Əsədov B.

Postsovet məkanında elmi kitab probleminin həllinə

Azərbaycan fəal kömək edir

Milli Elmlər Akademiyası Mərkəzi Elmi Kitabxanasının direktoru Aybəniz Əliyeva-Kəngərli və kitabxananın elmi işlər üzrə direktor müavini Firəngiz Hüseynova Moskva şəhərində keçirilən "Postsovet məkanında elmi kitab" mövzusunda beynəlxalq elmi konfransda iştirak ediblər. Konfrans Rusiya Elmlər Akademiyalarının Beynəlxalq Assosiasiyasının himayəsi altında MDB dövlətləri İcra Hakimiyyətinin dəstəyi ilə baş tutub. Tədbirə Rusiyadan, digər MDB dövlətlərindən, eyni zamanda Avstriyadan, Bolqarıstandan, ABŞ-dan iki yüz nəfərdən çox alim və mütəxəssis qatılıb, yüzdən artıq məruzə dinlənilib.

Konfransın birinci günündə filologiya elmləri doktoru A.Əliyeva-Kəngərlinin və F.Hüseynovanın "Azərbaycan MEA-nın elmi tədqiqatlarının informasiya təminatında Mərkəzi Elmi Kitabxananın nəşriyyat fəaliyyətinin rolu" mövzusunda məruzələri iştirakçıların böyük marağına səbəb olub. Digər məruzələrdə elmi kitabın nəşrləri və yayılması problemləri ilə bağlı məsələlər qoyulub, elmi nəşrlərin qloballaşma şəraitində tədqiqatlarda və təcrübədə əhəmiyyətli rolundan danışılıb, bu sahədə aparılan işlərin daha da gücləndirilməsinin vacibliyi vurğulanıb. Konfransda elmi nəşrlərin kitabxanalarda mövcudluğuna, postsovet məkanında elmi kitabın azad və səmərəli yayılmasına mane olan iqtisadi-siyasi əngəllərin aradan qaldırılması məsələləri də müzakirə edilib.

Konfransın ikinci günü seksiyalar üzrə keçirilib. Azərbaycan nümayəndələri "Elmi kitabxanaların fəaliyyəti, elmi-biblioqrafik ehtiyatlar, beynəlxalq kitab mübadiləsi" seksiyasının işində iştirak ediblər. A.Əliyeva-Kəngərli Rusiya Elmlər Akademiyalarının Beynəlxalq Assosiasiyası nəzdində fəaliyyət göstərən Kitab nəşri üzrə şuranın iclasına da qatılıb. Burada elmi kitabın nəşri, yayılması, digər məsələlər və problemlərlə bağlı çıxışlar edilib, müzakirələr aparılıb və bir sıra təkliflər irəli sürülüb. Nəticədə "Rusiya Elmlər Akademiyalarının Beynəlxalq Assosiasiyası nəzdində fəaliyyət göstərən Kitab nəşri üzrə şuranın iş proqramı" hazırlanıb. Həmin proqrama əsasən bir sıra tədbirlər həyata keçirilməsi nəzərdə tutulur. Bu tədbirlər elmi kitabın nəşri sahəsi üzrə MDB dövlətlərinin informasiya fəzasının formalaşdırılması, postsovet məkanında elmi kitabın nəşrinin, yayılmasının təkmilləşdirilməsi və inkişafı, kitab mübadiləsi, elmi kitabın nəşri və yayılması sahəsində qarşılıqlı əlaqələrin güzəştli şərtlər üzrə qurulması, elmlər akademiyalarının və elmi kitabxanaların marağında olan Kitab Nəşri üzrə Şuranın elmi-nəşriyyat fəaliyyətinin inkişafı məsələlərini əhatə edəcək.

Mərkəzi Elmi Kitabxana "AMEA elmi tədqiqatlarının informasiya təminatında Mərkəzi Elmi Kitabxananın nəşriyyat fəaliyyətinin rolu" mövzusunda məruzəni konfransa təqdim edib. Məruzədə göstərilib ki, müasir kitabxanaların fəaliyyətinin əsas istiqaməti elmi tədqiqatların informasiya təminatıdır, bu informasiyanın həmin tədqiqatların aktuallığına və səviyyəsinə müəyyən dərəcədə təsiri olur. Lazımi informasiyanı, ehtiyatları alimlərə məhz elmi kitabxanalar təqdim edirlər. Mərkəzi Elmi Kitabxana hər zaman Milli Elmlər Akademiyasının tarixi, elmi həyatı, ümumiyyətlə, respublikamızla bağlı fundamental elmi-biblioqrafik əsərlərin hazırlanmasına və nəşrinə ciddi diqqət yetirir. 80 illik fəaliyyəti dövründə kitabxana 300-dən artıq biblioqrafik vəsait hazırlayıb və çap edib. Bu nəşrlər alimlərə gərəkli informasiyanı çatdırmaqla Azərbaycanda elmin öyrənilməsi və gələcək inkişafı yolunda əhəmiyyətli rol oynayıb.

Məruzədə Azərbaycan Respublikasının Prezidenti cənab İlham Əliyevin "Azərbaycanda kitabxanaların fəaliyyətinin yaxşılaşdırılması haqqında" sərəncamı xüsusi vurğulanıb. Həmin sərəncama əsasən Mərkəzi Elmi Kitabxana üçün müasir standartlara cavab verən yeni bina tikiləcək. Bu isə kitabxananın maddi-texniki bazasının yaxşılaşdırılmasına və fəaliyyətinin bütün istiqamətlərinin, o cümlədən Milli Elmlər Akademiyasında aparılan elmi tədqiqatların informasiya təminatının genişləndirilməsinə və gücləndirilməsinə böyük imkanlar yaradacaq.

Azərbaycan.- 2007.- 6 oktyabr.- S. 6.