Niftəliyev E.

 

Azərbaycanın Avstriyadakı səfirliyində bu ölkənin tanınmış incəsənət xadimi Hans Mozerin xatirə lövhəsi açılmışdır

 

Oktyabrın 23-də Azərbaycanın Avstriyadakı səfirliyində bu ölkənin tanınmış incəsənət xadimi, kinoaktyor Hans Mozerin xatirə lövhəsinin açılışı münasibətilə rəsmi qəbul keçirilmişdir.
Hans Mozer (əsl adı Jan Jülye, 1880-1964) 100-dən artıq bədii filmdə bir-birindən əvəzsiz rollar yaratmaqla yanaşı xalq mahnılarının da gözəl ifaçısı olmuşdur. Ölümündən 43 il ötməsinə baxmayaraq, özünəməxsus Vyana ləhcəsində danışan H.Mozerin filmləri həm yaşlı, həm də gənc nəsil tərəfindən çox sevilir. H. Mozerə məxsus olmuş və ömrünün son 30 ilini keçirdiyi evdə hazırda Azərbaycan səfirliyi yerləşir.
Tədbirdə Azərbaycan Respublikası Baş nazirinin müavini Elçin Əfəndiyev, Avstriya federal iqtisadiyyat və əmək naziri Martin Bartenştayn, Avstriya Xarici İşlər Nazirliyi mədəniyyət siyasəti departamentinin baş direktoru Emil Briks, Avstriyanın Azərbaycandakı səfiri Marius Kalliqaris, səfirliyin yerləşdiyi Hitsinq rayonunun icra hakimiyyəti başçısı Haynts Qerster, Avstriya hökumətinin və burada akkreditə olunmuş diplomatik korpusun nümayəndələri, Avstriyada yaşayan həmyerlilərimiz, incəsənət xadimləri iştirak etmişlər.
Səfir Fuad İsmayılov tədbiri giriş sözü ilə açaraq, H.Mozer haqqında və binanın 5 il öncə Azərbaycan hökuməti tərəfindən səfirlik üçün alınmasının tarixçəsi barədə danışmış, Azərbaycan hökuməti adından vyanalılara hədiyyə edilən bu xatirə lövhəsinin ölkələrimiz arasındakı dostluq əlaqələrini daha da möhkəmləndirəcəyini qeyd etmişdir.
Baş nazirin müavini Elçin Əfəndiyev mərasimdə təbrik nitqi söyləmiş, Prezident İlham Əliyevin səmimi təbriklərini mərasim iştirakçılarına çatdırmışdır. H.Mozerin filmlərini hələ 50-ci illərdə ilk dəfə seyr etdiyini bildirən natiq o zaman Azərbaycanın müstəqil bir dövlət olacağını və onun Vyanadakı səfirliyinin H.Mozerin evində yerləşəcəyini təsəvvürünə belə gətirmədiyini dedi. E.Əfəndiyev xatirə lövhəsinin açılışının zəngin mədəniyyət və tarixə malik Azərbaycan və Avstriya arasında əlaqələrin yüksək səviyyədə inkişafına sübut olduğunu bildirmişdir.
Daha sonra Avstriya federal iqtisadiyyat və əmək naziri Martin Bartenştayn və Avstriya XİN mədəniyyət siyasəti departamentinin baş direktoru Emil Briks çıxış edərək, Avstriya hökuməti və Vyana sakinləri adından Azərbaycan tərəfinə təşəkkürlərini bildirmişlər.
Baş nazirin müavini E.Əfəndiyev və nazir M.Bartenştayn tədbir iştirakçılarının alqışları altında xatirə lövhəsi üzərindəki ağ örtüyü götürdülər.
Lövhə üzərində aşağıdakı yazı həkk olunmuşdur: Bu binada tanınmış və sevilən xalq aktyoru HANS MOZER (əsl adı Jan Jülye 1880-1964) yaşamışdır. Azərbaycan Respublikasının Avstriyadakı səfirliyi tərəfindən Vyana sakinlərinə hədiyyə olunur.
Rəsmi hissə bitdikdən sonra Baş nazirin müavini E.Əfəndiyev bir neçə həftə öncə Azərbaycanda səfərdə olmuş nazir M.Bartenştayn ilə söhbət etdi. Nazir M.Bartenştayn Azərbaycana səfərinin uğurlu keçdiyini və Prezident İlham Əliyevlə görüşündən böyük təəsüratla geri döndüyünü bildirdi.
Daha sonra E.Əfəndiyev Avstriyanın ORF, Puls TV telekanallarına, Vyana Radiosuna, Avstriya Mətbuat Agentliyi və digər mətbu orqanlarına müsahibələr verdi.
Rəsmi hissədən sonra tədbirin bədii hissəsi musiqi proqramı ilə davam etmişdir.
Tədbirin bədii hissəsində əvvəlcə Hans Mozerlə 10 bədii filmdə çəkilmiş Avstriyanın tanınmış incəsənət xadimi Valtraud Haas bir neçə musiqi parçası ifa etmiş və H.Mozerlə bağlı xatirələrindən danışmışdır.
Vyananın Musiqi və Təsviri İncəsənət Universitetinin prorektoru Volfqanq Klos Şubertin Arpeccione sonatasının birinci hissəsinin Bakı Musiqi Akademiyasının pianoçusu Kəmalə Neymanovanın müşayiəti ilə səsləndirmişdir.
Sonda böyük Azərbaycan bəstəkarı Ü.Hacıbəyovun Arşın mal alan operettasını ötən il Vyana Kamera Operasında səhnələşdirən rejissor və bəstəkar Maykl Şnakın müşayiəti ilə tamaşada oynamış artistlər operettadan bir neçə parçanı Azərbaycan dilində ifa etmişlər.
Tədbir Avstriyanın aparıcı mətbuat orqanları və televiziya kanalları vasitəsilə (ORF, Puls TV) geniş işıqlandırılmışdır.

Xalq qəzeti.- 2007.- 25 oktyabr.- S.8.