Bakıda gürcü kinosunun
retrospektivi
"Xəyallar
məzarlığı" ilə başlayıb
IX
"Şərq-Qərb" kinofestivalının sentyabrın
5-də Yaşıl Teatrda keçirilən
açılış mərasiminin bədii hissəsi
yaddaqalan olub. "Aşıqlar"
qrupunun "Bakı, sabahın xeyir!" musiqili kompozisiyası ilə başlayan tədbir bir sıra sənətçilərin
ifasında səslənən
maraqlı musiqi parçaları ilə davam etdirilib. "Natiq" ritm qrupu, Rəşad Haşımovun rəhbərlik
etdiyi "Rast" qrupu, vokalçı Elçin Əzizov, istedadlı estrada müğənnisi Sevda Ələkbərzadə və
başqalarının ifaları
rəğbətlə qarşılanıb.
Mərasimdə çıxış
edən mədəniyyət
və turizm naziri Əbülfəs Qarayev tədbir iştirakçılarını, xüsusən xarici qonaqları salamlayaraq, festivalın açılışını
bayram günü kimi dəyərləndirib:
"Bu festivalın keçirilməsində əməyi
olan bütün insanlara və qurumlara təşəkkür
edirəm. IX "Şərq-Qərb" festivalı ötənilkilərdən müəyyən
qədər fərqlənir.
Əvvəla açılış
mərasimi yenicə təmir olunmuş Yaşıl Teatrda keçirilir və bu il üç
Azərbaycan filmi festival proqramına daxil edilib. Fərqli
cəhətlərdən ən
önəmlisi isə
bu ərəfədə
Azərbaycan prezidentinin
kino sənətinin inkişafı ilə bağlı çox mühüm bir sərəncam imzalamasıdır".
Ə.Qarayev növbəti festivalın
açılışının hazırda təmirdə olan Heydər Əliyev adına Sarayda daha möhtəşəm
səviyyədə keçirilməsini
arzulayıb. Nazirin çıxışından sonra
IX "Şərq-Qərb"
kinofestivalında nümayiş
olunacaq filmlər təqdim edildi. Təbii ki, onların sırasında Azərbaycanı
təmsil edən üç film - Murad İbrahimbəyovun
"Üç qız"ı, Mehriban Ələkbərzadənin "Məhkumlar"ı və Ramiz Həsənoğlunun
çəkdiyi "Cavid
ömrü" xüsusi
maraq doğurur. Ümumilikdə 13 filmin yer aldığı festival proqramı özündə bir sıra ölkələrin
ünlü kino xadimlərinin ekran işlərini ehtiva edir. Bundan əlavə,
gürcü filmlərinin
retrospektivi də festivalın ciddi maraq oyadan cəhətlərindəndir.
Filmlərin təqdimatdan
sonra çıxış
edən Azərbaycan Kinematoqrafçılar İttifaqının
I katibi, xalq artisti Rasim Balayev
festivalın təşkilinə
dəstək verən
qurumlara təşəkkürünü
bildirib. R.Balayev IX
"Şərq-Qərb"in rəhbəri, Kinematoqrafçılar İttifaqının
sədri Rüstəm
İbrahimbəyovun adından
festivalı açıq
elan edib. Bunun ardınca festivalın himni səslənib. Tədbirin ikinci hissəsi
Mehriban Ələkbərzadənin
"Məhkumlar" filminin
nümayişinə həsr
olunub. İlk olaraq səhnəyə dəvət olunan çəkiliş qrupunu tamaşaçılara təqdim
edən M.Ələkbərzadə
böyük kinoda ilk addımlarına görə görkəmli
kinorejissor Rasim Ocaqovun ruhuna minnətdar olduğunu
deyib. Ssenari müəllifi Çingiz Abdullayev gecə yarısınadək filmə
baxmaq üçün
qalan tamaşaçılara
minnətdarlıq edib.
Bolqarıstan Kinematoqrafçılarının
istehsalı olan "Sərçələr oktyabrda"
filminin nümayişi
də festivalın açılış günü
gerçəkləşib. Dünən isə "İbrus" teatrının
kinozalında gürcü
filmləri retrospektivinin
açılışı olub. Açılışda
çıxış edən
qonşu dövlətin
kino sənəti mütəxəssisləri bu
festivala qatılmaqlarından
məmnunluq hissi keçirdiklərini bildiriblər.
Çıxışlardan sonra
rejissor Georgi Hayndravanın "Xəyallar
məzarlığı" filmi nümayiş olunub. Festival proqramına daxil edilmiş daha iki film dünən
"Azərbaycan" kinoteatrında
tamaşaçılara təqdim
olunub. Festivalda Qazaxıstanı təmsil
edən quruluşçu
rejissor və ssenari müəllifi Janabey Jetiurovun "Yol gözətçisinin
qeydləri" və
Ukrayna kinemotoqrafı Yeva Neymanın "Çay kənarında"
filmləri maraqla qarşılanıb.
525-ci qəzet.-2007.-7
sentyabr.-S.7.