Əliyev Q.

Beynəlxalq arenada Prantın yeni nailiyyəti

PRANT” Beynəlxalq İnformasiya Agentliyi Londonda “Beynəlxalq Keyfiyyət Tacı” mükafatına layiq görülüb
Beynəlxalq arenada respublikamızın nüfuzunun günü-gündən artması, ölkə iqtisadiyyatının inkişafı Azərbaycan Respubliksının Prezidenti İlham Əliyevin apardığı uğurlu daxili və xarici siyasət xəttinin nəticəsi olaraq qəbul edilməlidir. Dövlət rəhbərliyinin sahibkarlıq sektoruna xüsusi diqqət ayırmasının nəticəsi olaraq, beynəlxalq miqyasda bütövlükdə Azərbaycana və həm də ölkədə fəaliyyət göstərən və artıq onun hüdudlarından kənarda tanınan müxtəlif profilli qruplara diqqətin artması müşahidə olunmaqdadır.
Respublikada özəl sektorun fəal nümayəndələrindən birinə çevrilən, son 10 ildə Azərbaycanda daşınmaz əmlak sahəsində müvəffəqiyyətlə çıxış edən “Prant” Agentliyi bütün bu müddət ərzində sabit olaraq həmin sahədə öz birinciliyini qoruyub saxlamağa müvəffəq olmuşdur. Bu agentlik daim yüksələn xətt üzrə inkişaf edir və həmişə yüksək nəticələr və gözəçarpan nailiyyətlər nümayiş etdirir.
İqtisadi inkişafın məntiqi nəticəsi olaraq keyfiyyət göstəricisinin ön plana çıxması mənzillər, yaşayış və kommersiya təyinatlı binalarla bağlı xidmətlər təklif edən daşınmaz əmlak agentliklərinin məsuliyyətini artırmışdır. Məhz keyfiyyəti rəhbər tutaraq hərtərəfli xidmətlər təklif edən şirkətlərdən bu gün ən qabaqcıl Ağa-Daim Ələkbərovun 1997-ci ildə təsis etdiyi və bu günədək rəhbərliyini həyata keçirdiyi “PRANT” Beynəlxalq İnformasiya Agentliyidir. “Prant” Agentliyi yarandığı gündən etibarən A. Ələkbərovun seçdiyi düzgün iqtisadi strategiyaya əsaslanaraq, respublikamızın daşınmaz əmlak bazarında aparıcı mövqe tutmağa, ticarət markasını öz keyfiyyəti ilə tanıtmağa çalışmışdır.
Məhz keyfiyyətli xidmətin nəticəsidir ki, sentyabrın 23–24-də London şəhərində binzes dünyasında tanınmış qurumun – BİD-in (Business İnitiative Directions) növbəti iclasında “Prant” şirkəti “Beynəlxalq Keyfiyyət Tacı” mükafatına layiq görülmüşdür. Dünya ölkələrindən mötəbər şirkətlərin, nüfuzlu iş adamlarının, keyfiyyət üzrə ekspertlərin də iştirak etdiyi bu tədbirdə qaliblər 100 müxtəlif keyfiyyət meyarına uyğunluğa görə səsvermə yolu ilə seçilmişdir. Bunlar arasında “Daima müştəriləri dinləmək və onların istəyini öyrənmək”, “Liderlik və daxili ünsiyyət sisteminin inkişafı”, “Yeni texnologiyanı mənimsəmək üçün təlim görmə” və sair meyar vardır. Qeyd edək ki, BİD-in laureatları arasında Rusiyanın ən böyük üç şirkətindən biri olan, işçilərinin sayına görə isə (600 min) birinci olan “RAO EGS” şirkəti, dünyanın ən uca göydələni olacaq “Burc Dubay Qülləsi”nin tikintisi ilə məşğul olan “Turner Construction” və s. dünya şöhrətli şirkətlər var. A. Ələkbərov deyir ki, “Prant” şirkətinin layiq görüldüyü bu mükafat ictimaiyyətə göstərilən xidmətin, peşəkar fəaliyyətin nəticəsi kimi qəbul edilməlidir. Onun sözlərinə görə, şirkətin bu mötəbər mükafatı qazanması təkcə agentliyin uğuru deyil, həmçinin dövlətin sahibkarlara və iş adamlarına göstərdiyi qayğının nəticəsidir. Göstərilən xidmətin səviyyəsinə görə təqdim edilən bu mükafat işin keyfiyyətini daha da yüksəltməyə stimul verir.
