Mirzəbəyli İ.

 

Füzuli ruhu, Cahangir Cahangirov musiqisi və Azərbaycan qadınının əyilməz obrazı

 

Dünən “İBRUS” teatrında keçirilən təqdimatda bu sözlər dönə-dönə səsləndi


Mədəniyyət və incəsənət aləmində elə yaradıcılıq nümunələri olur ki, bu əsərlər sahə mütəxəssisləri tərəfindən bir hadisə kimi qəbul edilir. Hər gün az qala onlarla klip çəkilən Azərbaycanda isə klip təqdimatının hadisəyə çevrilməsi tək-tək olur. Dünən “İBRUS” teatrına toplaşan tamaşaçılar sözün həqiqi mənasında əsl sənətin təntənəsinin şahidi oldular.
Ölməz bəstəkarımız Cahangir Cahangirovun ulu Füzuli yaradıcılığına müraciət edərək yazdığı kantatalardan biri (“Etməzmidir?”) əsasında çəkilmiş klip sözün həqiqi mənasında paytaxtın mədəniyyət ictimaiyyətinin və çoxsaylı kütləvi informasiya vasitələri təmsilçilərinin böyük marağına səbəb oldu. Adətən klip təqdimatında özünə lazım olan məqamı qeyd edəndən sonra məclisi yarımçıq tərk edən jurnalistlər bu ekran əsərinin üç dəfə təkrar nümayiş etdirilməsinə nail oldular.
Opera və Balet Teatrının solisti, respublikanın əməkdar artisti Gülüstan Əliyevanın yeddinci klipində heç bir kompyuter effektindən istifadə edilməmiş, sırf təbii çəkiliş materialları əsas götürülmüşdü. Tanınmış rejissor əməkdar incəsənət xadimi Ələkbər Muradovun, istedadlı operator Mətləb Yaqubovun, aktyorlardan Ənvər Vəliyev, Xalidə Quliyeva və balaca Aytacın zəhməti ilə ərsəyə gələn və İçərişəhərdə lentə alınmış məqamlar bilavasitə Füzuli dövrünün ab-havasını yaradırdı. Cahangir Cahangirovun möhtəşəm kantata ruhu isə gözəl, məlahətli səsə malik istedadlı müğənni Gülüstan Əliyevanın ifasında klipi mükəmməl bir ekran əsərinə çevirmişdi.
Maraqlı məqamlardan biri o idi ki, 4 dəqiqəlik bu ekran işinin ilk titrində “Qəhrəman Azərbaycan qadınına həsr olunur” ifadəsi yazılmış, əsas ideya kimi əzablara, işgəncələrə, məhrumiyyətlərə məruz qalan Azərbaycan qadınının əyilməzliyi, mübarizə əzmi, zirvəyə ucalmaq qüdrəti götürülmüşdür. Yaradıcı heyətin bu istəyə yetərincə nail olduğu dönə-dönə vurğulandı. Final kadrlarında dağdakı kahalardan, oyuqlardan (qorxu, təlaş və vahimə rəmzidir) balaca Aytac əynində kəfən, ayaqyalın, daşların, qaratikanların arası ilə dağın ən hündür nöqtəsinə doğru qaçır. Ora isə zirvədir. Aytacın zirvəyə çatdığı məqamda isə Tomris kimi dəmir döyüşçü libasında olan Gülüstan Əliyeva ekranda görünür. Müxtəlif effektlər, tarixi səhnələrdə görünən obrazların qəzəb, kin, aman, mərhəmət və əyilməzlik hisslərinin ifası yüksək sənətkarlıq nümunəsindən xəbər verirdi.
Respublikanın xalq artistləri Yaşar Nuri, Azər Zeynalov, Mənsum İbrahimov, Dövlət Opera və Balet Teatrının baş rejissoru, əməkdar incəsənət xadimi Hafiz Quliyev, Milli Mədəniyyəti Təbliğ Mərkəzinin sədri Arif Mədətov, filmin (bu klipə film deyənlər çox idi) yaradıcılarından Gülüstan Əliyeva, Ələkbər Muradov, Ənvər Vəliyev və digər çıxış edənlər yeni ekran əsərinin uğurundan, bədii məziyyətlərindən söz açmaqla yanaşı Məhəmməd Füzuli və Cahangir Cahangirov dünyasına göstərilən ehtiramı xüsusi qeyd etdilər. Bir təqdimatda üçüncü dəfə səsləndirilən klip ulu Füzulinin “Vətənimdir, Vətənimdir, Vətənim!” sözləri ilə tamamlanırdı. Müharibə şəraitində yaşayan, torpaqlarının 20 faizi işğal edilmiş Azərbaycanda isə bu ruhda yazılmış musiqi və ekran əsərlərinə hələ çox ehtiyac vardır. Klip mədəniyyət aləmində mühüm hadisə kimi qiymətləndirildi.

Xalq qəzeti.- 2007.- 30 sentyabr.- S. 6.