Tacikistan incəsənət ustaları Ağsuda olmuşlar

Azərbaycanda Tacikistan mədəniyyəti günlərinin iştirakçıları oktyabrın 18-də Ağsuya gəlmişlər.
Tacikistanın mədəniyyət naziri Mirzoşoxrux Asrorovun rəhbərlik etdiyi nümayəndə heyətinin tərkibinə nazirliyin beynəlxalq əlaqələr şöbəsinin müdiri Çaxangir Sadirov, Tacikistan Televiziya və Radio Komitəsi sədrinin müavini Dilafruz Amirkulova, Tacikistan Dövlət Filarmoniyasının direktoru Xakim Sadıxov, "Qudrez" və "Zebo" rəqs qrupları, "Şaşmokom" və "Falak" milli musiqi və "Darye" Dövlət ansamblları, tanınmış opera müğənniləri, tacik estradasının ulduzları daxil idilər.
Ağsu şəhərindəki Heydər Əliyev adına mərkəzi meydanda qonaqları rayonun rəhbərləri, ziyalılar, mədəniyyət işçiləri musiqi sədaları altında hərarətlə qarşıladılar. Milli geyimli qızlar qonaqlara şərbət paylamışlar.
Ağsu Rayon İcra Hakimiyyətinin başçısı Əflatun Rufiyev hörmətli qonaqları salamlayaraq, oxşar milli dəyərlərə malik iki xalqın tarixi əlaqələrindən, bir-birinə bənzər adət-ənənələrindən danışmışdır. Azərbaycan Prezidenti İlham Əliyevin Tacikistana bu yaxınlarda etdiyi səfərin hər iki xalqın bir-birinə daha da yaxınlaşmasında müstəsna əhəmiyyətini qeyd edən natiq qarşılıqlı mədəniyyət günləri keçirilməsinin xüsusi əhəmiyyət daşıdığını vurğulamışdır. O məlumat vermişdir ki, gələn il dost ölkədə Azərbaycan mədəniyyəti günləri keçiriləcəkdir.
Tacikistan Dövlət Filarmoniyasının direktoru Xakim Sadıxov dost və qardaş Azərbaycana gəlişlərinin ilk anlarından mehribanlıq duyduqlarını, istər Bakıda, istərsə də Ağsuda hərarətlə qarşılandıqlarını, ünsiyyətdə olduqları insanlar tərəfindən onlara isti münasibət göstərildiyini bildirərək bundan çox məmnun olduqlarını demişdir. Bu münasibəti təbii qarşılayan tacik qonaq bunu eyni dinə, eyni milli-mənəvi dəyərlərə, oxşar taleyə malik iki dost və qardaş xalqın qədim tarixə söykənən sıx və qırılmaz əlaqələri ilə izah etmişdir. Tacikistanda Azərbaycanın dahi şairi Nizami Gəncəvinin əsərlərini çox sevirlər, - deyən qonaq səhər şairin vətəni Gəncəyə gedəcəklərindən fərəh duyduqlarını dilə gətirmişdir.
Sonra tacik qonaqlar mərkəzi meydanda müdrik siyasətçi, görkəmli dövlət xadimi, ulu öndər Heydər Əliyevin abidəsini ziyarət etmiş, xalqımızın ümummilli liderinə öz ehtiramlarını bildirmiş, abidənin önünə çiçəklər qoymuşlar.
Günün ikinci yarısında tacikistanlı incəsənət ustaları mərkəzi meydanda zəngin repertuarlı konsert proqramı ilə çıxış etmişlər.

Azərbaycan.- 2007.- 19 oktyabr.- S. 6.