilmiş bir şagird və malik olduğu biliyin həqiqi varisi adlandırmışdır. İncə və səlis ifası ilə tanınan məşhur kaman ustası ABŞ, Avropa və Orta Şərq ölkələrində, eləcə də Azərbaycan radiosu və televiziyasında konsertlər vermiş, misilsiz muğam musiqi ənənələrini dünya tamaşaçısına təqdim etmişdir.
2001-ci ildə Verbok Azərbaycan Dövlət Musiqi Akademiyası tərəfindən mükafatlandırılmış, 2002-ci ildə isə Smitsonia İnstitutunun İpək Yolu Festivalında Azərbaycan proqramının rəsmi aparıcısı və təmsilçisi seçilmişdir. Bu gün də Azərbaycan muğamı üzrə peşəkar mütəxəssis kimi tanınan Verbok dünyanın bir çox yerlərində bu mövzuda məruzələr söyləyir və konsertlərlə çıxış edir.
Qeyd edək ki, tədbirin təşkilatçısı London Azərbaycan Cəmiyyəti Azərbaycanı dünyada tanıtmaq məqsədilə ingilis dilində “Visions of Azerbaijan” jurnalını nəşr etdirərək dünyanın aparıcı kitabxana, elmi və mədəni mərkəzlərinə yayır. Cəmiyyət həmçinin Qarabağ münaqişəsinə dair həqiqətləri beynəlxalq ictimaiyyətə çatdırmaq məqsədilə www.karabakh.co.uk saytını təsis etmiş və xarici müəlliflərin məqalələrindən ibarət “Ermənistan – Azərbaycan, Dağlıq Qarabağ münaqişəsi – beynəlxalq baxış” və “Xocalı faciəsi – beynəlxalq baxış” adlı kitabları nəşr edərək dünya ictimaiyyətinə təqdim etmişdir.

Xalq qəzeti.- 2007.- 28 oktyabr.- S..4.