Yusifova S.

Balakənin mədəniyyət dünyası yeni turizm obyektləri ilə zənginləşir

Ümummilli lider Heydər Əliyevin əsasını qoyduğu, onun sadiq davamçısı, Azərbaycan Respublikasının Prezidenti İlham Əliyev tərəfindən uğurla davam etdirilən mədəniyyət siyasəti bu gün çiçəklənən Azərbaycanın böyük və misilsiz uğurlarının parlaq təzahürünə çevrilmişdir. Prezident İlham Əliyevin böyük önəm verdiyi turizmin inkişaf etdirilməsi strategiyası da formalaşır.
Heydər Əliyev xalqımızın tükənməz intellektual və mənəvi qüvvələri, səyləri, nəcib arzu və əməllərinin timsalı olan möhtəşəm imarətin, müstəqil milli dövlətimizin memarı və yaradıcısıdır. Görkəmli dövlət xadimi kimi tanınan bu böyük insan bütün mənalı ömrünü dövlətçiliyimizin möhkəmlənməsinə, mədəniyyətimizin və incəsənətimizin çiçəklənməsinə həsr etmişdir. Mədəniyyətimizin gələcək inkişafı məsələlərində o, daim gəncləri düşünür, xalqın əvəzsiz mədəni irsinin layiqli əllərə tapşırılmasını arzu edirdi. Bu gün həmin arzular çiçəklənməkdədir.
Balakən rayonu təkcə öz zəngin və mürəkkəb coğrafi şəraiti ilə deyil, həm də mədəni-mənəvi dünyasının özünəməxsusluğu, eləcə də maraqlı turizm obyektləri ilə digər bölgələrdən fərqlənir.
Balakən Rayon Mədəniyyət və Turizm Şöbəsi bu gün geniş şəbəkəni özündə birləşdirir. Həmin şəbəkəyə bir rayon, 18 kənd mədəniyyət evi, 17 klub, MKS və 49 kənd kitabxana filialı, Bülbül adına uşaq incəsənət və musiqi məktəbləri, tarix-diyarşünaslıq muzeyi, mədəniyyət və istirahət parkı, kinoteatr daxildir.
Rayonda turizmin və dağ turizminin inkişafı üçün geniş imkanlar mövcuddur. Burada dövlət qeydiyyatına götürülmüş 27 tarix və mədəniyyət abidələri mövcuddur. Abidələrdən 9-u ölkə, 17-si isə yerli əhəmiyyətlidir. XVIII–XIX əsrlərdə inşa edilmiş minarəli məscid kompleksi öz quruluşuna görə nəinki Azərbaycanda, hətta bütün Qafqazda nadir islam mədəniyyəti incilərindəndir. Kompleksdəki Qafqazda analoqu olmayan 45 metr hündürlüyü olan minarə öz ilkin memarlıq nümunələrini, gözəllik və möhtəşəmliyini yüz illərdir ki, qoruyub saxlayır.
Rayondakı Katex şəlaləsi, 3648 metr yüksəkliyi olan Quton zirvəsi, Qubək yaylaq massivi, Quton və Tinov-Rosso zirvələrinin ətəklərindən başlayan alp çəmənliklər, dağ yamaclarında, qayalıqlarda tikilmiş çoxlu sayda alban və atəşpərəstlik abidələri dağ turizmini inkişaf etdirmək üçün potensial imkanlar yaradır və şöbə bu istiqamətdə tədbirlər həyata keçirməkdədir.
Azərbaycan Respublikasının Prezidenti İlham Əliyevin 2006-cı il aprelin 12-də Balakənə gəlişindən sonra rayonun təkcə sosial-iqtisadi həyatında deyil, mədəniyyət sahəsində də əsaslı yüksəlişin təməli qoyulmuşdur. Prezidentin şəxsi təşəbbüsü ilə regionların sosial-iqtisadi inkişafına dair Dövlət Proqramına daxil edilmiş tədbirlərin bir çoxu mədəniyyət və turizm sahəsini əhatə edir. Rayon mədəniyyət evinin əsaslı təmirinin Mədəniyyət və Turizm Nazirliyinə həvalə edilməsi, minarəli məscidin əsaslı təmir edilməsi, uşaq kitabxanasının təmiri və yeni avadanlıqla təchiz edilməsi