Onu da deyək ki, bu, “Prant”ın beynəlxalq səviyyədə ilk nailiyyəti deyil. Hələ 2004-cü ildə “Prant” Agentliyi İtaliyada beynəlxalq mükafata – “Yüksək keyfiyyətə və nüfuza görə Qızıl Ulduz” mükafatına layiq görülməklə ictimaiyyətin diqqətini cəlb edə bilmişdir. 2006-cı ildə İsveçrənin Sürix şəhərində “Nüfuza və keyfiyyətə görə lider” adlı beynəlxalq mükafatı və Parisdə isə bu beynəlxalq mükafatın “Qızıl Medal”nı qazanmışdır.
2007-ci il agentlik üçün xüsusilə əlamətdar olub. Şirkət 2007-ci il fevral ayının 18– 19-da Almaniyanın Frankfurt şəhərində Avropanın keyfiyyət prinsipləri əsasında əvvəlki illərdə bu mükafata layiq görülmüş şirkətlərin rəyi nəzərə alınmaqla, BİD (Business İnitiative Directions) tərəfindən keyfiyyətli xidmət və yüksək iş texnikasına görə “Beynəlxalq qızıl medal” ilə təltif edilmişdir. Liderlərə liderlər tərəfindən təqdim edilən bu nüfuzlu mükafat 17 media orqanı tərəfindən işıqlandırılmışdır. Bu beynəlxalq və yüksək səviyyəli mükafatlandırılma mərasimində dünyanın Azərbaycanın yeganə təmsilçisi kimi “Prant” Agentliyi iştirak etmişdir. Sentyabrın 23–24-də isə şirkət, artıq yuxarıda qeyd etdiyimiz kimi, “Beynəlxalq Keyfiyyət Tacı” mükafatına layiq görülmüşdür. Agentliyin rəhbəri A. Ələkbərovun sözlərinə görə, “Prant”ın əldə etdiyi nailiyyətlər və mükafatlar onun beynəlxalq aləmdə nüfuzunun artmasına xidmət etməklə yanaşı, həm də Azərbaycanın etibarlı tərəfdaşı olaraq onun iqtisadi potensialının bir növ reklamı kimi qəbul olunmalıdır.
Bu gün “Prant” Agentliyi öz statusunu təkcə Azərbaycanın daşınmaz əmlak bazarında deyil, həm də onun hüdudlarından kənarda, dünya dövlətlərinin tanınmış təşkilat və şirkətləri ilə birgə apardığı fəaliyyət zəminində təsdiq etməkdədir. Belə ki, ABŞ–Azərbaycan Ticarət Palatasının və bir sıra digər nüfuzlu qurumların üzvü olan “Prant” Agentliyi geniş beynəlxalq əlaqələrə malikdir, məhz bu əlaqələrdən istifadə etməklə öz sifarişçilərinə respublikamızdan kənarda da daşınmaz əmlakın alınması və icarəyə götürülməsi üzrə xidmətlər təklif edir. Bu baxımdan ABŞ–Azərbaycan Ticarət Palatasının 10 illiyi münasibəti ilə Azərbaycan Respublikasının Prezidenti İlham Əliyevin iştirakı ilə 27 aprel 2006-cı ildə Vaşinqtonda keçirilən və Azərbaycanın iqtisadi inkişafının perspektivi məsələlərinə həsr edilmiş konfransa agentliyin prezidenti A. Ələkbərovun dəvət olunması heç də təsadüfi hal deyildir. Yeri gəlmişkən qeyd edək ki, 2006-cı ildə xalqlar və dövlətlər arasında dostluq münasibətlərinin inkişafında agentliyin oynadığı rola görə “Ümumdünya Sülh Federasiyasının və Dünya Sülh Naminə Dinlərarası və Beynəlxalq Federasiyanın” qərarı ilə “Prant” Agentliyinin təsisçisi A. Ələkbərov “Sülhməramlı səfir” fəxri adına layiq görülmüşdür.
