Canlı
kitabxana
Murad
İbrahimbəyov yaradıcılıq
planları və dünya ekranı barəsində
IX "Şərq-Qərb" Beynəlxalq Bakı Kinofestivalının bağlanış
günü Murad İbrahimbəyovun "Üç
qız" filmi bir daha nümayişləndi.
Həmkarları M.İbrahimbəyov haqqında
söyləyirlər ki,
o, biliyinə və intellektual səviyyəsinə görə
ən zəngin kitabxananı xatırladır.
Mütaliəsiz onun bir saatı belə olmur.
Dosye: Murad
Maqsud oğlu İbrahimbəyov 1965-ci ildə
Bakıda dünyaya gəlib. 1982-ci ildə Ümumittifaq Dövlət
Kinematoqrafiya İnstitutuna
(Sergey Gerasimovun emalatxanası) daxil olub. Hərbi xidmətini yerinə yetirib qayıdandan sonra İqor Talankinin kursuna köçürülüb. "Dundukley" adlı ilk filmini 1986-cı ildə çəkib. 10 il sonra ərsəyə gətirdiyi "Gənc qadın üçün kişi" ekran əsəri Boqota kinofestivalında bürünc
mükafata, Moskvada isə "ən yaxşı kişi" rolu nominasiyasında "Nika"ya layiq
görülüb. 2000-ci ildə
"Həqiqi əhvalatlar"
filmi "Kinoşok"
festivalının xüsusi
mükafatını, "Ədəbiyyat
və kino" festivalında kinotənqidçilərin
mükafatını qazanıb,
Vladiqafqaz kinofestivalında
isə "ən yaxşı rejissor işi" nominasiyasının
qalibi adına layiq görülüb.
2003-cü il isə
M.İbrahimbəyov üçün
xüsusilə uğurlu
olub. Həmin il onun "Qaçmağı
düşünürəm..." telefilmi IV Avrasiya teleforumunda "Qran-pri",
"Neft" qısametrajlı
sənədli filmi isə 60-cı Venesiya kinofestivalının
"ən yaxşı
sənədli film"
nominasiyasında "Gümüş
aslan" mükafatına
sahib olub. Yaradıcı heyətin üzvləri ilə birlikdə səhnəyə
çıxıb ekran
əsərini təqdim
etməzdən öncə
ssenariçi və rejissor M.İbrahimbəyov
"Həftə içi"nin müxbirinə blits-müsahibə verdi. Söhbətimiz qısa və
qaçaraq olsa da, müşahidə etməyə macal tapdım ki, Murad İbrahimbəyovun hər bir işdə
olduğu kimi, müsahibə verərkən
də ciddi və hər kəlməsini ölçüb-biçərək danışan
insan olması barədə oxuduqlarım
həqiqətə tam
uyğundur.
- Filminizin nümayişindən
sonra tamaşaçılardan
ekranda əks etdirdikləriniz barədə
nəzərdə belə
tutmadığınız assosiasiyalar
eşitdikdə bunu necə qəbul edirsiniz?
- Tam normal.
Tamaşaçının assosiasiyaları
rejissorun nəzərdə
tutduğu fikirdən qətiyyən asılı
olmamalıdır.
- Hazırda nə
üzərində işləyirsiniz?
- Hazırda yeni
bir ssenarini tamamlamışam. Çəkilişlərə
başlamaq niyyətindəyəm.
- Rusiyada?
- Xeyr, burda,
Bakıda.
- Ssenari nədən
bəhs edir, adı nədir?
- Bu haqda
hələ açıqlama
vermək istəmirəm...
- Çəkilişlərə
nə vaxt başlayırsınız?
- Bu məndən
asılı olan məsələ deyil. Azərbaycan dövləti
nə vaxt zəruri vəsait ayırsa, onda da çəkilişlərə
başlayacağam.
- Azərbaycan kinosunun bu gününü
necə qiymətləndirirsiniz?
- Tam məsuliyyətlə
deyə bilərəm
ki, bu sahədə
vəziyyət günü-gündən yaxşılaşır.
Maraqlı kino yaradıcılarını meydana
çıxaracaq yeni dalğanın gəlişi
gözlənilir...
- Yalnız gözlənilir,
yoxsa?
- Artıq nəsə,
hətta deyərdim ki, nələrsə görünməkdədir. Gənc
rejissorların filmlərindəki
tapıntılar bunu deməyə əsas verir.
- Azərbaycanın kinematoqrafik dairəsində
tez-tez belə bir müzakirə qalxır - dünya miqyasına çıxmaqdan
ötrü Azərbaycanda
dünyəvi filmlər
istehsal olunmalıdır,
yoxsa milli? Siz necə hesab
edirsiniz?
- Bu məsələdə
heç kim dəqiq cavab verə bilməz. Əgər mən bu sualın dəqiq cavabını bilsəydim, filmlərim indi dünya miqyasında nümayişlənərdi...
Həftə içi.-2007.-12 sentyabr.-S.8.