Heydər Əliyev Fondu "BibliObraz-2007" beynəlxalq festivalıında Azərbaycanı ləyaqətlə təmsil etmişdir

AzərTAc-ın xüsusi müxbiri xəbər verir ki, Rusiyanın birinci xanımı Lyudmila Putinanın himayəsi ilə Rus Dilinin İnkişafı Mərkəzi tərəfindən Moskvada təşkil edilmiş "BibliObraz-2007" beynəlxalq festivalı oktyabrın 11-də başa çatmışdır. Bu forum Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva tərəfindən fəal dəstəklənmişdir.
Bu il festivalda dünyanın 22 ölkəsini, o cümlədən Azərbaycan, Avstriya, Bolqarıstan, Almaniya, Hindistan, Qırğızıstan, Slovakiya, ABŞ və Estoniyanı və Avropanın, Asiyanın digər ölkələrini təmsil edən iştirakçılar toplaşmışdı. Hər bir ölkə tematik ekspozisiyalardan ibarət stendlərini, fərdi proqramlarını, interaktiv diskussiyalarını, yaradıcılıq emalatxanalarını, tanınmış yazıçılar və incəsənət xadimləri ilə görüşləri təqdim etmişdi.
Ölkəmiz Heydər Əliyev Fondunun bilavasitə iştirakı ilə əlvan və rəngarəng proqram hazırlamış, Azərbaycanın tarixini, bu gününü, zəngin mədəniyyətini hərtərəfli təmsil etmişdir. Festival iştirakçılarının etirafına görə, "Azərbaycan" stendi ən maraqlı və zəngin stend idi. Burada Azərbaycan ədəbiyyatı klassiklərinin əsərləri, Heydər Əliyev Fondunun köməyi ilə nəşr edilmiş yeni kitablar, multimedia məhsulları ilə yanaşı, əl işi olan gəlinciklər, qədim məişət əşyaları, nadir milli çalğı alətləri və milli geyimlər də nümayiş etdirilirdi.
Festival çərçivəsində gənc və istedadlı rejissor Lalə Axundovanın "Dost" filminin təqdimatı da olmuşdur. Bir oğlanın dayça ilə dostluğundan bəhs edən bu film Moskva məktəblərinin şagirdlərindən ibarət olan auditoriya tərəfindən böyük maraqla qarşılanmışdır. L.Axundova uşaqlara öz yaradıcılığı barədə danışmış, müasir dünyada ədəbiyyatın və incəsənətin rolu barədə fikirlərini bölüşmüşdür. Təqdimat başa çatandan sonra iştirakçılara - "Dost" fiminin DVD versiyası paylanmışdır.
Azərbaycan Dövlət Pantomim Teatrı artistlərinin çıxışı çox böyük marağa səbəb olmuşdur. Artistlər məşhur "Məlikməmməd" nağılından fraqmentlər göstərmişlər. Festivalın az qala, bütün iştirakçıları bu tamaşaya baxmağa gəlmişdilər. Nağıl qəhrəmanlarının Heydər Əliyev Fondunun sifarişi ilə tikilmiş kostyumları Moskvadakı Azərbaycan etnik-mədəni komponentli 157 nömrəli məktəbə bağışlanacaqdır.
Təkcə Azərbaycanda deyil, onun hüdudlarından uzaqlarda da məşhur olan yazıçılar Kamal Abdulla və Çingiz Abdullayevlə görüş festival iştirakçıları üçün əsl bayram oldu. Çingiz Abdullayevin "BibliObraz-2007" festivalı çərçivəsində təşkil edilmiş ustad dərsi intellektual diskussiyaya çevrildi. Bu görüşdə müasir ədəbiyyatın ən aktual problemləri barədə söhbət getdi. Ç.Abdullayev ölkələr və xalqlar arasında mədəni dialoqun qorunub saxlanması və genişlənməsinin, mədəni məkanın böyüməsinin zəruriliyini, bu cür festivallar və mədəni tədbirlər keçirilməsinin böyük əhəmiyyətini vurğuladı. O bildirdi ki, müasir Azərbaycan ədəbiyyatının və incəsənətinin yazıçı Kamal Abdulla, rejissor Rüstəm İbrahimbəyov, səfir Polad Bülbüloğlu kimi görkəmli nümayəndələri iki ölkə arasında əlaqələndirici rolu oynayır, Azərbaycanla Rusiyanın mədəni əlaqələrinin inkişafına bilavasitə kömək edirlər. Ç.Abdullayev dedi ki, Prezident sarıdan Azərbaycanın bəxti gətirmişdir, çünki İlham Əliyev geniş dünyagörüşünə malik, humanitar sahəyə böyük əhəmiyyət verən siyasətçidir.
Ölkəmizin Rusiyadakı səfiri Polad Bülbüloğlu Azərbaycanın birinci xanımı Mehriban Əliyevaya "BibliObraz-2007" festivalında iştirak etmək üçün vaxt tapıb Moskvaya gəldiyinə görə minnətdarlığını bildirdi. O, həmçinin Azərbaycanın bu festivalda ləyaqətlə təmsil olunması üçün imkan yaratmış Heydər Əliyev Fonduna təşəkkür etdi.
Azərbaycanın tanınmış rəssamları Elmira Abbaslı və Qalina Çurilovanın yaradıcılığı festival iştirakçılarının böyük marağına səbəb olmuşdur. Onlar məktəb kukla teatrları üçün kuklalar hazırlanması və ipək üzərində naxışçəkmə üzrə "Nağılvarı atəşfəşanlıq" adlı ustad dərsi keçmişlər. Rəssam Nüsrət Hacıyevin "Rəngbərəng yağış" adlı ustad dərsi isə "Məlikməmməd" nağılının motivləri əsasında təşkil edilmişdi.
Tanınmış musiqiçi Həsənağa Sadıqovun rəhbərlik etdiyi ansamblın çıxışı xüsusi ovqat doğururdu. Festival günlərində bu kollektivin ifasında gözəl xalq melodiyaları səslənmişdir.

Azərbaycan.- 2007.- 12 oktyabr.- S.3.