Los-Ancelesdə Azərbaycan sərgisi,

San Xosedə ənənəvi Azərbaycan pikniki

ABŞ-ın Los-Anceles şəhərinin İncəsənət Qalereyasında Azərbaycanın xalçaçılıq və boyakarlıq sənətinə həsr olunmuş sərgi keçirilir. APA-nın xəbərinə görə, sərginin müəllifi olan sənətşünas Karen Koblitz Azərbaycana etdiyi səfərlər çərçivəsində topladığı 50-yə yaxın saxsı qabı və onlarla xalça nümunələrini yerli auditoriyaya təqdim edib. 100-dən artıq Los-Anceles sakininin qatıldığı tədbirdə əsasən Şəki rayonunda tətbiq edilən naxışlarla bəzədilmiş saxsı qablar və xalçalar qonaqların marağına səbəb olub. Xanım Kobeltzin nümayiş etdirdiyi xalçalarda qədim Azərbaycan naxışları ilə yanaşı, Kaliforniya ştatının simvolları olan çiçək, ayı və s. elementlər də öz əksini tapıb. Xalçaların birində Azərbaycan və ABŞ bayraqları, digərlərində isə dünya şöhrətli "Əli və Nino" əsərindən ifadələr əks olunub.

Sərgidə Azərbaycanın Los-Anceles şəhərindəki Baş Konsulluğunun əməkdaşları da iştirak edib.

Sərgi 1 ay açıq qalacaq.

Dünən isə Azərbaycan Şimali Kaliforniya Mədəniyyət Ocağı və Kaliforniyanın Şimali Azərbaycan Mədəniyyət Mərkəzi ştatın San Xose şəhərində ənənəvi Azərbaycan pikniki keçirib. Yüzlərlə azərbaycanlı və amerikalının qatıldığı şənlikdə qonaqlara milli yeməklər təqdim olunub, 10 yaşlı uşaqlardan ibarət "Azəri" rəqs qrupu öz məharətini göstərib. Xlisusi quraşdırılan çadırlarda qonaqlara Azərbaycanın tarixi, ədəbiyyatı və milli musiqi ənənələrinə həsr olunan əyani vasitələr paylanıb.

Qeyd edək ki, hər il sentyabr ayının birinci həftəsində keçirilən illik Azərbaycan pikniki 20 ilə yaxın tarixə malikdir.

Ekspress.- 2007.- 11 sentyabr.- S.13.