Rüstəm Z.

Bizim qəddar peşəmiz var

Aleksandr Buldakov Bakıya gəlişinin əsl səbəblərini açıqladı

Rusiyanın xalq artisti, son zamanlar çəkilən bir çox bədii və sənədli filmlərin əsas rollarının ifaçılarından olan Aleksandr Buldakov Bakıdadır. IX "Şərq-Qərb" festivalına qonaq qismində qatılan rus aktyorun iştirak etdiyi heç bir film nümayiş etdirilməyəcək. Buna baxmayaraq, o, festivalda qonaq kimi iştirakından məmnundur. A.Buldakov sənəti ilə bağlı bəzi məqamları qəzetimizə danışdı.
- İlk dəfədir Bakıdasınız?
- Yox, ilk dəfə deyil. 15 il əvvəl Azərbaycana gələrək Bakını gəzmişdim. Açığını deyim ki, budəfəki səfərimdə xeyli müqayisə etdim. İndiki Bakı əvvəlkindən çox fərqlənir. Hər şeyə diqqətlə baxdım. Gördüm ki, bu tamam başqa şəhərdir. Diqqətimi ən əvvəl buradakı səliqə çəkdi. Yeni tikililər, maraqlı yerlər var. Məmnuniyyətlə burada daha çox qalıb, Bakını gəzmək istərdim.
- Başqa ölkələrdə çəkilən filmlərə dəvət olunursunuz?
- Belə hallar olub, amma həmin filmlər çox da reklam edilməyib. Mən əsasən kino ili olanda hansısa tədbirlərə qatılıram. Əslində hər il bir neçə kino layihələrinə dəvət olunuram. Bir məqama diqqət yetirmək istəyirəm. Bəzi aktyorlar filmlərə münasibətdə fərq qoyurlar. Bu, əslində düz deyil. Bu mənim işimdirsə, hər bir rolu özümə doğma hesab etməyə borcluyam. Bir çox hallarda seriallar arasında fərq qoyulmasının şahidi oluram. Bu, artıq yaradıcılıq demək deyil. Serial lap Afrikada çəkilsin, nə fərqi var? İşinə ciddi yanaşan hər bir kəs istənilən rolun öhdəsindən gələ bilər. Bir halda ki bu mənim işimdir, o zaman ondan niyə uzaq qaçmalıyam?
- İşinizdan razısınız?
- Çox təəssüflər olsun ki, bizim qəddar peşəmiz var. O səni götürürsə, artıq həmişəlik onunsan. Sonrasını düşünmürsən də. Ona görə diqqətli olmaq lazımdır. Hesab edirəm ki, aktyor idmançıya bənzəməlidir. Yəni həmişə məşq edib, işləməlidir. Hərəkətdə olmasan, bir çox şeyləri itirəcəksən. Mənim də öz prinsiplərim var. Hansısa seriala çəkilməyə razılıq verəndə, əvvəlcə onun materialını diqqətlə nəzərdən keçirirəm. Obrazla tanış olandan sonra çalışıram ki, normal insan obrazı yaradım. Həmin obraz yaxşı dərk etməyi bacarmalı və üstünlüklərə malik olmalıdır. Heç vaxt oturmuram, həmişə fəaliyyətdəyəm. Amma hər bir halda biz nədənsə asılı oluruq.
- Özünüzü rejissor kimi sınamaq niyyətiniz olub?
- Belə planlarım var. Ya ikinci rejissor, ya da ikinci prodüser kimi iş görməyi düşünürəm. Artıq əsər də seçmişəm. Əgər alınsa, Viktoriya Tokirovanın məşhur povesti əsasında çox gözəl dramatik film çəkmək istəyirəm. Zənnimcə, yaxşı alınacaq. Hər halda mən buna inanıram. Əslində onun povestini seçməyim təsadüfi deyil. Çünki bu film tam başqa olacaq. Məqsədimiz odur ki, insanlara bu dəfə yeni bir şey təqdim edək. Yəni insanlar atəşdən, qandan, dəhşətlərdən beziblər. Onlar sakitlik istəyirlər. İstəyirlər ki, filmi izlədikdə normal insan kimi ağlayıb, gülsünlər. Qəddarlıq artıq insanları cana doydurub. Bunu nəzərə alaraq, çəkməyi istədiyimiz filmin böyük əhəmiyyətə malik olacağını düşünürəm. Düzdür, bəzi problemlər də var. Film çəkilişindən danışırsansa, öncə onun maddi tərəfini də düşünməlisən. Maliyyə məsələsi həll olunduqdan sonra film layihəsini gerçəkləşdirəcəyik.
- Azərbaycan filmlərindən hansına baxmısız?
- Əsasən sovet dövründə baxmışam. Azərbaycan filmlərindən gördüyüm ilk film "Arşın mal alan" olub. Bu filmə baxanda uşaq idim. Yadımdadır ki, "Arşın mal alan" vaxtında çox uğur qazanmış film idi. Nəinki Azərbaycanda, respublikadan kənarda da çox sevilirdi. Amma daha çox Azərbaycan filmləri ilə tanış olmaq istəyirəm. "Şərq-Qərb" festivalında iştirakım həmin filmlərlə tanışlığıma şərait yaradıb. Etiraf edim ki, məni bura gətirən səbəblərdən biri də elə budur. Eyni zamanda kino xadimləri ilə fikir mübadiləsi aparmağı düşünürəm. Habelə vaxt tapıb Bakı ilə yaxından tanış olacağam. Onu da qeyd edim ki, azərbaycanlıların potensialı genişdir. Sizinlə böyük layihələr hazırlamaq, müştərək işlər görmək lazımdır.

Ayna.- 2007.- 11 sentyabr.- S. 8.