Agentliyin fəaliyyəti dəfələrlə mötəbər nəşrlərdən olan “New York Post”, “Weekly Telegraph”, “Actualidad”, “The British Chambers of Commerce”, “Impressions”, “IN Baku”, “Consulting & Business”, “USACC Business Directory” “4 AM For All Markets” kimi qəzet və biznes-jurnallarda işıqlandırılmışdır.
Son zamanlar Azərbaycanın iqtisadiyyatında müşahidə edilən pozitiv inkişaf meylləri iqtisadiyyatımıza yönəldilən xarici investisiyaların həcminin gözə çarpan dərəcədə artmasına, yeni iqtisadi layihələrin planlaşdırılmasına və icrasının başlanılmasına səbəb olmuşdur. Müasir şəraitdə daşınmaz əmlakla bağlı göstərilən yeni xidmətlərin kəmiyyət və keyfiyyət tərəflərinə diqqətin artdığı bir zamanda “Prant” Agentliyi yüksək meyarlara cavab verə biləcək beynəlxalq standartlara uyğun universal xidmətlər təklif edə bilən bir quruma çevrilmişdir.
Agentliyin 100 mindən artıq daşınmaz əmlak haqqında informasiyanı özündə cəmləşdirən məlumat bazasında əmlakın müxtəlif sahələri, şəhərin mərkəzində və Bakı şəhərinin bütün rayonlarında Avropa və Şərq üslubunda dizayn edilmiş yaşayış binaları, torpaq sahələri, kommersiya yönümlü daşınmaz əmlakın digər növləri də daxildir. Agentliyin təqdim etdiyi xidmətlər sırasına daşınmaz əmlakın alqı-satqısı və icarəsi ilə əlaqədar olan xidmətlərdən əlavə, yüksək gəlirli investisiya layihələri sahəsində təkliflər, bu layihələrin reallaşdırılması ilə bağlı iqtisadi və maliyyə imkanlarının araşdırılması istiqamətində işlər, yüksək keyfiyyətli hüquqi, menecment, təmir-tikinti, kommunal, dizayn işləri üzrə xidmətlər daxildir. Agentlik sifarişçilər üçün daşınmaz əmlakla bağlı məsələləri, zəruri hallarda bütünlüklə mürəkkəb kompleks sövdələşmələri həyata keçirməklə də məşğuldur.
“Prant” şirkətinin əsas devizi: “Hər müştəriyə fərdi və keyfiyyətli yanaşma”dır. Məhz buna görə də məlumat bazasında agentliyə sahibləri tərəfindən ekslüziv təqdim edilən mənzillər və obyektlər mövcuddur.
Sivil bazar prinsiplərini təbliğ edən Agentlik təsis olunduğu andan, daşınmaz əmlak bazarında məlumatların, texnologiyaların və s. iş təcrübəsinin mübadiləsi üçün daim açıqdır. Bunun nəticəsidir ki, hazırda Bakıda fəaliyyət göstərən beynəlxalq təşkilatların nümayəndəlikləri, xarici diplomatik missiyalar, BP, BJ, “Mcdermott”, “Shevron”, “Siemens”, “TTE Petrofac”, “Briggs Marine”, “Fircroft”, “Moody İnternational”, “PCH Offshore”, “KSA Deutag”, CNLC, “Swiss Corporation” və digər bu kimi transkontinental korporasiyalar şirkətin xidmətlərindən istifadə edənlər sırasındadır.

Xalq qəzeti.-2007.- 3 oktyabr.- S.7.