Hacızadə A.

Anar Ələkbərov: Biz istədiyimizə nail olduq

Moskvada "BibliObraz-2007" beynəlxalq festivalı başa çatmışdır

Moskvada "BibliObraz-2007" beynəlxalq festivalı başa çatmışdır. Heydər Əliyev Fondu bu festivalda fəal iştirak etmişdir.
Fondun icraçı direktoru Anar Ələkbərov festivalın yekunlarını şərh edərək bildirmişdir ki, Azərbaycanın bu festivalda iştirakı "ölkəmizin qələbələrindən biri" olmuşdur. O demişdir:
- Heydər Əliyev Fondunun dəstəyi sayəsində festivalda nəfis nəşrlər, suvenirlər, milli musiqi alətləri təqdim olunmuşdu. Bütün iştirakçıların ümumi rəyinə görə, Azərbaycanın stendi ən gözəl və zəngin stend idi. İştirakçı ölkələrin çoxu artıq bu tədbirin gedişində bizim təcrübəmizi mənimsəyərək, öz stendlərinin tərtibatını dəyişməyə, onlara yeni materiallar və eksponatlar əlavə etməyə başlamışdı. Bu, bizim üçün çox xoşdur.
Azərbaycandan festivala gətirilmiş 15 min nüsxəyə yaxın kitab təkcə Moskvanın deyil, Rusiya regionlarının da məktəblərinə və kitabxanalarına hədiyyə ediləcəkdir. Oktyabrın 12-də Moskvadakı 157 nömrəli Azərbaycan etnik-mədəni komponentli məktəbin yubileyi keçiriləcəkdir. Fond bu məktəbə çoxlu kitab verməyi planlaşdırır. Hesab edirəm ki, təşəbbüsü davam etdirmək, bu qəbildən olan festivallarda iştirak edən bütün təşkilatlara kömək etmək lazımdır. Heydər Əliyev Fondu, onun prezidenti Mehriban xanım Əliyeva bu dəstəyi davam etdirəcəkdir. Bu vəzifələrin reallaşdırılması üçün Heydər Əliyev Fondunun Moskvadakı nümayəndəliyi artıq fəaliyyətdədir. Nümayəndəliyin rəhbəri Leyla xanım Əliyevadır.
Anar Ələkbərov daha sonra bildirmişdir ki, Azərbaycanın birinci xanımı festivalda təqdim edilmiş stenddən və mədəni proqramdan çox razı qalmışdır. Məxsusi olaraq "BibliObraz" festivalı üçün bir neçə nəşr hazırlamış və rus dilinə tərcümə etdirmiş ölkələrdən biri də biz olduq. Biz "BibliObraz" loqotipi ilə bir sıra nəşrlər buraxmış yeganə ölkəyik. Həm də festival münasibətilə hədiyyə nəşrləri, təqvimlər və başqa əşyalar hazırlamış yeganə ölkəyik.
Fondun icraçı direktorunun fikrincə, festival iştirakçılarının "Azərbaycan" stendinə böyük maraq göstərməsi heç də təsadüfi deyildi. Stenddə nümayiş etdirilən eksponatlar arasında uşaqlar və yeniyetmələr üçün nəşrlər, eləcə də müxtəlif fiziki qüsurları olan - kor, zəif görən və ağır eşidən uşaqların kitabla ünsiyyətdə olmasına kömək edən xüsusi avadanlıqlar da vardır.
A.Ələkbərov demişdir: "Biz istədiyimizin hamısına nail olduq və ölkəmizi ləyaqətlə təmsil etdik".

Azərbaycan.- 2007.- 12 oktyabr.- S.3.