Mədəniyyət və Turizm Nazirliyində Sverdlovsk vilayəti nümayəndə heyəti ilə görüş

Sentyabrın 6-da Gənclər və Turizm Nazirliyində Sverdlovsk vilayəti hökuməti sədrinin müavini Vladimir Vlasovun başçılıq etdiyi nümayəndə heyəti ilə görüş keçirilmişdir.
Nazir Əbülfəs Qarayev bildirmişdir ki, uzun illər boyu sovet xalqlarının nailiyyətlərini özündə cəmləşdirən Rusiya mədəniyyəti olmadan müasir incəsənəti təsəvvür etmək mümkün deyildir. O, humanitar əlaqələrin davam etdirilməsinin vacibliyini vurğulamışdır.
Rusiyanın aparıcı kollektivlərindən biri olan Ural filarmoniyasının simfonik orkestri Bakıda çıxış edəcəkdir. Ə.Qarayev demişdir: "Xüsusilə xoşdur ki, orkestrin proqramına Azərbaycan klassiklərinin əsərləri də daxildir". Nazir Rusiya musiqi kollektivlərinin Azərbaycanın həm klassik, həm də müasir bəstəkarlarının əsərlərini ifa etməsinin əhəmiyyətini vurğulamış, Sverdlovsk vilayəti nümayəndə heyətinin sponsoru "Uralmaş" ASC-yə təşəkkürünü bildirmişdir.
Sverdlovsk vilayətinin qubernatoru Eduard Rosselin salamlarını çatdıran Vladimir Vlasov ümummilli lider Heydər Əliyevin təşəbbüsü ilə Sverdlovsk vilayəti ilə Azərbaycan arasında iqtisadi, mədəni əməkdaşlıq haqqında 2002-ci ildə imzalanmış sazişlə təməli qoyulan müasir mədəni əlaqələrin tarixindən danışmışdır. O vurğulamışdır ki, Azərbaycan mədəniyyəti günləri vilayətin mədəni həyatında əlamətdar hadisəyə çevrilmişdir.
V.Vlasov Sverdlovsk vilayətinin geosiyasi vəziyyəti, iqtisadi və mədəni inkişafından da söhbət açmış, simfonik orkestrin çıxışının bakılıların ürəyincə olacağına əminliyini bildirmişdir.
Görüşdə xatirə hədiyyələri təqdim edilmişdir.

Azərbaycan.- 2007.- 7 sentyabr.- S. 2.