Dünya informasiya agentliklərinin ikinci qurultayı başa çatmışdır

AzərTAc-ın müxbiri xəbər verir ki, oktyabrın 26-da İspaniyanın Estepona şəhərində dünya informasiya agentliklərinin ikinci qurultayı öz işini davam etdirmişdir.
Səhər iclasını İtaliyanın nüfuzlu ANSA informasiya agentliyinin baş direktorunun müavini Culio Pekora açmışdır. Agentliyin proqram rəhbərləri Stefani Querillo və Simon Günter yeni texnologiyaların inkişafına həsr olunmuş proqramlarını təqdim etmişlər.
Sonra iclas İspaniyanın EFE agentliyinin baş direktoru Lola Alvaresin sədrliyi ilə davam etmişdir. "İnnoveyşn" beynəlxalq media-konsaltinq qrupunun məsləhətçi-direktoru Klaudio Epsent informasiya agentliklərinin gələcəyi və kütləvi informasiya vasitələrinin inkişaf meyilləri barədə məlumatla çıxış etmişdir.
Qurultay çərçivəsində keçirilən fotosərgidə dünya informasiya agentliklərinin fotomüxbirlərinin işləri təqdim olunmuşdur. AzərTAc-ın foto ustalarının üç işi qurultay iştirakçıları tərəfindən böyük maraqla qarşılanmış, Osman Kərimovun fotosu birinci mükafata layiq görülmüşdür.
Qurultayın bağlanış mərasimində İspaniya Senatının sədri Fransisko Xavyer Roxo Qarsia iştirak etmişdir.
Elə həmin gün qurultay çərçivəsində AzərTAc-ın da üzv olduğu Qara Dəniz İqtisadi Əməkdaşlıq Təşkilatı Ölkələri Milli İnformasiya Agentlikləri Assosiasiyasına (BSANNA) daxil olan xəbər agentliklərinin rəhbərlərinin iclası keçirilmişdir. Tədbirdə əvvəlki iclasdan keçən dövr ərzində görülmüş işlər müzakirə olunmuş və təşkilatın növbəti iclasını gələn ilin iyun ayında Bolqarıstanda keçirmək barədə qərar qəbul edilmişdir.

Xalq qəzəti.- 2007.- 27 oktyabr.- S.5.