mədəniyyətin inkişafına göstərilən qayğının bariz nümunəsidir. Bunlardan ikisinin — uşaq kitabxanasının və məscidin təmiri artıq başa çatmışdır. Mədəniyyət və turizm istiqamətində tikinti sahəsi üzrə ən böyük uğurlarımızı göstərən faktlardan daha bir neçəsini qeyd edək. Bu faktlar Prezidentin gəlişindən sonra tarix-diyarşünaslıq muzeyi və mərkəzləşdirilmiş kitabxana sistemi üçün yeni, müasir binaların tikilib istifadəyə verilməsi, monumental, müasir memarlığın ən son nailiyyətlərini özündə əks etdirən Heydər Əliyev muzeyinin inşasına başlanmasıdır. Hazırda muzeyin tikintisində son tamamlama işləri aparılır. Bütün yenidənqurma, bərpa və tikinti işləri rayon icra hakimiyyətinin başçısı Asif Məmmədovun daim diqqət mərkəzindədir.
Qeyd edildiyi kimi mədəniyyətimizin inkişafı gənclərlə, onların ictimai-siyasi həyatda fəal mövqe tutması ilə bağlıdır. Respublikamızda 2007-ci ilin “Gənclər ili” elan edilməsi Mədəniyyət və turizm şöbəsi ilə Gənclər və İdman İdarəsinin birgə işini yeni müstəviyə qaldırmışdır. Mədəniyyət və turizm şöbəsinin müdiri Ruqiyyə Seyidovanın təşəbbüsü ilə hazırlanmış və təsdiq olunmuş birgə tədbirlər planına uyğun olaraq iyunun 20-dən etibarən rayonun inzibati mərkəzini əhatə edən, ümummilli lider Heydər Əliyevin adını daşıyan bağ-xiyabanda mütəmadi olaraq istirahət və əyləncə axşamları keçirilməsinə başlanılmışdır. Həmin axşamlarda rayon və kənd mədəniyyət evlərinin mahnı və rəqs ansambllarının, tamaşaçılar içərisindən öz qabiliyyətini, məharət və bacarığını nümayiş etdirmək istəyən həvəskarların, hətta, respublikanın tanınmış incəsənət və söz ustalarının canlı çıxışları səslənmişdir.
Sentyabrın 19-da “Gənclər ili” çərçivəsində respublikanın Gənclər və İdman Nazirliyi tərəfindən keçirilən “Mən Azərbaycan vətəndaşıyam” devizi altında Bakı—Balakən marşrutu üzrə hərəkət edən təşviqat avtobusu öz işini rayonumuzda yekunlaşdırmışdır. Təşviqat avtobusunda gələn nümayəndə heyətini Mədəniyyət və turizm şöbəsinin, eləcə də Gənclər və İdman İdarəsinin məsul işçiləri, tanınmış ziyalılar, gənclərdən ibarət dəstələr bu yaxınlarda istifadəyə verilmiş “Qoşa qala” qapısında qarşılamış, bu nəcib təşəbbüsə qoşulmuşlar.
Tədbiri rayon gənclər və idman idarəsinin rəisi Rasim Paçalov açıq elan etdikdən sonra Gənclər və İdman Nazirliyinin bölmə müdiri Əli Məmmədov toplaşanları salamlamış, onları nazirlik adından “Gənclər ili” münasibətilə təbrik etmişdir. Nümayəndə heyətinin tərkibində olan Gənclər və İdman Nazirliyinin məsul işçisi Elçin Nəcəfov, Azərbaycan Respublikası Milli Qəhrəmanları Tanıtma İctimai Birliyinin sədri Elşən Məmmədov ürək sözlərini söyləmişlər. Axırda yerli musiqi həvəskarları ilə birgə, təşviqat avtobusu ilə gəlmiş incəsənət ustaları geniş, rəngarəng konsert proqramı ilə çıxış etmişlər.
Balakən rayonu yerli icra orqanlarının çoxşaxəli fəaliyyəti və dövlət başçımızın daimi qayğısı nəticəsində turizm bölgəsinə çevrilir.
Balakən Rayon Mədəniyyət və Turizm Şöbəsinin inspektoru

Xalq qəzeti.- 2007.- 27 sentyabr.- S. 4.